অসম লাইভ২৪ঃ অৱশেষত ৰাম মন্দিৰ উদ্বোধনী অনুষ্ঠানৰ আমন্ত্ৰণ ৰক্ষা নকৰাৰ সিদ্ধান্ত ল’লে কংগ্ৰেছে। বুধবাৰে কংগ্ৰেছৰ হাইকমাণ্ডৰ পক্ষৰ পৰা স্পষ্ট কৰি দিয়া হৈছে এই কথা। অযোধ্যাৰ ৰাম মন্দিৰৰ উদ্বোধনী অনুষ্ঠানত ২২ জানুৱাৰীত উপস্থিত নাথাকে কংগ্ৰেছৰ কোনো এজন নেতা। কংগ্ৰেছৰ পক্ষৰ পৰা লিখিতৰূপত দিয়া হৈছে যে, ৰাম মন্দিৰৰ উদ্বোধনী অনুষ্ঠান কেৱল RSS আৰু BJPৰ হে ইভেণ্ট। এই অনুষ্ঠানত সেয়ে কংগ্ৰেছ দলৰ কোনো নেতা উপস্থিত নাথাকে।
ৰামৰ প্ৰাণ প্ৰতিষ্ঠা অনুষ্ঠানলৈ কংগ্ৰেছৰ প্ৰাক্তন সভানেত্ৰী ছোনীয়া গান্ধী, বৰ্তমানৰ সভাপতি মল্লিকাৰ্জূন খাৰ্গে আৰু লোকসভাৰ কংগ্ৰেছ দলপতি অধীৰ ৰঞ্জন চৌধুৰীক আমন্ত্ৰণ জনোৱা হৈছিল। ইয়াৰোপৰি আমন্ত্ৰণ লাভ কৰিছিল প্ৰাক্তন প্রধানমন্ত্ৰী তথা বৰ্ষীয়ান কংগ্ৰেছ নেতা মনমোহন সিঙেও। কিন্তু কংগ্ৰেছ শিবিৰৰ পক্ষৰ পৰা জনোৱামতে তেওঁলোকৰ মাজৰ পৰা কোনোৱে ২২ জানুৱাৰীৰ অনুষ্ঠানত উপস্থিত নাথাকে। এই প্ৰসংগত কংগ্ৰেছৰ সাধাৰণ সম্পাদক জয়ৰাম ৰমেশেও এক অফিছিয়েল বিবৃতি জাৰি কৰিছে।
বিবৃতিত তেওঁ লিখিছে, ‘ভগৱান ৰামক এই দেশৰ কোটি কোটি মানুহে পূজা কৰে। ধৰ্ম একেবাৰেই ব্যক্তিগত বিষয়। কিন্তু অযোধ্যাৰ এই মন্দিৰ উদ্বোধনৰ অনুষ্ঠানক বিজেপি আৰু RSSয়ে ৰাজনৈতিক ৰং সানিছে। নিৰ্বাচনী ফায়দা উঠাবৰ বাবেই বিজেপিয়ে আধা বনোৱা এই মন্দিৰ উদ্বোধন কৰিবলৈ আগবাঢ়িছে। আমি ২০১৯ চনৰ উচ্চতম ন্যায়ালয়ৰ ৰায় মানি লৌছো আৰু দেশৰ সকলো ৰাম ভক্তক আমিও শ্ৰদ্ধা কৰো। তেওঁলোকৰ ভাৱাবেগকো শ্ৰদ্ধা কৰো। কিন্তু এই উদ্বোধনী অনুষ্ঠানলৈ আমি নাযাও এটা কাৰণতে। এই উদ্বোধনত দেশৰ জনতাৰ আৱেগৰ তুলনাত বিজেপিৰ পলিটিক্স হে সোমাই আছে। আমাৰ সকলো নেতাই এই আমন্ত্ৰণ প্ৰত্যাখ্যান কৰিছে।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
