অসম লাইভ ২৪ঃ এক ইতিবাচক খবৰ৷ ২০২২ চনৰ জানুৱাৰীত অসমবাসীয়ে লাভ কৰিব এক উদ্যোগিক প্ৰতিষ্ঠান৷ নামৰূপৰ অসম পেট্ৰ’কেমিকেল লিমিটেডে দ্ৰুতগতিত আগবঢ়াইছে বৰ্ধিত মিথানল প্লাণ্টৰ কাম৷ ভাৰতৰ ১১টা কোম্পানীৰ লগতে পূৰ্ণ গতিত ব্যস্ত হৈ পৰিছে অসম পেট্ৰ’কেমিকেল লিমিটেডৰ বিষয়াসকল৷ প্লাণ্টৰ প্ৰায় ৯৮ শতাংশ কাম সম্পূৰ্ণ হৈ উঠিছে৷ পৰিকল্পনা অনুসৰি বৰ্ধিত মিথানল প্লাণ্টৰ জৰিয়তে দৈনিক উৎপাদন কৰা হ’ব ৫০০ টন মিথানল আৰু ২০০ টন ফৰ্মেলিন৷ ভাৰতৰ লগতে নেপাল, ভূটান আৰু বাংলাদেশৰ বজাৰ দখল কৰাৰ পৰিকল্পনা গ্ৰহণ কৰিছে ৰাজ্যচৰকাৰে৷ উদ্যোগটো সম্পূৰ্ণ হৈ উঠিলে অসমৰ প্ৰায় ৩ শতাধিক নিবনুৱা যুৱক-যুৱতীয়ে সংস্থাপন লাভ কৰাৰ পূৰ্ণ সম্ভাৱনা আছে৷ ১৮ হাজাৰ কোটি ব্যয়সাপেক্ষে নিৰ্মাণ কৰা হৈছে বৰ্ধিত মিথানল প্লাণ্ট৷ ২০১৩ চনত তদানীন্তন মুখ্যমন্ত্ৰী তৰুণ গগৈয়ে আধাৰশিলা স্থাপন কৰা প্ৰকল্পটো পিছৰ পৰ্যায়ত প্ৰাক্তন মুখ্যমন্ত্ৰী সৰ্বানন্দ সোণোৱাল আৰু বৰ্তমানৰ মুখ্যমন্ত্ৰী হিমন্ত বিশ্ব শৰ্মাৰ প্ৰচেষ্টাত প্ৰায় সম্পূৰ্ণ হৈ উঠিছে প্ৰকল্পৰ কাম৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
