প্ৰধানমন্ত্ৰী আৱাস যোজনাৰ অধীনত পকা ঘৰ তৈয়াৰৰ নামত একাউণ্টত সোমাইছিল ধন৷ প্ৰথম কিস্তিৰ টকা হাতলৈ অহাৰ লগে লগেই স্বামীক এৰি প্ৰেমিকৰ সৈতে পলায়ন কৰিলে মুঠ ১১ গৰাকী মহিলাই৷ পত্নীৰ বিৰুদ্ধে প্ৰতাৰণাৰ অভিযোগ তুলি থানাত গোচৰ ৰুজু কৰিছে ১১ জন স্বামীয়ে৷ এই ঘটনা উত্তৰপ্ৰদেশৰ মহাৰাজগঞ্জৰ৷
বিভিন্ন সংবাদমাধ্যমে প্ৰকাশ কৰা খবৰ অনুসৰি সম্প্ৰতি মহাৰাজগঞ্জ জিলাৰ ২৩৫০ জন ব্যক্তিয়ে প্ৰধানমন্ত্ৰী আৱাস যোজনাৰ অধীনত প্ৰথম কিস্তিৰ ধন লাভ কৰিছে৷ টকা লাভ কৰিছে থুটিবাৰী, শীতলাপুৰ, ৰামনগৰ, মেধৌলসহ কেইবাখনো গাওঁৰ লোকে৷ সকলোৱে প্ৰথম কিস্তিত ৪০ হাজাৰকৈ ধন লাভ কৰিছে৷
এই ধন লৈয়েই এতিয়া পলায়ন কৰিছে উত্তৰপ্ৰদেশৰ ১১ গৰাকী মহিলাই৷ ৰিপৰ্ট অনুসৰি প্ৰেমিকৰ সৈতে পলায়ন কৰিছে আটাইকেইগৰাকী মহিলাই৷ তাৰপিছতেই এতিয়া প্ৰধানমন্ত্ৰী আৱাস যোজনা প্ৰকল্পৰ পাচৰ কিস্তিসমূহ দিয়া বন্ধ কৰিছে প্ৰশাসনে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
