আজিৰে পৰা গ্ৰীষ্মকালীন অধিৱেশন, কাইলৈ ইতিহাস ৰচি বাজেট দাখিল কৰিব বিত্ত মন্ত্ৰীয়ে
আজিৰে ২২ জুলাইৰ পৰা আৰম্ভ হৈছে গ্ৰীষ্মকালীন অধিৱেশন, এই অধিৱেশনতেই সপ্তমবাৰৰ বাবে বাজেট দাখিল কৰিব বিত্তমন্ত্ৰী নিৰ্মলা সীতাৰমণে। কাইলৈ ২৩ জুলাই মঙলবাৰে সংসদত বিত্তমন্ত্ৰী নিৰ্মলা সীতাৰমণে দাখিল কৰিব সাধাৰণ বাজেট।
১২ আগষ্টলৈকে চলিব সংসদৰ এই অধিৱেশন। আজিৰ দিনৰ ১বজাত লোকসভাত কেন্দ্ৰীয় বিত্তমন্ত্ৰী গৰাকীয়ে দেশৰ আৰ্থিক সৰ্বেক্ষণ দাখিল কৰিব। দিনৰ ২বজাত ৰাজ্যসভাৰ মজিয়াতো বিত্তমন্ত্ৰীগৰাকীয়ে দেশৰ আৰ্থিক স্থিতিক লৈ প্ৰস্তুত কৰা এই প্ৰতিবেদন দাখিল কৰিব।
সংসদৰ ব্যৱসায়িক তালিকা অনুসৰি বিত্তমন্ত্রীয়ে লোকসভাত অৰ্থাৎ ১ বজাৰ ওচৰত আৰু ৰাজ্যসভাত ২ বজাত প্রশ্ন ঘন্টাৰ লগে লগে অর্থনৈতিক জৰীপ দাখিল কৰিব৷ অৰ্থাৎ বিয়লি ২ বজাত আনুষ্ঠানিকভাৱে ৰাজহুৱা কৰা হ’ব অৰ্থনৈতিক সমীক্ষা। ইয়াৰ পিছত বিয়লি ২:৩০ বজাত মুখ্য অৰ্থনৈতিক উপদেষ্টাৰ সংবাদমেল অনুষ্ঠিত হ’ব।
মঙলবাৰে একেৰাহে সপ্তমবাৰৰ বাবে সাধাৰণ বাজেট দাখিল কৰি ইতিহাস সৃষ্টি কৰিব বিত্তমন্ত্ৰী নিৰ্মলা সীতাৰমণে। একেৰাহে ছটা বাজেট দাখিল কৰাৰ মোৰাৰজী দেশাইৰ অভিলেখ ভংগ কৰি সপ্তমবাৰৰ বাবে বাজেট দাখিল কৰিব। মোৰাৰজী দেশাইয়ে ১৯৫৯ চনৰ পৰা ১৯৬৪ চনলৈ বিত্তমন্ত্ৰী হিচাপে কাৰ্যনিৰ্বাহ কৰি একেৰাহে ছখন বাজেট দাখিল কৰিছিল। ইয়াৰ ভিতৰত আছিল পাঁচটা সম্পূৰ্ণ আৰু এটা অন্তৱৰ্তীকালীন বাজেট। পূৰ্বৰ কিছুমান বাজেটৰ দৰে ২০২৪ চনৰ বাজেটতো কাগজবিহীন হ’ব। সাধাৰণ নিৰ্বাচনৰ বাবে চলিত বৰ্ষৰ ১ ফেব্ৰুৱাৰীত দাখিল কৰা হৈছিল অন্তৱৰ্তীকালীন বাজেট।
এই অধিৱেশনৰ সময়ত বিৰোধীয়েও ‘NEET’ কাগজ ফাদিল আৰু ৰে’ল নিৰাপত্তাৰ দৰে বিষয়ত চৰকাৰক কোণত ৰখাৰ প্ৰস্তুতি চলাইছে। কংগ্ৰেছৰ সাংসদ মণিকম ঠাকুৰে লোকসভাত স্থগিত ৰখাৰ প্ৰস্তাৱ দাখিল কৰি কাগজ ফাদিলৰ অভূতপূৰ্ব গোচৰ আৰু NEET-UG আৰু UGC NETকে ধৰি পৰীক্ষা অনুষ্ঠিত কৰাত ৰাষ্ট্ৰীয় পৰীক্ষণ সংস্থাৰ ব্যৰ্থতা সম্পৰ্কে আলোচনা কৰিব বিচাৰিছে। কংগ্ৰেছৰ সাংসদ মনীষ তেৱাৰীয়ে লোকসভাত স্থগিত ৰখাৰ প্ৰস্তাৱ আগবঢ়াইছিল, সীমান্তৰ পৰিস্থিতি আৰু চীনৰ সৈতে হোৱা বৃহৎ বাণিজ্যিক ঘাটিৰ বিষয়ে আলোচনা কৰিবলৈ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
