অন্য চাৰি ৰাজ্যৰ লগতে উত্তৰ প্ৰদেশতো অহা ফেব্ৰুৱাৰী আৰু মাৰ্চ মাহত অনুষ্ঠিত হ’ব বিধানসভাৰ নিৰ্বাচন৷ ৰাজনৈতিক বিশ্লেষকসকলে নিৰ্বাচনৰ মূল যুঁজখন বিজেপি আৰু সমাজবাদী পাৰ্টিৰ মাজতে আৱদ্ধ থাকিব বুলি ধাৰণা কৰিলেও কংগ্ৰেছ দলো পিছ পৰি থকা নাই৷ ৰাজ্যখনৰ নিৰ্বাচনী ৰণৰ বাবে বিজেপি, সামাজবাদী পাৰ্টিৰ লগতে কংগ্ৰেছ দলেও কঁকালত টঙালি বান্ধি সাজু হৈছে৷
প্ৰিয়ংকা গান্ধী বদ্ৰাৰ নেতৃত্বত উত্তৰ প্ৰদেশৰ বিধানসভাৰ নিৰ্বাচনী যুঁজত অৱতীৰ্ণ হোৱা কংগ্ৰেছে দলটোৰ সাধাৰণ সম্পাদিকা প্ৰিয়ংকা গান্ধীক উত্তৰ প্ৰদেশৰ মুখ্যমন্ত্ৰীৰূপে প্ৰক্ষেপ কৰাৰ সম্ভাৱনা আছে৷
ৰাজ্যখনৰ লক্ষ্ণৌত দলৰ নিৰ্বাচনী ইস্তাহাৰ প্ৰকাশ কৰি এই ইংগিতকে প্ৰদান কৰিছে খোদ প্ৰিয়ংকা গান্ধী বদ্ৰাই৷ এই ইংগিতেৰে নিৰ্বাচনৰ পূৰ্বে মুখ্যমন্ত্ৰী যোগী আদিত্যনাথৰ লগতে অখিলেশ সিং যাদৱকো তীব্ৰ প্ৰত্যাহ্বান জনালে প্ৰিয়ংকা গান্ধী বদ্ৰাই!
কংগ্ৰেছৰ সাধাৰণ সম্পাদিকা প্ৰিয়ংকা গান্ধী বদ্ৰাই শুকুৰবাৰে সাংবাদিকক এই ইংগিত দি কয়, “আপোনালোকে উত্তৰ প্ৰদেশত কংগ্ৰেছ দলৰ আন কাৰোবাৰ মুখ দেখা পাইছে নেকি? ইয়াৰ সকলো ঠাইতে কেৱল মোকেই দেখিব।”
এই মন্তব্যৰ পিছতে প্ৰিয়ংকা গান্ধীয়ে নিজকে কংগ্ৰেছৰ মুখ্যমন্ত্ৰীৰূপে প্ৰক্ষেপ কৰা বুলি চৰ্চা লাভ কৰিছে৷
উল্লেখ্য যে বিধানসভাৰ নিৰ্বাচনক লক্ষ্য কৰি বিগত দিনবোৰত প্ৰিয়ংকা গান্ধীয়ে উত্তৰ প্ৰদেশৰ গাঁৱে ভূঞে পৰিভ্ৰমণ কৰি আহিছে। ইফালে মুখ্যমন্ত্ৰী যোগী আদিত্যনাথৰ জনবিৰোধী নীতিসমূহৰ বিৰুদ্ধেও অতি সৰৱ হৈ আহিছে কংগ্ৰেছ নেত্ৰী প্ৰিয়ংকা গান্ধী ভদ্ৰাই।
শুকুৰবাৰে লক্ষ্ণৌত প্ৰিয়ংকা গান্ধী বদ্ৰাৰ সৈতে কংগ্ৰেছৰ নেতা ৰাহুল গান্ধীয়ে উত্তৰ প্ৰদেশৰ আগন্তুক বিধানসভাৰ নিৰ্বাচন উপলক্ষ্যে নিৰ্বাচনী ইস্তাহাৰো প্ৰকাশ কৰে। নিৰ্বাচনী ইস্তাহাৰত ঘৃণাৰ উৰ্ধত নতুন উত্তৰ প্ৰদেশ গঢ়াৰ সংকল্পৰ কথা উল্লেখ কৰিছে কংগ্ৰেছ দলে৷
‘‘আমি ঘৃণা বিয়পাই নুফুৰো৷ আমি যুৱ প্ৰজন্মক ঐক্যৱদ্ধ কৰি নতুন উত্তৰ প্ৰদেশ গঢ়িবলৈ বিচাৰো৷” ইস্তাহাৰ মুকলি কৰি কংগ্ৰেছ নেতা ৰাহুল গান্ধীয়ে কয়৷
উল্লেখ্য যে ৪০৩খন আসন বিশিষ্ট উত্তৰ প্ৰদেশৰ বিধানসভাৰ নিৰ্বাচন অহা ১০ ফেব্ৰুৱাৰীৰ পৰা ৭ মাৰ্চলৈ সাতটা পৰ্যায়ত অনুষ্ঠিত হ’ব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
