অসম লাইভ২৪ঃ এক ঐতিহাসিক ক্ষণৰ সাক্ষী হ’ল ভাৰত৷ ১৪ জুলাইৰ দুপৰীয়া ২বাজি ৩৫মিনিটত সতীশ ধাৱান মহাকাশ গৱেষণা কেন্দ্ৰৰ পৰা উৰা মাৰিলে চন্দ্ৰযান-৩য়ে৷ এই সফল ক্ষণত অসমৰ সন্তানৰ হাতত উৎক্ষেপণৰ ৰিমট দেখি বুকু ওফন্দি উঠিছে প্ৰতিজন অসমীয়াৰ৷ অসমৰ বহুলোকেই কৰিছে প্ৰাৰ্থনা এই যানে এইবাৰ সফলভাৱে চন্দ্ৰত অভিযান চলাওক৷ অসম সন্তান চয়ন দত্তই চন্দ্ৰযান-৩ উৎক্ষেপণৰ ‘কণ্ট্ৰল অপাৰেটৰ’ হিচাপে আছে অসমৰ বিজ্ঞানী চয়ন দত্ত৷
অসমৰ তেজপুৰ বিশ্ববিদ্যালয়ৰ প্ৰাক্তন ছাত্ৰ আছিল বিজ্ঞানী চয়ন দত্ত৷ তেজপুৰ বিশ্ববিদ্যালয়ৰ পৰাই Electronics and Communication Engineeringত পঢ়াশুনা কৰে চয়নে৷ বৰ্তমান তেওঁ মহাকাশ বিভাগৰ UR Rao Satellite Centreত বিজ্ঞানী তথা ইঞ্জিনিয়াৰ জি হিচাপে কৰ্মৰত হৈ আছে৷ চন্দ্ৰযান-৩ প্ৰকল্পৰ ডেপুটি ডিৰেক্টৰ হিচাপে আছে চয়ন দত্ত৷ চয়ন দত্তই লেণ্ডাৰ আৰু ডাটা হেণ্ডেলিংৰ ষ্টৰেজ চিষ্টেম নিৰীক্ষণৰ দায়িত্বতো আছে৷ মহাকাশলৈ যোৱাৰ পাছতেই পৃথিৱীৰ কক্ষপথত প্ৰদক্ষিণ কৰাৰ পৰা আৰম্ভ কৰি অভিযানৰ যাৱতীয় খুঁটিনাটি নিয়ন্ত্ৰণত ৰখাৰ দায়িত্ব কামাণ্ড আৰু ডাটা হেণ্ডেলিঙৰ দায়িত্বও চয়নৰ হাতত৷
উল্লেখ্য যে সামান্য ভুল হ’লেও এই অভিযান বিফল হ’ব৷ যাৰ কৰুণ পৰিণতি হ’ব পাৰে চন্দ্ৰযান-২ মিছনৰ অনুৰূপ৷ কোনো যাতে ত্ৰুটি ৰৈ নাযায় তাৰবাবে এই যাত্ৰা বহু নিৰীক্ষণৰ অন্ততহে যাবলৈ দিয়া হৈছে৷ স্বাভাৱিকভাৱেই সমগ্ৰ চন্দ্ৰাভিযানৰ সপোনক বাস্তবায়িত কৰাৰ দায়িত্ব লাভ কৰি আন্তৰিক কৃতজ্ঞতা জনাইছে বিজ্ঞানী চয়ন দত্তই৷
বিজ্ঞানী চয়নে এই সন্দৰ্ভত কয়, ‘চন্দ্ৰযান-৩ক লৈ মোৰ মনত সৃষ্টি হোৱা ধুমুহাৰ উমান মই কথাৰে প্ৰকাশ কৰিব নোৱাৰিম৷ মোৰ ওপৰত ইমান গধুৰ দায়িত্ব দি ভৰষা ৰখাৰ বাবে নিজকে সন্মানিত বোধ কৰিছো৷ এতিয়া আমাৰ লক্ষ্য কেৱল চন্দ্ৰযান-৩ ৰ যাত্ৰা সফল কৰা৷ এই মিছনে দেশৰ আৰু বিশ্বৰ বিজ্ঞানীসমাজৰ মাজত উল্লেখযোগ্য মাইলফলক হৈ থাকিব৷’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
