অসম লাইভ২৪ঃ সীমা হায়দৰ, দেশৰ সকলোৰে মুখ বাগৰি চিনাকী নাম হৈ পৰিছে। সীমা হাইদৰে প্ৰেমৰ বাবেই ভাৰতলৈ আহিল নে আন কিবা উদ্দেশ্য? বহুতেই সন্দেহ কৰিছে সীমা পাকিস্তানৰ স্পাই নেকি? সীমাক সন্দেহ কৰাৰ থলো আছে। সীমা হাইদৰৰ পৰা ইতিমধ্যে তদন্তকাৰী সংস্থাই লাভ কৰিছে কেইবাটাও সন্দেহজনক তথ্য।
সীমা হাইদৰৰ পৰা ৫খন পাকিস্তানৰ পাছপৰ্ট, এখন অব্যৱহৃত পাছপৰ্ট আৰু এখন বিশেষ পৰিচয় পত্ৰ লাভ কৰিছে তদন্তকাৰী দলে। এই তথ্য প্ৰকাশ কৰিছে উত্তৰপ্ৰদেশ আৰক্ষীয়ে। পাকিস্তানৰ পৰা বেআইনীভাৱে নেপাল হৈ ভাৰতত প্ৰৱেশ কৰিছে সীমাই। ইতিমধ্যে সীমাক দুদিন ধৰি উত্তৰপ্ৰদেশৰ এণ্টি টেৰৰ স্কোয়াডে সোধপোছ কৰিছে। উত্তৰপ্ৰদেশৰ ডাইৰেক্টৰ জেনেৰেল অফ পুলিছৰ তৰফৰ পৰা জনোৱা অনুসৰি সীমাৰ পৰা ৪টা মোবাইল ফোন আৰু দুটা ভিডিঅ’ কাষ্টেছ লাভ কৰিছে আৰক্ষীয়ে। বেআইনীভাৱে ভাৰতত প্ৰৱেশ কৰাৰ বাবেই এই সোধপোছ অব্যাহত ৰখা বুলিও জনাইছে উত্তৰপ্ৰদেশ আৰক্ষীয়ে।
ইয়াৰোপৰি এটিএছ কৰ্মীসকলে জনোৱা অনুসৰি সীমাই বেআইনীভাৱে ভাৰতত প্ৰৱেশৰ কাৰণ কি তাকে লৈ অব্যাহত আছে সোধপোছ। সোধপোছৰ অন্তত প্ৰকাশ কৰা তথ্যত উল্লেখ থকা অনুসৰি, ‘বিগত ১০মাৰ্চত পাকিস্তানৰ কৰাচি বিমানবন্দৰৰ পৰা শাৰজা বিমানবন্দৰলৈ গৈছিল সীমা। তাৰপৰাই ১৫ দিনৰ পৰ্যটন ভিছা লৈ কাঠমাণ্ডু বিমানবন্দৰত উপস্থিত হৈছিল। ১৭ মাৰ্চত আকৌ নেপালৰ পৰা পাকিস্তানলৈ উভতি যায়। ইফালে ৮ মাৰ্চত শচীন গোৰখপুৰলৈ যায়। ৯মাৰ্চত শচীন সৌনাউলি সীমান্তলৈ যায়। তাৰপাছতেই শচীন কাঠমাণ্ডুলৈ যায়। ১০মাৰ্চত তেওঁ কাঠমাণ্ডুৰ নিউ বিনায়ক হোটেলৰ এটা ৰুম ভাড়া লয়। ইয়াৰ পাছতেই বিমান বন্দৰৰ পৰা সীমাক লৈ আকৌ ৰুমলৈ যায়। ১৭মাৰ্চ পৰ্যন্ত হোটেলতেই থাকে শচীন-সীমা।
প্ৰথম নেপাললৈ আহি আকৌ উভতি গৈছিল সীমা। তাৰপিছত পুনৰ ১০ মে’ত ভাৰতলৈ আহে সীমা। সেইবাৰো পুনৰ ১৫ দিনৰ পৰ্যটন ভিছা লৈ পাকিস্তান এৰে সীমাই। দ্বিতীয়বাৰ আহোতে সীমাই ৪সন্তানক লগত লৈ আহিছিল। তাৰপৰা ডুবাইলৈ তেওঁ পোনতে যাত্ৰা কৰে। ডুবাইৰ পৰা তেওঁ নেপালৰ ফ্লাইট লয়। নেপালত উপস্থিত হৈ পোখৰাৰ এখন হোটেলত নিশা কটায় সীমাই। আৰক্ষী সূত্ৰই জনোৱা অনুসৰি ১২ মে’ত পোখৰাৰ পৰা তেওঁ সিদ্ধাৰ্থনগৰ জিলাৰ ৰূপানদেহী-খুনওয়া সীমান্ত হৈ ভাৰতত প্ৰৱেশ কৰে। ডিজিপি দফতৰৰ তৰফৰ পৰা জনোৱা অনুসৰি আগ্ৰা হৈ গ্ৰেটাৰ নয়ডাৰ বাবুপুৰালৈ আহে সীমা। তাতেই শচীনে ভাড়া লোৱা বিশেষ ঘৰত সংসাৰৰ পাতনি মেলে। তেতিয়াৰে পৰা সেই বিশেষ ঘৰটোতেই আছে সীমা আৰু শচীন।
আৰক্ষী সূত্ৰই প্ৰকাশ কৰামতে অনলাইন গেম পাবজি খেলৰ মাধ্যমেৰে ২০১৯ চনত শচীনৰ সৈতে পৰিচিত হৈছিল সীমা। তাৰপৰাই প্ৰেম। ২২ বছৰীয়া যুৱক শচীনৰ সৈতে প্ৰেম কৰিয়েই ১৩০০ কিঃমিঃ দূৰৰ পৰা ভাৰতত ভৰি দিয়ে সীমাই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
