অসম লাইভ২৪ঃ অযোধ্যাৰ ৰাম জন্মভূমিত সোমবাৰে শিশু ৰামৰ বিগ্ৰহত প্ৰাণ প্ৰতিষ্ঠা কৰা হ’ল। দীৰ্ঘ ৫০০ বছৰীয়া প্ৰতীক্ষাৰ পাছতেই আকৌ এবাৰ ঘৰলৈ উভতি আহিছে শ্ৰী ৰাম। বিগত ১৬ জানুৱাৰীৰ পৰা আৰম্ভ হৈছিল ৰাম মন্দিৰৰ গৰ্ভগৃহত ৰামৰ বিগ্ৰহৰ প্ৰাণ প্ৰতিষ্ঠাৰ অনুষ্ঠান। অৱশেষত ২২ জানুৱাৰীত সেই প্ৰক্ৰিয়া সমাপ্ত হৈছে। ৰাম নামৰ আৱেগত ভাহিছে সমগ্ৰ দেশ। অযোধ্যা যিহেতু ৰামচন্দ্ৰৰ জন্মভূমি সেয়ে ৰাম মন্দিৰত শ্ৰীৰামৰ শিশুকালৰ মূৰ্তিহে প্ৰতিষ্ঠা কৰা হৈছে। ক’লা গ্ৰেনাইট পাথৰেৰে তৈয়াৰ কৰা হৈছে ৰামৰ মূৰ্তি। কিন্তু কলা ৰঙৰ মূৰ্তি দেখি বহুতৰে মনতেই প্ৰশ্ন, কিয় ক’লা ৰঙৰ মূৰ্তি তৈয়াৰ কৰা হ’ল?
একাংশ শাস্ত্ৰজ্ঞৰ মতে ক’লা ৰঙৰ মূৰ্তি তৈয়াৰ কৰাৰ কাৰণ হৈছে শ্ৰী ৰামৰ দেহৰ বৰণো প্ৰকৃততে ক’লাই আছিল। শ্ৰী ৰাম শ্যামবৰ্ণৰ আছিল বুলি ৰামায়ণৰ বৰ্ণনাতেই উল্লেখ আছে। সেয়ে ৰামৰ বিগ্ৰহৰ ৰঙো ক’লা কৰা হৈছে। ইয়াৰোপৰি ৰামলালাৰ মূৰ্তি তৈয়াৰ কৰা শিলটো হৈছে নাৰায়ণ শিল। এই শিল কলা ৰঙৰ। হিন্দু ধৰ্মত নাৰায়ণ শিল অত্যন্ত মাহাত্ম্যপূৰ্ণ। ৰামৰ মূৰ্তি তৈয়াৰ কৰা এই শিলৰ বয়স কেইবা হাজাৰ বছৰ। এই শিলক স্বয়ং নাৰায়াণ বুলিয়েই বিশ্বাসো কৰে হিন্দুধৰ্মাৱলম্বী লোকে। নাৰায়ণ শিল হাজাৰ হাজাৰ বছৰ ধৰি একেদৰেই থাকে। এই পাথৰ কেতিয়াও ক্ষয়ো নাযায়। ৰামৰ বিগ্ৰহত সেয়ে পানী, চন্দন, গাখীৰ আদি ঢালিলেও ৰঙৰ কোনো পৰিবৰ্তন নহয়। এই বিগ্ৰহৰ ৰং হাজাৰ হাজাৰ বছৰ ধৰি একেই থাকিব।
প্ৰাণ প্ৰতিষ্ঠাৰ গুৰুত্ব
হিন্দুধৰ্ম অনুসৰি বিগ্ৰহত প্ৰাণ প্ৰতিষ্ঠা অত্যন্ত গুৰুত্বপূৰ্ণ এটা প্ৰক্ৰিয়া। ইয়াৰ অৰ্থ এয়ে যে দেৱতাৰ বিগ্ৰহত নিৰ্দিষ্ট ৰীতি আচাৰ আৰু মন্ত্ৰোচ্চাৰণৰ মাধ্যমেৰে সেই দেৱতাক সেই স্থানত জীৱিত কৰি তোলা। প্ৰাণ প্ৰতিষ্ঠা নকৰালৈকে কোনো বিগ্ৰহকেই পূজা কৰিব নোৱাৰি। সেয়ে কোনো বিগ্ৰহত পূজা কৰাৰ আগে আগে তাৰ প্ৰাণ প্ৰতিষ্ঠা কৰাটো অত্যন্ত জৰুৰী।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
