ডিজিটেল ডেস্কঃ শেহতীয়াকৈ তিনি ৰাজ্যৰ নিৰ্বাচনত বেয়াকৈ মুখ থেকেচা খোৱাৰ পাছত সকলো অংকতে আউল লাগিছে কংগ্ৰেছ নেতৃত্বাধীন বিৰোধী মিত্ৰজোঁট ইণ্ডিয়াত। শোচনীয় পৰাজয়ৰ পাছত কংগ্ৰেছ তথা বিৰোধী মিত্ৰজোঁটৰ মাজতে এতিয়া কথাৰ অৰিয়াঅৰিঁ আৰম্ভ হৈছে। শেহতীয়াকৈ অসমৰ প্ৰেক্ষাপটতো কথাৰ অমিল দেখা গৈছে বিৰোধী মিত্ৰজোঁটত থকা নেতাসকলৰ মাজত।
সামাজিক মাধ্যমত কিছুদিনৰ আগেয়ে আম আদমী পাৰ্টিৰ এগৰাকী ৰাজ্যিক নেতাই মুকলিকৈ লুৰিণজ্যোতি গগৈক ডিব্ৰুগড়ত প্ৰাৰ্থীত্ব প্ৰদানৰ বিৰোধিতা কৰাৰ পাছতে এতিয়া এই বিষয়টোক লৈ চৰ্চা ক্ৰমান্বয়ে বৃদ্ধি পাইছে। জনৈক কলিতা উপাধিৰ এগৰাকী আপৰ শীৰ্ষ নেতাই ডিব্ৰুগড়ত লুৰীণজ্যোতি গগৈক প্ৰাৰ্থিত্ব প্ৰদান কৰা মানে বিজেপিৰ ওচৰত পৰাজয়বৰণ কৰা বুলি সামাজিক মাধ্যম (ফেচবুক) ত মুকলিকৈ ক্ষোভ প্ৰকাশ কৰিছে।
কেৱল লুৰীণজ্যোতি গগৈক লৈয়ে নহয়, শেহতীয়াকৈ বিৰোধী দলসমূহৰ মাজত আসনৰ ভাগ-বতৰোৱাক লৈও মতৰ অমিল দেখা গৈছে। বিশেষকৈ আম আদমী পাৰ্টিয়ে আসনৰ ভাগ-বতৰোৱাক লৈ বিভিন্ন সময়ত বিৰূপ মন্তব্য কৰা পৰিলক্ষিত হৈছে। এনে ৰাজনৈতিক প্ৰেক্ষাপটলৈ চাই আগন্তুক লোকসভা নিৰ্বাচনতো যে অসমৰ বিৰোধী ৰাজনৈতিক দলসমূহৰ মাজত তীব্ৰ বাক-বিতণ্ডাৰ সৃষ্টি হব সেয়া নিশ্চিত।
নিৰ্বাচন কাষ চাপি অহাৰ লগে লগে বিৰোধী দলসমূহৰ মাজত কথাৰ অৰিয়াঅৰিঁ সৃষ্টি হোৱাৰ ভৱিষ্যতদ্বাণী কৰি থৈছে মুখ্যমন্ত্ৰী ড০ হিমন্ত বিশ্ব শৰ্মাৰ লগতে মন্ত্ৰী পীয়ুষ হাজৰিকাইও। এতিয়া সময়েহে কব কংগ্ৰেছ নেতৃত্বাধীন বিৰোধী মিত্ৰজোঁটে সময়ত ৰাজনীতিৰ এনে জটিল অংক কেনেকৈ সমাধা কৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
