ৰ’পৱেত সংঘটিত এক দুৰ্ঘটনাত দুজন লোকৰ মৃত্যু হোৱাৰ লগতে কে’বাগৰাকীও লোক আহত হৈছে৷ ইয়াৰ বিপৰীতে ১২ কেবিনত যোৱা ২৪ ঘণ্টা ধৰি ৪৮ গৰাকী লোক আৱদ্ধ হৈ আছে৷
দেওবাৰে ঝাৰখণ্ডৰ দেওঘৰ জিলাৰ ত্ৰিকূট পাহাৰৰ পৰা বাবা বৈদ্যনাথ মন্দিৰৰ সংযোগী ৰ’পৱেত এই ভয়ংকৰ দুৰ্ঘটনাটো সংঘটিত হৈছে৷
ঝাৰখণ্ডৰ চৰকাৰী সূত্ৰই প্ৰকাশ কৰা মতে ৰাষ্ট্ৰীয় দুৰ্যোগ ব্যৱস্থাপনা বাহিনীৰ নেতৃত্বত সেনা বাহিনীৰ দুখন হেলিকপ্টাৰেৰে উদ্ধাৰ অভিযান অব্যাহত ৰখা হৈছে৷
লগতে পঢ়ক ঠিকেই- “ৰজা ডাঙৰ, নে পায়খানা ডাঙৰ”
ঝাৰখণ্ডৰ চৰকাৰী সূত্ৰই প্ৰকাশ কৰা মতে দুৰ্ঘটনাটো সংঘটিত হোৱাৰ ফলত ৰ’পৱেটোৰ ১২টা কেবিনত অতি ক’মেও ৪৮ লোক এতিয়াও আৱদ্ধ হৈ আছে৷ ইফালে সেনা বাহিনীয়ে ২ দুখন হেলিকপ্টাৰেৰে মাত্ৰ ১২ গৰাকী লোককহে এই পৰ্যন্ত উদ্ধাৰ কৰিবলৈ সক্ষম হৈছে৷
৪৮ গৰাকী লোক অচল ৰ’পৱেত আৱদ্ধ হৈ থাকিলেও জিলা প্ৰশাসন পৰিস্থিতি তেওঁলোকৰ নিয়ন্ত্ৰণ থকা বুলি দাবী কৰিছে৷
‘‘পৰিস্থিতি সম্পূৰ্ণ নিয়ন্ত্ৰণত আছে৷ কিছু লোক এতিয়াও ৰ’পৱেৰ কেবল কাৰত আৱদ্ধ হৈ আছে৷ তেওঁলোকক আমি উদ্ধাৰৰ বাবে চেষ্টা অব্যাহত ৰাখিছো৷ সকলো পৰ্যটককে আমি সুৰক্ষিতভাৱে উদ্ধাৰ কৰিম৷’’ জিলাখনৰ উপায়ুক্ত মঞ্জুনাথ ভাজন্ত্ৰীয়ে সাধাৰণ জনতাক শংকিত নহ’বলৈ আহ্বান জনাই এইদৰে কয়৷
লগতে পঢ়ক কোনজন ছাত্ৰই পৰীক্ষাৰ উত্তৰ বহিত লিখিলে, পুষ্পা…পুষ্পাৰাজ…আপোন কভী লিখেগা নহী ছল্লা!
জিলা উপায়ুক্তগৰাকীৰ লগতে আৰক্ষী অধীক্ষক সুভাষ চন্দ্ৰ জাটে ঘটনাস্থলীত উপস্থিত হৈ সমগ্ৰ উদ্ধাৰ অভিযান তদাৰক কৰি আছে৷ তেওঁলোকে প্ৰকাশ কৰিছে যে স্থানীয় গঞাইও উদ্ধাৰ অভিযানত সহযোগিতা আগবঢ়াইছে৷
বিভাগীয় সূত্ৰই প্ৰকাশ কৰা মতে কাৰিকৰী বিজুতিৰ বাবেই ৰ’পৱেৰ দুৰ্ঘটনাটো সংঘটিত হয়৷ উল্লেখ্য যে ৩৯২ মিটাৰ উচ্চতাত থকা ৭৬৬ মিটাৰ দৈৰ্ঘ্যৰ ঝাৰখণ্ডৰ এই ৰ’পৱেটো হৈছে দেশৰ ভিতৰতে উচ্চতম ৰ’পৱে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
