খাদ্য ডেলিভাৰী বয়ৰ ৰূপ লৈ ৰাজপথতে ৬জনে কুঠাৰেৰে ঘপিয়ালে তামিলনাডুৰ বিএছপিৰ মুৰব্বীক
শুকুৰবাৰে সন্ধিয়া তামিলনাডুৰ ৰাজধানী চেন্নাইত সংঘটিত হয় এক অতি শিহৰণকাৰী তথা সন্দেহজনক হত্যাকাণ্ড। বহুজন সমাজ পাৰ্টিৰ তামিলনাডু ইউনিটৰ প্ৰধান কে. আৰ্মষ্ট্ৰংক ৬ জন অজ্ঞাত লোকে বাইকেৰে আহি হত্যা কৰে।
সংবাদ মাধ্যমৰ বাতৰি অনুসৰি এই আক্ৰমণকাৰীসকলে খাদ্য ডেলিভাৰী বয়ৰ ৰূপ লৈ আহি আৰ্মষ্ট্ৰঙক ৰাজপথতে কুঠাৰ আৰু কাঁচিৰে আক্ৰমণ কৰিছিল। হত্যাকাণ্ড সংঘটিত কৰি তাৰ পৰা পলায়ন কৰা এই আক্রমণকাৰীসকলৰ সন্ধানত নামি পৰিছে আৰক্ষী৷
পেছাত এজন অধিবক্তা আৰ্মষ্ট্ৰং ২০০৬ চনত চেন্নাই কৰ্পৰেশ্যন কাউন্সিললৈ নিৰ্বাচিত হৈছিল। দুবছৰ পূৰ্বে চেন্নাইত মেগা ৰেলীৰ আয়োজন কৰি বিএছপিৰ মুৰব্বী মায়াৱতীক আমন্ত্ৰণ জনাই তেওঁ লাইমলাইটলৈ আহিছিল।
লাভ কৰা তথ্য অনুসৰি চেন্নাইৰ চেম্বিয়াম অঞ্চলত থকা নিজৰ ঘৰৰ ওচৰতে দলৰ একাংশ বিষয়াৰ সৈতে কথা পাতি থকা অৱস্থাত ছয়জন লোকে বাইকত আহি তেওঁক আক্ৰমণ কৰি পলাই যায়। এই আক্ৰমণৰ পিছত আৰ্মষ্ট্ৰংৰ পৰিয়ালে লগে লগে তেওঁক চিকিৎসালয়লৈ লৈ যায় যদিও চিকিৎসকে তেওঁক মৃত বুলি ঘোষণা কৰে।
আৰক্ষী বিষয়াসকলে কয় যে এয়া প্ৰতিশোধমূলক হত্যাকাণ্ড হ’ব পাৰে, যিটো যোৱা বছৰ আৰ্কাট সুৰেশ নামৰ এজন গেংষ্টাৰৰ হত্যাকাণ্ডৰ সৈতে জড়িত। এজন জ্যেষ্ঠ আৰক্ষী বিষয়াই ক’লে, ‘আমি বিষয়টোৰ তদন্ত কৰি আছো। এই হত্যাকাণ্ডটো পূৰ্বৰ হত্যাকাণ্ডৰ সৈতে জড়িত থকাৰ সন্দেহ।
বিএছপিৰ উচ্চপদস্থ মায়াৱতীয়ে ছ’চিয়েল মিডিয়া প্লেটফৰ্ম এক্সত আৰ্মষ্ট্ৰংক দলিতৰ বলিষ্ঠ কণ্ঠ বুলি অভিহিত কৰাৰ লগতে দোষীৰ বিৰুদ্ধে শীঘ্ৰে ব্যৱস্থা গ্ৰহণ কৰিবলৈ আহ্বান জনায়। মায়াবতীয়ে লিখিছে, ‘বিএছপি তামিলনাডু ৰাজ্যিক ইউনিটৰ সভাপতিৰ আজি সন্ধিয়া চেন্নাইৰ বাসগৃহৰ বাহিৰত হত্যাকাণ্ড অত্যন্ত দুখজনক আৰু অতি নিন্দনীয়। পেছাত এজন অধিবক্তা আৰ্মষ্ট্ৰং ৰাজ্যখনৰ দলিতসকলৰ বাবে এক শক্তিশালী কণ্ঠস্বৰ হিচাপে পৰিচিত আছিল। চৰকাৰে অনতিপলমে দোষীৰ বিৰুদ্ধে কঠোৰ ব্যৱস্থা গ্ৰহণ কৰিব লাগে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
