অসম লাইভ ২৪ঃ ৮ বছৰৰ পাছত মহাকাশৰ পৰা বিদায় ল’ব ভাৰতৰ মঙলযানে৷ ভাৰতৰ মঙলযানৰ ইন্ধন ইতিমধ্যে শেষ হৈছে আৰু ইয়াৰ বেটাৰীও সমাপ্ত হৈছে।
২০১৩ চনৰ ৫ নবেম্বৰত ৪৫০ কোটি টকা ব্যয়সাপেক্ষে ‘মাৰ্চ অৰ্বিটৰ মিছন’ (এমঅ’এম) পিএছএলবি–চি ২৫ উৎক্ষেপণ কৰা হৈছিল৷ বৈজ্ঞানিকসকলে এই মহাকাশযাখনক ২৪ ছেপ্তেম্বৰ ২০১৪-ত সফলতাৰে মঙল গ্ৰহৰ কক্ষত স্থাপিত কৰিছিল।
ভাৰতীয় মহাকাশ গৱেষণা সংস্থা চমুকৈ ইছৰোৰ এক সূত্ৰই দেশৰ সংবাদ সংস্থা পিটিআইক কয়, ‘ উপগ্ৰহৰ সকলো বেটাৰী ইতিমধ্যে শেষ হৈছে৷ সেয়ে উপগ্ৰহৰ সৈতে ইয়াৰ সম্পৰ্ক নোহোৱা হৈছে।’ অৱশ্যে, এই সন্দৰ্ভত ইছৰোৰ পৰা আনুষ্ঠানিক কোনো ঘোষণা কৰা হোৱা নাই।’
আনহাতে, অন্য এগৰাকী বিষয়াই কয়,‘উপগ্ৰহটোৰ বেটাৰী মাত্ৰ ১ ঘণ্টা আৰু ৪০ মিনিটৰ ম্যাদৰ বাবেহে ডিজাইন কৰা হৈছিল, ইমান দীঘলীয়া সময় ধৰি চলি থকাৰ বাবে বেটাৰী প্ৰায় শেষ হৈছে।’ ইছৰোৰ বিষয়াজনে কয় যে, মাৰ্চ অৰ্বিটত যানখনে প্ৰায় ৮ বছৰলৈকে কাম কৰিলে৷ যি মাথো ছমাহৰ ক্ষমতাৰে নিৰ্মাণ কৰা হৈছিল। উপগ্ৰহটোৱে ইয়াৰ কাম ভালদৰে কৰিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
