অসম লাইভ২৪ঃ ঠিক ১০ দিন পূৰ্বে কলকাতাৰ ইডেন গাৰ্ডেন্সত স্পৰ্শ কৰিছিল মাইলফলক। নিজৰ ৩৫তম জন্মদিনত এদিনীয়া ক্ৰিকেটত ৪৯তম শতৰান কৰি শচীন তেণ্ডুলকাৰৰ পাছতেই নিজৰ নাম লিখিবলৈ সক্ষম হৈছিল বিৰাট কোহলীয়ে। মুম্বাইৰ ৱানখেড়ে ষ্টেডিয়ামত বিশ্বকাপৰ ছেমিফাইনেলত মাষ্টাৰ ব্লাষ্টাৰৰ ৰেকৰ্ড ভাঙিলে বিৰাটে। এদিনীয়া ক্ৰিকেটত ৫০তম শতৰাণ কৰিলে কোহলীয়ে। ১০৬ বলত ১০০ ৰান কৰি এদিনীয়া ক্ৰিকেটত শচীনৰ ৰেকৰ্ড ভাঙিবলৈ সক্ষম হ’ল বিৰাটে।
বিৰাটে এই ৰেকৰ্ড গঢ়াৰ লগে লগেই কেমেৰা ঘূৰিল অনুষ্কাৰ দিশে। অনুষ্কাৰ ফ্লায়িং কিছৰ ভিডিঅ’ বন্দী হ’ল কেমেৰাত। বিশ্বকাপৰ ছেমিফাইনেলত নিউজিলেণ্ডৰ বিৰুদ্ধে খেলত নামি ১০৬টা বলত শতৰাণ পূৰ্ণ কৰিছে বিৰাটে। টছত জিকি প্ৰথমে বেটিং কৰাৰ সিদ্ধান্ত লৈছিল অধিনায়ক ৰোহিত শৰ্মাই। তেওঁ পেভিলিয়নলৈ ওভতি অহাৰ লগে লগেই হাতত বেট লৈ ফিল্ডত নামে বিৰাট। আনহাতে ক্ৰিজৰ অন্য দিশত আছিল শুভমন গীল। ৭৯ ৰান কৰি আঘাত পায় গেলাৰীলৈ উভতি যায় শুভমন। কোহলীক সংগ দিয়ে শ্ৰেয়ছ আয়াৰে। বিৰাট-শ্ৰেয়ছৰ পাৰ্টনাৰশ্বিপতেই শতৰান পূৰ্ণ কৰিছে বিৰাটে। ১০০ ৰান ছুয়েই বেট তুলি প্ৰথমে শচীনৰ ফালে দৃষ্টি ঘূৰাই বিৰাটে। গেলাৰীত থকা শচীনে থিয় হৈ বিৰাটক অভিনন্দন জনোৱাৰ দৃশ্যও বন্দি হ’ল কেমেৰাত। শচীনৰ পাছতেই কোহলীৰ চকু ঘুৰিল অনুষ্কাৰ ফালে। লগে লগেই অনুষ্কাই স্বামীক এই বিশ্বৰেকৰ্ডৰ বাবে অভিবাদন জনাই এৰি দিয়ে কেইবাটাও ফ্লায়িং কিছ।
ছেমিফাইনেলত নমাৰ পূৰ্বেও স্বামীক উদ্দেশ্যি আকুলতাৰে চাই থকা দেখা গৈছিল অনুষ্কাক। ইনিংছ খেলি থকাৰ সময়তো স্বামীৰ খেলক মনোযোগেৰে চাই থকা দেখা গৈছে অনুষ্কাক। অনুষ্কাৰ চকুৱে মুখে পৰিস্ফুত হৈ আছে উদ্বিগ্নতাৰ চাপ। শচীনৰ সন্মুখতেই এই ৰেকৰ্ড গঢ়ি সুখী বিৰাটো সেই কথা তেওঁৰ মুখলৈ চালেই স্পষ্ট হৈ পৰে। মাত্ৰ ১০ দিনৰ ভিতৰত ৪৯তম শতৰানৰ পৰা ৫০তন শতৰান বিৰাটে অচিৰেই কৰিব বুলি শচীনে কৰা ভৱিষ্যতদ্বাণীও এইবাৰ সত্য প্ৰমাণ কৰি দেখুৱালে বিৰাট কোহলীয়ে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
