অসম লাইভ২৪ঃ টুইটাৰ ক্ৰয় কৰাৰ পাছৰে পৰাই ব্যস্ততাৰ সীমা নাই Teslaৰ চিইঅ’ এলন মাস্কৰ। টুইটাৰ ক্ৰয়ৰ পাছৰে পৰাই ইয়াৰ ব্যৱহাৰকাৰীসকলৰ বাবে নতুন নতুন নীতি আনিছে মাস্কে। ইয়াৰোপৰি তেওঁৰ অন্যান্য ব্যৱসায়সমূহো আছে সেইসমূহক লৈয়ো ব্যস্ত থাকিব লাগে মাস্ক। স্পেছ এক্স, টেছলাকে ধৰি অইন কেইবাটাও কোম্পানী চম্ভালি আছে মাস্কে। এই পৰিস্থিতিত বিজি লাইফ এটাত কেনেকৈ সময় মিলাই চলে সেই সম্পৰ্কে শেহতীয়াকৈ এক সাক্ষাৎকাৰত প্ৰকাশ কৰিছে মাস্কে।
সপ্তাহত ১২০ ঘণ্টা কাম কৰে মাস্কে
এটা সাক্ষাৎকাৰত মাস্কে তেওঁৰ কৰ্মশৈলীৰ কথা প্ৰকাশ কৰিছে। তেওঁ কয়, ‘পূৰ্বেও সপ্তাহত মই ৮০ৰ পৰা ৯০ ঘণ্টা অকল কামেই কৰো। কিন্তু ২০২২ চনৰ অক্টোবৰ মাহৰ পৰা মোৰ ব্যস্ততা বাঢ়িছে। টুইটাৰ ক্ৰয়ৰ পাছৰে পৰাই এই ব্যস্ততা বৃদ্ধি পাইছে। এতিয়া মই সপ্তাহত ১২০ ঘণ্টা পৰ্যন্ত কাম কৰো। অৰ্থাৎ দৈনিক মই ১৭ঘণ্টাকৈ কাম কৰো। নিশা প্ৰায় ৩মান বজাত শুই পুৱা ৯ৰ পৰা ৯.৩০ বজাত সাৰ পাওঁ। দৈনিক মই ৬ঘণ্টামানহে শুওঁ।’
ঘৰ বুলিবলৈ নাই টুইটাৰৰ কাৰ্যালয়ৰ ছোফাতেই শুৱে মাস্ক
পূৰ্বেও ঘৰ নাছিল মাস্কৰ। এতিয়াও তেওঁৰ ঘৰ বুলিবলৈ কোনো আশ্ৰয়স্থল নাই। সেয়ে টুইটাৰৰ অফিচতেই নিশা কটায় মাস্কে। ইফালে টুইটাৰ ক্ৰয় কৰাৰ পাছত ব্যস্ততাও বৃদ্ধি পাইছে। কাৰ্যালয়তেই বিশেষ ছোফা আনি লৈছে মাস্কে। তাতেই নিশা যাপন কৰে বুলিও সাক্ষাৎকাৰত জনাইছে মাস্কে। ইয়াৰোপৰি টুইটাৰৰ মুখ্য কাৰ্যালয়ত কাম কৰি থকা কৰ্মচাৰীসকলকো কাৰ্যালয়ত থকাৰ ব্যৱস্থা কৰিছে মাস্কে। তেওঁ এই সন্দৰ্ভত কয়, ‘মই অফিচত শুও, কামো কৰো, অফিচেই মোৰ সৰ্বচ্চ। ইয়াৰ পৰাই মই সকলোবোৰ চোৱাচিতা কৰো। এনেকৈ বেছি দিন ইয়াতেই থকাটো সম্ভৱ নহয় যদিও মোৰ নিজাকৈ ঠিকনা নোহোৱালৈকে ইয়াতেই থাকিব লাগিব। টুইটাৰৰ কামকাজক লৈয়ো মোৰ কিছু চিন্তা আছে সেয়ে এনেকৈ থাকি কাম কৰি আছো। টুইটাৰৰ সকলোবোৰ ঠিক হৈ গ’লেই মোৰ জীৱনটো আকৌ আগৰদৰে নৰ্মেল হৈ পৰিব।’
মাস্কৰ জীৱনশৈলী কেনে?
মাস্কে টুইটযোগে নিজৰ জীৱনশৈলীৰ কথাও মাজে মাজে জনায়। কেৱল হিন্দু লোকেই ব্ৰতত থাকে তেনে নহয়। মাস্কেও ব্ৰতত থাকে। ব্ৰতত থকাটো স্বাস্থ্যসন্মত বুলিও মাস্কে জনাইছে। তেওঁ ওজন কমাবৰ বাবেই এই ব্ৰত কৰে বুলিও টুইটত জনাইছিল। ইয়াৰোপৰি খাদ্য তালিকাৰ কথাও তেঁও টুইটত উল্লেখ কৰিছে। তেওঁ লিখিছে যিমানেই অৱসাদ নাহক কিয় কাহানিও কেফেইন বা কফি নাখায় মাস্কে। স্বাস্থ্যৰ বাবে কফি বেয়া বাবেই তেওঁ কফি নাখায়, ইয়াৰোপৰি কফিৰ অপকাৰীতাৰ কথাও তেওঁ টুইটত উল্লেখ কৰিছে।
স্বাস্থ্যসন্মত ভাৱে চলাৰ পাছতো মাস্কৰ আছে এই ৰোগ
এলন মাস্ক মানুহজনেই খুল্লামখুল্লা। প্ৰত্যেকটো কথাই তেওঁ সামাজিক মাধ্যমত শ্বেয়াৰ কৰি ভালপায়। ৰোগৰ কথাও তেওঁ তেনেকৈয়ে টুইটত শ্বেয়াৰ কৰিছে। মাস্কে তেওঁৰ প্ৰধান ৰোগ কঁকাল আৰু ডিঙিৰ বিষ বুলি জনাইছে। ব্যস্ততাপূৰ্ণ জীৱনৰ বাবেই তেওঁৰ এনে অসুবিধা হোৱা বুলি উল্লেখ কৰিছে। কিন্তু এই ৰোগৰ আঁৰত আন এটা কাৰণো আছে বুলি জনাইছে মাস্কে। এবাৰ তেওঁ এগৰাকী চুমু খেলুৱৈৰ সৈতে কুস্তি কৰিছিল। সেই চুমু খেলুৱৈয়ে উঠাই থেকেচা মাৰি দিয়াৰ পাছৰে পৰাই এই বিষ সংগী হৈ পৰিল বুলিও জনাইছে মাস্কে। ইয়াৰোপৰি দীৰ্ঘদিন ধৰি ডায়াবেটিছত আক্ৰান্ত হৈ আছে মাস্ক। সেয়ে দৈনিক তেওঁ ডায়াবেটিছৰ ঔষধ গ্ৰহণ কৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
