এগৰাকী সতীৰ্থ কাৰাবন্দীক হত্যা কৰাৰ অপৰাধত অন্য ১৫ গৰাকী কাৰাবন্দীক এখন আদালতে মৃত্যুদণ্ডৰ নিৰ্দেশ দিছে৷ বৃহস্পতিবাৰে ঝাৰখণ্ডৰ পূৱ সিংভূম জিলা আদালতে এই মৃত্যুদণ্ডৰ ৰায় প্ৰদান কৰিছে৷
অতিৰিক্ত জিলা ন্যায়াধীশ-৪ ৰাজেন্দ্ৰ কুমাৰ সিনহাৰ আদালতে ভাৰতীয় দণ্ডবিধি আইনৰ ৩০২ (হত্যা) আৰু ১২০ বি (ফৌজদাৰী ষড়যন্ত্ৰ) ধাৰাত দোষী সাব্যস্ত কৰাৰ পিছত ১৫ জন লোকক ফাঁচী দি মৃত্যুদণ্ডৰ শাস্তি প্ৰদান কৰে৷ মৃত্যুদণ্ডৰ শাস্তি পোৱাসকলৰ ভিতৰত দুজন পলাতক বুলি আৰক্ষীয়ে জানিবলৈ দিয়ে।
আদালতে লগতে আন ৭ জন লোকক ভাৰতীয় দণ্ডবিধি আইনৰ ৩০৭ ধাৰা (হত্যাৰ চেষ্টা)ৰ অধীনত দোষী সাব্যস্ত কৰি ১০ বছৰৰ কাৰাদণ্ডৰ শাস্তি প্ৰদান কৰিছে।
লগতে পঢ়ক ‘মহিলাই যৌন উত্তেজনক কাপোৰৰ পিন্ধিলে যৌন নিৰ্যাতনৰ অভিযোগ বিবেচনা কৰা নহ’ব!’
উল্লেখ্য যে ২০১৯ চনত দুটা গোটৰ মাজত সংঘৰ্ষৰ সময়ত জামছেদপুৰৰ ঘাঘীদিহ কেন্দ্ৰীয় কাৰাগাৰৰ এজন কাৰাবন্দীৰ মৃত্যু হৈছিল৷ সেই বৰ্ষৰ ২৫ জুনত কাৰাগাৰৰ ভিতৰতে দুটা দলৰ মাজত সংঘৰ্ষ হৈছিল। এই হিংসাত্মক ঘটনাত মনোজ কুমাৰ সিংসহ দুজন কয়দী গুৰুতৰভাৱে আহত হয়।
পিছত চিকিৎসালয়লৈ নিয়াৰ পথত আঘাতপ্ৰাপ্ত সিঙে মৃত্যুক সাৱটি লয়। ইয়াৰ পিছতে এই হিংসাত্মক ঘটনা সন্দৰ্ভত পৰসুদিহ থানাত এটা গোচৰ ৰুজু কৰা হৈছিল।
আদালতে ৰাজ্যখনৰ আৰক্ষী সঞ্চালক প্ৰধানক নিৰুদ্দেশ হোৱা দোষী দুজনৰ বিৰুদ্ধে প্ৰয়োজনীয় ব্যৱস্থা গ্ৰহণ কৰিবলৈ নিৰ্দেশ দিয়ে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
