অসম লাইভ ২৪ঃ বিজেপি শাসিত কেন্দ্ৰীয় চৰকাৰৰ এগৰাকী মন্ত্ৰীৰ নাম হৈছে প্ৰাক্তন অভিনেত্ৰী তথা বৰ্তমানৰ কেন্দ্ৰীয় মন্ত্ৰী স্মৃতি ইৰানী। কিন্তু এইবাৰ এইগৰাকী কেন্দ্ৰীয় মন্ত্ৰীয়ে চূড়ান্ত অপমানৰ সন্মুখীন হ’ল দেশৰ সৰ্ববৃহৎ জনপ্ৰিয় খুহুটীয়া অনুষ্ঠান The Kapil Sarma Show ত। আচলতে ঘটনাটো আছিল এনেধৰণৰ, স্মৃতি ইৰানীয়ে নিজে লিখা বুলি কোৱা ‘‘লাল ছালাম’’ নামৰ এখন কিতাপ উন্মোচন কৰিবৰ বাবে আহিছিল কপিল শৰ্মা অনুষ্ঠানলৈ। আচলতে এই অনুষ্ঠানৰ বাবে পূৰ্বৰে পৰা The Kapil Sarma Show ত সময় ধাৰ্য কৰা আছিল। আৰু সেইদৰে নিৰ্দিষ্ট সময় মতে কপিল শৰ্মা অনুষ্ঠানৰ দূৱাৰদলিত উপস্থিত হৈছিল স্মৃতি ইৰানী। ইমানলৈকে সকলো ঠিকেই আছিল। সমস্যা তাতহে আৰম্ভ হ’ল, যেতিয়া কিতাপ উন্মোচনৰ বাবে যোৱা কেন্দ্ৰীয় মন্ত্ৰী স্মৃতি ইৰানীক চিনি নাপাওঁ বুলি ক’লে কপিল শৰ্মা অনুষ্ঠানৰ নিৰাপত্তাৰক্ষীয়ে। ইয়াৰ পাছত এবাৰ, দুবাৰ নহয় বহুবাৰ কেন্দ্ৰীয় মন্ত্ৰীগৰাকীয়ে অনুৰোধ কৰিলে নিৰাপত্তা ৰক্ষীক। কিন্তু নাই, নিৰাপত্তা ৰক্ষী নাচোৰবান্দা। কোনো কাৰণতে নিৰাপত্তা ৰক্ষীয়ে কপিল শৰ্মা অনুষ্ঠানত সোমাব নিদিয়ে স্মৃতি ইৰানীক। খবৰ অনুসৰি আনকি এই বাক-বিতণ্ডাৰ মাজতে স্মৃতি ইৰানীৰ সন্মুখেৰে অনুষ্ঠানৰ মাজলৈ বিভিন্ন ব্যক্তিৰ লগতে খাদ্য দিয়া মানুহ পৰ্যন্ত প্ৰবেশ কৰি প্ৰস্থান কৰিলে কিন্তু স্মৃতি ইৰানীক কোনো কাৰণতে প্ৰৱেশ কৰিবলৈ নিদিয়ে নিৰাপত্তাৰক্ষীয়ে। শেষত উপায়হীন কেন্দ্ৰীয়মন্ত্ৰীয়ে কি কৰিব আৰু৷ নিৰাপত্তাৰক্ষীয়েই যদি কেন্দ্ৰীয় মন্ত্ৰীক চিনিয়ে নাপায় তেন্তে তাত থাকিনো কি লাভ ! শেষত যেনেদৰে আহিছিল তেনেদৰে উভতি যাব লগা হ’ল কেন্দ্ৰীয় মন্ত্ৰী। ইফালে এই ঘটনাৰ পিছত কপিল শৰ্মাৰ লগতে টিভি চেনেলটোৰ পৰিচালক, মালিকে স্মৃতি ইৰানীৰ সৈতে যোগাযোগ কৰিবলৈ চেষ্টা কৰিছে যদিও বাতৰি লিখা সময় লৈ স্মৃতি ইৰানীয়ে পুনৰ কপিল শৰ্মা অনুষ্ঠানত উপস্থিত থকাৰ সন্মতি প্ৰদান কৰা নাই।
Click Here for more:
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
