বৃহৎ সকাহ, অৱশেষত জামিন কেজৰিৱালৰ
অৱশেষত আপ দলৰ নেতা অৰবিন্দ কেজৰিৱাললৈ আহিল সেই বিশেষ খবৰ । অন্তৱৰ্তীকালীন জামিন লাভ কৰিলে দিল্লীৰ মুখ্যমন্ত্ৰীগৰাকীয়ে। ১ জুনলৈ এই ২০ দিন জামিনত থাকিব কেজৰিৱাল। পুনৰ ২ জুনত হাজিৰ হ’ব লাগিব ন্যায়ালয়ৰ মজিয়াত।
দেশৰ ৰাজধানী দিল্লীৰ মুখ্যমন্ত্রী অৰবিন্দ কেজৰিৱাল এমাহতকৈও অধিক সময় কাৰাগাৰত বন্দী হৈ আছিল৷ বৰ্তমান তেওঁ তিহাৰ কাৰাগাৰত কাৰাবন্দী হৈ আছিল। ইডিৰ গ্ৰেপ্তাৰৰ বৈধতাক আদালতত প্ৰত্যাহ্বান জনাইছিল অৰবিন্দ কেজৰিৱালে। বিচাৰ আদালত আৰু দিল্লী উচ্চ ন্যায়ালয়ৰ পৰা সকাহ নোপোৱাৰ পিছত উচ্চতম ন্যায়ালয়ত আবেদন দাখিল কৰিছিল। সেই আৱেদনৰেই আজি সকাহ লাভ।
উচ্চতম ন্যায়ালয়ত তেওঁৰ এই দাবীৰ শুনানি গ্ৰহণ কৰা হয়। মুখ্যমন্ত্ৰী অৰবিন্দ কেজৰিৱালৰ অন্তৱৰ্তীকালীন জামিন সন্দৰ্ভত আজি উচ্চতম ন্যায়ালয়ে এই ৰায় দিয়ে।
উল্লেখ্য যে, দিল্লী সুৰা কেলেংকাৰিৰ সৈতে জড়িত ধন সৰবৰাহৰ গোচৰত মুখ্যমন্ত্ৰী অৰবিন্দ কেজৰিৱালক গ্ৰেপ্তাৰ কৰা হৈছিল। ২১ মাৰ্চ তাৰিখে দিল্লীৰ মুখ্যমন্ত্ৰীগৰাকীক গ্ৰেপ্তাৰ কৰিছিল এনফোৰ্চমেন্ট ডিপাৰ্টমেন্টে( ED)। ইডিৰ দলটোৱে দিল্লীৰ মুখ্যমন্ত্ৰী কেজৰিৱালক বহু সময় ধৰি কৰা জেৰাৰ অন্তত জিম্মাত লৈছিল।
২১ মাৰ্চৰ পৰা কাৰাগাৰেই ঠিকনা হৈ পৰিছিল কেজৰিৱালৰ। কাৰাগাৰৰ পৰাই চলাই গৈছিল দিল্লীৰ শাসনভাৰ। অৱশেষত আজি জামিন লাভ কৰে। এতিয়া কেজৰিৱালে আপ দলৰ হৈ লোকসভা নিৰ্বাচনত প্ৰচাৰ চলাব পাৰিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
