‘সপোন’ জ্বলিছে যুদ্ধ বিধ্বস্ত ইউক্ৰেইনৰ৷ আক্ৰমণকাৰী ৰাছিয়াই ইউক্ৰেইনৰ বিশ্বৰ বৃহত্তম বিমানখন ধ্বংস কৰি ‘সপোন’ জ্বলালে৷
ইউক্ৰেইনৰ বৈদেশিক মন্ত্ৰী দমিত্ৰ’ কুলেবাই প্ৰকাশ কৰা অনুসৰি ‘AN-255 Mriya’ নাৰ বিশ্বৰ সৰ্ববৃহৎ বিমানখন ৰাছিয়াৰ মিছাইল আক্ৰমণত ধ্বংস হৈছে৷
দেশখনৰ ৰাজধানী কীভৰ সমীপত অব্যাহত থকা যুদ্ধৰ মাজতে ৰাছিয়ান সেনাই মিছাইল আক্ৰমণেৰে ‘AN-255 Mriya’ বিমানখন পুৰি ছাৰখাৰ কৰে৷ ৰাছিয়াই এই বিমানখন ধ্বংস কৰি ইউক্ৰেইনৰ বৃহৎ ক্ষতি কৰিছে৷
উল্লেখ্য যে ইউক্ৰেইনৰ এই পণ্যবাহী বিমানখন অত্যাধুনিক প্ৰযুক্তিৰে নিৰ্মাণ কৰা হৈছিল৷ যিখনক ইউক্ৰেইনে ‘সপোন’ নামেৰে নামাংকিত কৰিছিল৷
ইউক্ৰেইনীয় ভাষাত ‘Mriya’ মানে হৈছে ‘সপোন’৷ সেয়ে এই বিমানখন ধ্বংস হোৱাৰ পিছতে ইউক্ৰেইনৰ ‘সপোন’ জ্বলিল বুলি কোৱা হৈছে৷ স্মৰ্তব্য যে ইউক্ৰেইনৰ ‘এণ্টোনাভ’ নাৰ প্ৰতিষ্ঠানটোৱে বিশ্বৰ এই সৰ্ববৃহৎ বিমানখন নিৰ্মাণ কৰিছিল৷
দেশখনৰ বৈদেশিক মন্ত্ৰী কুলেবাই টুইটাৰত লিখিছে, ‘‘কীভৰ সমীপৰ এটা বিমানবন্দৰত ৰুছ সেনাই আক্ৰমণ কৰি বিশ্বৰ বৃহত্তম বিমান ‘ম্ৰিয়া’ক ধ্বংস কৰিছে। আমি বিমানখন পুনৰ নিৰ্মাণ কৰিম। আমি পুনৰ স্বাধীন, শক্তিশালী তথা গণতান্ত্ৰিক ইউক্ৰেইন গঢ়ি তুলিম।’’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
