মহাৰাষ্ট্ৰৰ ছাত্ৰপতি সম্ভাজীনগৰত শুকুৰবাৰে এক দুখজনক ঘটনাত পিতৃ-মাতৃ আৰু পুত্ৰ তিনিওগৰাকীৰে মৃ*ত্যু হয়। ছত্ৰপতি সম্ভাজীনগৰৰ তিছগাঁও অঞ্চলৰ খাৱড়া পাহাৰত এই ঘটনা সংঘটিত হৈছে। ঘটনাৰ কেন্দ্ৰত আছিল তেওঁলোকৰ পুত্ৰ ১৯ বছৰীয়া কুণাল চন্দগুড়ে। জানিব পৰা মতে, এটা আইফোনকক লৈ পিতৃ-মাতৃৰ সৈতে হোৱা কাজিয়াৰ পিছত কুণালে আত্মহ*ত্যা কৰাৰ উদ্দেশ্যে খাৱড়া পাহাৰলৈ গৈছিল। অৱশ্যে আত্মহ*ত্যা কৰিবলৈ পাহাৰলৈ যোৱাৰ প্ৰকৃত কাৰণ এতিয়াও আৰক্ষীয়ে নিশ্চিত কৰিব পৰা নাই।
কুণাল ছাত্ৰপতি সম্ভাজীনগৰৰ জাল্টা ফাটা অঞ্চলত থকা ঘৰৰ পৰা পুৱা প্ৰায় ১০ বজাতে খাৱড়া পাহাৰলৈ গৈছিল। কুনালে পাহাৰৰ ওপৰত উঠি তললৈ নামিবলৈ অস্বীকাৰ কৰে। খবৰ পাই তেওঁৰ পিতৃ মুৰলীধৰ চন্দগুড়ে (৪৮) আৰু মাতৃ সংগীতা চন্দগুড়েই তেওঁক বুজাবলৈ উক্ত পাহাৰলৈ যায়। গাঁৱৰ আন লোকসকলো তেওঁলোকৰ সৈতে উপস্থিত হয়। প্ৰায় তিনিঘণ্টা ধৰি লোকসকলে কুণালক তললৈ নামি আহিবলৈ বুজাই থাকে। পিতৃ-মাতৃয়ে কুণালক আইফোন দিয়াৰ প্ৰতিশ্ৰুতিও দিয়ে। কিন্তু কুণাল অত্যন্ত মানসিকভাৱে বিচলিত হৈ পৰে আৰু তেওঁৰ ওচৰত বিকল্প কোনো পথ নাই বুলি কৈ পাহাৰৰ পৰা জাপ দিয়ে। পাহাৰত উপস্থিত প্ৰত্যক্ষদৰ্শীয়ে এই কথা সদৰী কৰে।
পুত্ৰক বচাবলৈ গৈ পিতৃৰ মৃত্যু
শেষৰ প্ৰায় ১৫-২০ মিনিটত কুণালৰ পিতৃ মুৰলীধৰ তেওঁৰ ওচৰলৈ গৈ তেওঁক বুজাবলৈ চেষ্টা কৰে। সেই সময়তে কুণালে হঠাতে গভীৰ খাৱৈলৈ জাঁপ দিয়ে। পুত্ৰক ধৰিবলৈ চেষ্টা কৰোঁতে মুৰলীধৰৰ ভাৰসাম্য নোহোৱা হয় আৰু তেৱোঁ কুণালৰ সৈতে গভীৰ খাৱৈত পৰি যায়। ফলত পিতা-পুত্ৰ দুয়োজনৰে থিতাতে মৃ*ত্যু হয়। ইপিনে স্বামী আৰু পুত্ৰক নিজৰ চকুৰ সন্মুখতে খাৱৈত পৰি যোৱা দেখি মাতৃ সংগীতা গভীৰভাৱে ভাঙি পৰে। তাৰ পিছতে তেৱোঁ পাহাৰৰ পৰা জাঁপ দিয়ে আৰু তেওঁৰো মৃ*ত্যু হয়।
উদ্ধাৰৰ বাবে সাজু আছিল অগ্নিনিৰ্বাপক বাহিনী
ঘটনাৰ গুৰুত্ব বুজি অগ্নিনিৰ্বাপক বাহিনীৰ কৰ্মীসকলে কুণালক উদ্ধাৰ কৰিবলৈ পাহাৰৰ তলত ডাঙৰ সুৰক্ষা জাল পাতিছিল। কিন্তু পাহাৰৰ ওপৰত থিয় হৈ থকা কুণালে বাৰে বাৰে নিজৰ স্থান আৰু দিশ সলনি কৰি আছিল। ফলত তেওঁক সুৰক্ষা জালৰ ভিতৰলৈ অনাটো সম্ভৱ নহ’ল। স্থানীয় এজন প্ৰাক্তন গাঁওবুঢ়াই দাবী কৰা মতে, কুণালে আইফোন বিচৰাৰ বিষয়ক লৈ পিতৃ-মাতৃৰ সৈতে কাজিয়া কৰাৰ পিছত এই চৰম সিদ্ধান্ত ল’বলৈ চেষ্টা কৰিছিল। অৱশ্যে আৰক্ষীয়ে এই দাবী নিশ্চিত কৰা নাই। ঘটনাটোৰ প্ৰকৃত কাৰণ জানিবলৈ আৰক্ষীয়ে তদন্ত অব্যাহত ৰাখিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
