পাকিস্তানৰ নৰোৱাল জিলাৰ ছিৰাজ গাঁৱত প্ৰায় ১০০ বছৰ পুৰণি এটা হিন্দু মন্দিৰ ভাঙি পেলোৱাৰ অভিযোগক লৈ গভীৰ উদ্বেগ প্ৰকাশ কৰিছে ভাৰতে। এই ঘটনাক ভাৰতৰ বৈদেশিক পৰিক্ৰমা মন্ত্ৰালয়ে তীব্ৰ গৰিহণা দি সংখ্যালঘু লোকৰ ধৰ্মীয় স্থানৰ বিৰুদ্ধে সংঘটিত এক নিন্দনীয় ঘটনা বুলি অভিহিত কৰিছে। সংবাদ মাধ্যমৰ প্ৰশ্নৰ উত্তৰত বৈদেশিক পৰিক্ৰমা মন্ত্ৰালয়ৰ মুখপাত্ৰ ৰণধীৰ জয়ছৱালে কয় যে পাকিস্তানৰ ছিৰাজ গাঁৱৰ ঐতিহাসিক হিন্দু মন্দিৰ ধ্বংস কৰাৰ খবৰ ভাৰতে গুৰুত্বসহকাৰে লৈছে। তেওঁ কয় যে প্ৰায় এশ বছৰ পুৰণি সংখ্যালঘু লোকৰ এই উপাসনাস্থলীৰ ভঙা কাৰ্য কোনো কাৰণতে গ্ৰহণযোগ্য নহয়। ভাৰতে এই ঘটনাক স্পষ্টভাৱে গৰিহণা দিছে।
ভাৰতে মন্দিৰটো সুৰক্ষিত কৰি ৰখাত পাকিস্তানী কৰ্তৃপক্ষ ব্যৰ্থ হোৱা বুলিও প্ৰশ্ন উত্থাপন কৰিছে। ৰণধীৰ জয়ছৱালে কয় যে মন্দিৰটোৰ সুৰক্ষাৰ ক্ষেত্ৰত কৰ্তৃপক্ষৰ আপাত উদাসীনতা আৰু ব্যৰ্থতা যথেষ্ট চিন্তনীয়। তেওঁ কয় যে এনে ঘটনা পাকিস্তানত সংখ্যালঘু সম্প্ৰদায়ৰ লোকসকলে সন্মুখীন হৈ অহা নিৰাপত্তাহীনতাৰ কথা পুনৰ মনত পেলাই দিয়ে। একে সময়তে এনে ঘটনাই সংখ্যালঘু লোকৰ ধৰ্মীয় স্বাধীনতা আৰু তেওঁলোকৰ উপাসনাস্থলীৰ সুৰক্ষাৰ ওপৰতো গুৰুতৰ প্ৰশ্ন উত্থাপন কৰে।
এই ঘটনাৰ তাৎক্ষণিক আৰু স্বচ্ছ তদন্ত কৰিবলৈ পাকিস্তান চৰকাৰক দাবী জনাইছে ভাৰতে। মন্দিৰ ভাঙি পেলোৱাৰ ঘটনাত যিসকল দায়ী, তেওঁলোকক চিনাক্ত কৰি তেওঁলোকৰ বিৰুদ্ধে উপযুক্ত ব্যৱস্থা গ্ৰহণ কৰাৰো দাবী জনাইছে ভাৰতীয় বৈদেশিক পৰিক্ৰমা মন্ত্ৰালয়ে। ইয়াৰ লগতে ঐতিহাসিক মন্দিৰটো পুনৰ নিৰ্মাণৰ বাবে পাকিস্তান চৰকাৰে শীঘ্ৰে প্ৰয়োজনীয় পদক্ষেপ গ্ৰহণ কৰিব লাগে বুলিও ভাৰতে দাবী জনাইছে। ৰণধীৰ জয়ছৱালে স্পষ্ট কৰি দিয়ে যে পাকিস্তান চৰকাৰৰ প্ৰধান দায়িত্ব হৈছে দেশখনৰ সকলো সংখ্যালঘু নাগৰিকৰ সুৰক্ষা, নিৰাপত্তা আৰু কল্যাণ নিশ্চিত কৰা। ইয়াৰ লগতে সংখ্যালঘু লোকসকলৰ ধৰ্মীয় আৰু সাংস্কৃতিক ঐতিহ্য সংৰক্ষণ কৰাটোও চৰকাৰৰ দায়িত্ব বুলি তেওঁ উল্লেখ কৰে।
ভাৰতৰ বৈদেশিক পৰিক্ৰমা মন্ত্ৰালয়ে কয় যে পাকিস্তানত সংখ্যালঘু লোকৰ ধৰ্মীয় স্থানসমূহ সুৰক্ষিত কৰি ৰখাটো পাকিস্তান চৰকাৰৰ দায়িত্ব। কোনো ধৰ্মীয় স্থানত আক্ৰমণ বা ভাঙি-ছিঙি কৰাৰ ঘটনা সংঘটিত হ’লে দোষীসকলৰ বিৰুদ্ধে কঠোৰ ব্যৱস্থা গ্ৰহণ কৰিব লাগে। ভাৰতৰ মতে, ধৰ্মীয় স্থানসমূহ কেৱল উপাসনাৰ স্থানেই নহয়, সেইবোৰ এটা সম্প্ৰদায়ৰ ইতিহাস, সংস্কৃতি আৰু পৰম্পৰাৰ সৈতেও জড়িত। সেয়েহে ছিৰাজ গাঁৱৰ শতিকা পুৰণি মন্দিৰ ভাঙি পেলোৱাৰ অভিযোগৰ উচিত তদন্ত কৰি দোষীসকলৰ বিৰুদ্ধে ব্যৱস্থা গ্ৰহণ কৰাৰ লগতে মন্দিৰটো পুনৰ নিৰ্মাণৰ বাবে পাকিস্তানে পদক্ষেপ ল’ব লাগে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
