পলাই গৈছিল ছোৱালী, মাতৃয়ে ক’লে অপহৰণ৷ প্ৰকৃততে কি হৈছিল তেজপুৰত?

বৃহস্পতিবাৰে তেজপুৰ সদৰ আৰক্ষী থানাত দৰং মহাবিদ্যালয়ৰ এগৰাকী ছাত্ৰী অপহৰণৰ সন্দৰ্ভত এক গোচৰ ৰুজু হৈছিল। ছাত্ৰীগৰাকীৰ মাতৃয়ে ৰুজু কৰা গোচৰৰ ভিত্তিত আৰক্ষীয়ে অনুসন্ধান চলাই অপহৃত ছাত্ৰী গৰাকী উদ্ধাৰ কৰিবলৈ সক্ষম হৈছে৷ ছাত্ৰীগৰাকী নিজ ইচ্ছাৰে এজন যুৱকৰ লগত পলাই গৈছিল নলবাৰীলৈ৷ ছাত্ৰীগৰাকীক কৌশলেৰে তেজপুৰলৈ মাতি আনি উদ্ধাৰ কৰে আৰক্ষীয়ে৷ সম্প্ৰতি তেজপুৰ সদৰ থানাৰ আলহী হৈ আছে তেজপুৰ হজৰাপাৰ শংকৰনগৰৰ ছাত্ৰী গৰাকী৷ নিজ কন্যাক অপহৰণৰ যি অভিযোগ কৰিছিল মাতৃয়ে সেয়া ছাত্ৰী গৰাকীয়ে অস্বীকাৰ কৰিছে৷ ছাত্ৰীক অপহৰণ কৰি যি ৫ লাখ টকা মুক্তিপন বিচৰাৰ অভিযোগ মাতৃৰ সেয়াও আৰক্ষীৰ জেৰাত ছাত্ৰী গৰাকীয়ে অস্বীকাৰ কৰিছে৷ সম্প্ৰতি পলাতক হৈ আছে ছাত্ৰী গৰাকীক পলুৱাই নিয়া প্ৰেমিকৰূপী যুৱকজন৷ আৰক্ষীয়ে যুৱকজনৰ সন্ধানত অভিযান অব্যাহত ৰাখিছে৷

তেজপুৰৰ পৰা পংকজ শইকীয়া

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ