অসম লাইভ২৪ঃ বলীউডৰ অন্যতম চৰ্চিত এক যুঁটি হৈছে মালাইকা আৰোৰা আৰু অৰ্জুন কাপুৰৰ যুঁটি। পেছাগত কাৰণৰ ওপৰিও ব্যক্তিগত জীৱনক লৈয়ো চৰ্চাক থাকে অভিনেত্ৰী মালাইকা আৰোৰা। ২০১৬ চনত ছলমান খানৰ ভাতৃ আৰবাজ খানৰ সৈতে বিবাহ বিচ্ছেদ হৈছিল মালাইকাৰ। বিচ্ছেদৰ পাছতেই গ্লেমাৰ যেন আৰু বাঢ়িল মালাইকাৰ। গ্লেমাৰৰ লগে লগে প্ৰেমেও ভুমুকি মাৰিলে মালাইকাৰ জীৱনত। বলীউড অভিনেতা অৰ্জূন কাপুৰৰ সৈতে প্ৰেমৰ সম্পৰ্ক গঢ়ি উঠিল। দুয়োৰে মাজত আছে বয়সৰ বহু পাৰ্থক্য। মালাইকাতকৈ অৰ্জুন প্ৰায় ১২ বছৰে সৰু।
প্ৰথমে প্ৰেমক লৈ মুখ খোলা নাছিল প্ৰেমিক যুঁটিটোৱে। কিন্তু পাছলৈ দুয়োৱে সামাজিক মাধ্যমত অন্তৰংগ ফটো শ্বেয়াৰ কৰিবলৈ ল’লে। বহুতেই প্ৰশ্নও কৰিছিল দুয়োকে। দুয়োৱে বিবাহৰ কথা ভাৱিছে নেকি? কিন্তু এই প্ৰশ্নৰ উত্তৰত দুয়োৰেই একে মত। প্ৰেম মানেই বিবাহ নহয়। বিবাহ নকৰাকৈয়ো প্ৰেম কৰিব পাৰি। কিন্তু শেহতীয়াভাৱে ভাইৰেল হৈছে আন এক খবৰ। মালাইকা অন্তঃসত্ত্বা। এই ভাইৰেল খবৰক লৈ মুখ খুলিছে অভিনেতা তথা মালাইকাৰ প্ৰেমিক অৰ্জুন কাপুৰে।
সম্প্ৰতি এক সাক্ষাৎকাৰত প্ৰেমিকা মালাইকা সন্তানসম্ভৱা নেকি সেই বিষয়ে অৰ্জুনে কেইবাটাও গুৰুত্বপূৰ্ণ কথা প্ৰকাশ কৰিছে। তেওঁ সাক্ষাৎকাৰটোত কয়,’নেতিবাচক চৰ্চা কৰাই পৃথিৱীৰ আটাইতকৈ সহজ কাম। আমিতো অভিনেতা। আমাৰ ব্যক্তিগত জীৱনৰ কোনো পৰিসৰতে সীমিত নহয়। পেছাৰ কাৰণে আমি এই কথা স্বীকাৰো কৰি লঁও। কাৰণ আমাৰ কাম দৰ্শকৰ ওপৰতেই নিৰ্ভৰ কৰে। ইয়াৰ মাজতেই আমিও তেজ মঙহৰ মানুহ। আমাৰো নিজা কিছু আশা আকাংক্ষা আছে। কিন্তু এই খবৰ প্ৰচাৰ কৰাৰ আগতে আমাক এবাৰ সুধি ল’ব লাগে।’
অৰ্জুনৰ মতে এইধৰণৰ গুৰুত্বপূৰ্ণ খবৰ প্ৰচাৰ কৰাৰ পূৰ্বে প্ৰকৃত সত্য জানি লোৱাটো খুবেই প্ৰয়োজন। কেৱল এখন ভাইৰেল ফটোক কেন্দ্ৰ কৰিয়েই খবৰ প্ৰচাৰ কৰাটো সমীচিন নহয় বুলি জনাইছে অৰ্জুনে। মালাইকা আৰু তেওঁৰ সম্পৰ্কক লৈ যিকোনো কথাই যেন শুনিবলৈ প্ৰস্তুত নহয় অৰ্জুন সেই কথা তেওঁৰ সাক্ষাৎকাৰটোৰ পৰাই স্পষ্ট হৈ পৰিছে। এই সাক্ষাৎকাৰটোৰ পৰাই এই কথা স্পষ্ট হৈ পৰে যে মালাইকাৰ সন্তান সম্ভৱা হোৱাৰ খবৰ এক ভুৱা খবৰহে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
