অসম লাইভ২৪ঃ সংসদৰ বৰ্ষাকালীন অধিৱেশনৰ পূৰ্বেই মণিপুৰৰ হিংসাত্মক ঘটনাক লৈ মুখ খুলিছে প্ৰধানমন্ত্ৰী নৰেন্দ্ৰ মোদীয়ে। প্ৰধানমন্ত্ৰী মোদীয়ে সংবাদমাধ্যমৰ সন্মুখত কয়, ‘মণিপুৰৰ ঘটনা সভ্য সমাজৰ বাবে লজ্জাজনক। এই ঘটনাই দেশৰ ১৪০ কোটি জনতাৰ মূৰ তললৈ নমাবলৈ বাধ্য কৰাইছে।’ দুগৰাকী মহিলাক বিবস্ত্ৰ কৰি খোজ কঢ়োৱাৰ দৃশ্যই তেওঁকো ব্যথিত কৰা বুলি প্ৰকাশ কৰিছে প্ৰধানমন্ত্ৰী নৰেন্দ্ৰ মোদীয়ে।
মণিপুৰৰ দুগৰাকী মহিলাৰ বিবস্ত্ৰ কৰি ৰাস্তাত ঘূৰাই লৈ ফুৰাৰ দৃশ্য সামাজিক মাধ্যমত ভাইৰেল হৈ পৰাৰ পাছতেই দেশজুৰি প্ৰধানমন্ত্ৰীক সমালোচনা কৰা দেখা গৈছে। অধিকাংশ বিৰোধী দলেই উত্তৰ পূূবত বিজেপি শাসিত ৰাজ্যৰ প্ৰকৃত স্বৰূপ এয়াই বুলি কোৱাৰ উপৰিও মণিপুৰৰ মুখ্যমন্ত্ৰী এন বীৰেণ সিঙক ডাবল ইঞ্জিন চৰকাৰৰ দায়িত্বৰ পৰা ইস্তাফা দিবৰ বাবেও দাবী উত্থাপন কৰিছে। ইয়াৰোপৰি ইমান হিংসাত্মক ঘটনা ঘটাৰ পাছতো কিয় মোদীয়ে নীৰৱ হৈ আছে বুলিও প্ৰধানমন্ত্ৰীলৈ প্ৰশ্নবাণ এৰিছে।
এই সকলোবোৰৰ মাজতেই বৃহস্পতিবাৰৰ পৰা আৰম্ভ হ’ব বৰ্ষাকালীন অধিৱেশন। মণিপুৰৰ পৰিস্থিতিক লৈ আলোচনা কৰা হ’ব বুলি প্ৰকাশ কৰিছে প্ৰতিৰক্ষা মন্ত্ৰী ৰাজনাথ সিঙে। বিৰোধীয়ে বৰ্ষাকালীন অধিৱেশনত মণিপুৰৰ হিংসাত্মক পৰিস্থিতিৰ আলোচনাৰ বাবে দীৰ্ঘদিন ধৰি দাবী উত্থাপন কৰি আছে। অৱশেষত বুধবাৰে সামাজিক মাধ্যমত ভাইৰেল হৈ পৰা ভিডিঅ’ক দেখি মাত মাতিবলৈ বাধ্য হৈ পৰিছে প্ৰধানমন্ত্ৰী নৰেন্দ্ৰ মোদী।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
