অসম লাইভ২৪ঃ ‘২০২৬ৰ ভিতৰত অসমত বন্ধ হ’ব বাল্য বিবাহ।’ সোমবাৰে বিধানসভাত এই মন্তব্য কৰিছে মুখ্যমন্ত্ৰী ডঃ হিমন্ত বিশ্ব শৰ্মাই। বিধায়ক কমলাক্ষ দে পুৰুকায়স্থই কৰা এই প্ৰশ্নৰ উত্তৰত এই কথা প্ৰকাশ কৰে মুখ্যমন্ত্ৰীগৰাকীয়ে।
বিধানসভাৰ বিধায়ক কমলাক্ষই মুখ্যমন্ত্ৰীক সুধিছিল,’২০০৬ চনৰ বাল্য বিবাহ প্ৰতিৰোধী আইনমতে কিয় ইমান দিনে কাম কৰা নাছিল? POCSO আইন কিয় লগাইছে?’ বিধায়কজনৰ প্ৰশ্নৰ উত্তৰত মুখ্যমন্ত্ৰীয়ে কয়, ‘CDPO সকলক নিযুক্তি দিয়া হৈ আছে৷ POCSO আইনতেই সকলো কথা লিখা আছে। আইনখন কেনেকৈ প্ৰযোজ্য হয় সেই কথাও লিখা আছে। ১৬ৰ বছৰৰ তলৰ ছোৱালীক হাত দিব নোৱাৰে৷ স্বামীসকলকো এৰি দিব নোৱাৰি। ১৪ বছৰ জে’ল হ’বই৷’
POCSO গোচৰ সন্দৰ্ভত উচ্চ ন্যায়ালয়ে কয় যে, আমাক কোনেও সমালোচনা কৰা নাই বুলিও কয় মুখ্যমন্ত্ৰী ড০ হিমন্ত বিশ্ব শৰ্মাই৷ বাল্য বিবাহ সন্দৰ্ভত ৯০ শতাংশই শাস্তি পাব বুলি আমি ভাবো বুলিও কয় মুখ্যমন্ত্ৰীয়ে৷ মুখ্যমন্ত্ৰীয়ে বিধানসভাত কয়, ‘২০২৬ৰ ভিতৰত বাল্যবিবাহ বন্ধ কৰিম৷ ২০০ কোটি টকা বাজেটত ধাৰ্য কৰিম৷ প্ৰতিটো বাল্যবিবাহ গোচৰত আমি অধিবক্তা দিম৷ প্ৰতি তিনি মাহৰ মূৰে মূৰে অভিযান চলাম৷ বাল্যবিবাহ বন্ধ কৰিমেই৷ স্কুলৰ একে বেঞ্চত বহা ছোৱালী এজনী হঠাতে নহা হ’লে যদি গম পাই যে তাইক বিয়া দিয়া হৈছে গোপনে, লগৰ ছোৱালীয়ে আমাক ফোন কৰি জনাব পাৰিব৷’
মুখ্যমন্ত্ৰীয়ে লগতে কয়, ‘চেঙা, বাঘবৰত ২৩ বছৰীয়া ছোৱালীয়ে কোলাত দুটা বাচ্চা, আগফালে দুটা বাচ্চা লৈ মিটিঙলৈ আহে৷ সন্দিকৈ কলেজত ছোৱালীয়ে ২৩ বছৰত প’ষ্ট গেজুৱেট কৰে৷’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
