অসম লাইভ২৪ঃ আৰম্ভ হৈছে চাৰধাম যাত্ৰা৷ যাত্ৰাৰ আৰম্ভণিৰ লগে লগেই দেখা গৈছে তীৰ্থযাত্ৰীৰ ব্যাপক ভীৰ৷ ভীৰৰ বাবেই বিগত ৫ দিনত চাৰধাম যাত্ৰাত গৈ মৃত্যুৰ মুখত পৰিছে ১১ জনকৈ লোক৷ ইয়াৰোপৰি প্ৰতিদিনেই তীৰ্থযাত্ৰাৰ উদ্দেশ্যে হাজাৰ হাজাৰ তীৰ্থযাত্ৰী উপস্থিত হৈছে উত্তৰাখণ্ডত৷
ভীৰ কমাবলৈকে ২ দিনৰ বাবে যাত্ৰাৰ ৰেজিষ্ট্ৰেছন বন্ধ কৰিবলৈ বাধ্য হৈছে উত্তৰাখণ্ড চৰকাৰ৷ চাৰধাম যাত্ৰাৰ উদ্দেশ্যে অফলাইন ৰেজিষ্ট্ৰেচন চলি আছে উত্তৰাখণ্ডৰ হৰিদ্বাৰ আৰু ঋষিকেশৰ পৰা৷ স্পষ্টভাৱে চৰকাৰৰ তৰফৰ পৰা জনোৱা হৈছে যে ভীৰ নিয়ন্ত্ৰণ কৰিবলৈকে এই পদক্ষেপ লৈছে প্ৰশাসনে৷
ইফালে ৰিপৰ্টত প্ৰকাশ পোৱা অনুসৰি ১৫ এপ্ৰিলৰ পৰা বৰ্তমান পৰ্যন্ত প্ৰায় ২৭ লাখ মানুহে ৪ধাম যাত্ৰাৰ বাবে আৱেদন কৰিছে৷ ইয়াৰ মাজতে ৫৯ হাজাৰৰো অধিক তীৰ্থযাত্ৰী উপস্থিত হৈছে যমুনাত্ৰীত, কেদাৰনাথত উপস্থিত হৈছে ডেৰলাখ তীৰ্থযাত্ৰী৷ বদ্ৰীনাথলৈ গৈছে ৪০ হাজাৰ তীৰ্থযাত্ৰী৷ ইয়াৰোপৰি গংগোত্ৰীলৈ যাত্ৰা কৰিছে ৫২হাজাৰ তীৰ্থযাত্ৰী৷
প্ৰশাসনৰ তৰফৰ পৰা জনোৱা অনুসৰি এই তীৰ্থযাত্ৰাত গৈ বিগত ৫ দিনৰ মৃত্যু হৈছে ১১ জন লোকৰ৷ বেছিভাগেই হৃদৰোগত আক্ৰান্ত হৈ মৃত্যু মুখত পৰিছে৷ তীৰ্থযাত্ৰীসকলৰ নিৰাপত্তাৰ সমস্ত ব্যৱস্থাই গঢ়ি তুলিছে উত্তৰাখণ্ড প্ৰশাসনে৷ মুকলি কৰি দিয়া হৈছে হেল্পলাইন নম্বৰ৷ সংশ্লিষ্ট ফোন নম্বৰসমূহ হৈছে ৯৮৭০৯৬৩৭৩১, ০১৩৬৪-২৯৭৮৭৮, ০১৩৬৪-২৯৭৮৭৯।
উল্লেখ্য যে শুকুৰবাৰে ভক্তৰ বাবে খুলি দিয়া হৈছে ৪ধামৰ অন্যতম ধাম যমুনাত্ৰীৰ দুৱাৰ৷ ইয়াৰপাছতেই শনিবাৰে ভাইৰেল হৈছে এটা ভিডিঅ৷ ভিডিঅ’টোত দেখা গৈছে যে হাজাৰ হাজাৰ মানুহ সৰু পাহাৰীয়া ৰাস্তাত ফঁচি আছে৷ ব্যাপক ভীৰৰ ছবি ভাইৰেল হোৱাৰ পাছতেই আৰম্ভ হৈছে আলোচনা৷ প্ৰশ্ন উঠিছে যাত্ৰীৰ নিৰাপত্তাক লৈয়ো৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
