আৰজি কৰ হাস্পতালত তৰুণী চিকিৎসকক শেষ কৰা ঘটনাৰ পাছতেই মহিলাৰ নিৰাপত্তাক লৈ প্ৰশ্ন উঠিছে দেশজুৰি৷ কৰ্মক্ষেত্ৰত মহিলাসকলৰ নিৰাপত্তাৰ দাবীত দেশৰ বিভিন্ন হাস্পতালৰ চিকিৎসকৰ লগতে মহিলাসকল নামি পৰিছে প্ৰতিবাদত৷ জনতাৰ প্ৰতিবাদৰ ওচৰত সেও মানি অৱশেষত মহিলাৰ সুৰক্ষাৰ দিশত নজৰ দিবলৈ বাধ্য হৈছে পশ্চিমবংগ চৰকাৰ৷ নতুন এপ নিৰ্মাণৰ পৰা আৰম্ভ কৰি নিশাৰ লগৰী ভলণ্টিয়াৰ নিয়োগ, চৰকাৰী মেডিকেল কলেজ হাস্পতালসমূহত চিচিটিভি প্ৰতিসময়তে এক্টিভ ৰখাকে ধৰি কেইবাটাও সুৰক্ষা বলয় তৈয়াৰ কৰাৰ পদক্ষেপ গ্ৰহণ কৰিছে৷
পশ্চিমবংগৰ মুখ্যমন্ত্ৰী মমতা বেনাৰ্জীৰ মুখ্যউপদেষ্টা আলাপন বেনাৰ্জীয়ে শনিবাৰে এখন সংবাদমেল অনুষ্ঠিত কৰে৷ তাতেই চৰকাৰৰ তৰফৰ পৰা কৰ্মক্ষেত্ৰত মহিলাৰ নিৰাপত্তা বৃদ্ধি বিশেষকৈ নাৰী সুৰক্ষাৰ বাবে চৰকাৰী মেডিকেল কলেজ হাস্পতালসমূহত কি কি পদক্ষেপ লোৱা হৈছে সেই বিষয়ে ঘোষণা কৰিছে৷
কি কি পদক্ষেপ লৈছে চৰকাৰে?
১. সমস্ত চৰকাৰী মেডিকেল কলেজ, হাস্পতাল, হোষ্টেলসমূহত মহিলাৰ নিৰাপত্তাৰ স্বাৰ্থত টয়লেটসহ পৃথক ৰেষ্ট ৰুম নিৰ্মাণ কৰা হ’ব৷
২. চৰকাৰী মেডিকেল কলেজ, হাস্পতালসমূহত মহিলাৰ নিৰাপত্তাৰ স্বাৰ্থত নিশাৰ লগৰী মহিলা ভলণ্টিয়াৰ নিয়োগ কৰা হ’ব৷
৩. সৰ্বক্ষণৰ চিচিটিভি মনিটৰিঙৰ মাধ্যমেৰে মহিলাৰ বাবে ছেফ জ’ন থাকিব৷
৪. এটা মোবাইল এপ তৈয়াৰ কৰা হৈছে৷ সমস্ত চাকৰিয়াল মহিলাই এই এপ ব্যৱহাৰ কৰিব লাগিব৷ এই এপৰ সৈতে নিকটবৰ্তী থানাৰ সংযোগ থাকিব৷
৫. ১০০/১১২ হেল্পলাইন নম্বৰ ব্যৱহাৰ বঢ়োৱাত জোৰ দিয়া হ’ব৷
৬. সমস্ত মেডিকেল কলেজ, হাস্পতাল, জিলা হাস্পতাল চিকিউৰিটি চেক আৰু ব্ৰেথলাইজাৰ টেষ্ট ব্যৱস্থা থাকিব৷
৭. সমস্ত প্ৰতিষ্ঠানত মহিলাৰ ওপৰত শাৰীৰিক নিগ্ৰহ দূৰ কৰিবলৈ বিশাখা কমিটি তৈয়াৰ ৰখাত জোৰ দিয়া হৈছে৷
৮. চৰকাৰী প্ৰতিষ্ঠানত ওপৰিও বেচৰকাৰী প্ৰতিষ্ঠানসমূহতো এই চৰকাৰী চিষ্টেম অনুসৰণ কৰিব লাগিব৷
৯. কৰ্মক্ষেত্ৰত মহিলাই কাম কৰা বা মহিলা টিম হিচাপে কাম কৰাত গুৰুত্ব দিব লাগিব৷ যাতে এগৰাকীয়ে আনগৰাকীৰ গতিবিধিত নজৰ দিব পাৰে৷
১০. বেচৰকাৰী প্ৰতিষ্ঠানতও নিশাৰ লগৰী গ্ৰুপ ব্যৱহাৰ কৰাৰ অনুৰোধ জনাইছে৷
এইকেইটা নিৰ্দেশনাৰ ওপৰিও অন্য কেইবাটাও পদক্ষেপ গ্ৰহণ কৰিছে পশ্চিমবংগ চৰকাৰে৷ সমস্ত চৰকাৰী প্ৰতিষ্ঠান, হাস্পতাল, মেডিকেল কলেজ, হোষ্টেলত নাইট পেট্ৰলিং চলিব৷ সমস্ত হাস্পতাল, মেডিকেল কলেজ, জিলা হাস্পতালত চিকিউৰিটি ইনচাৰ্জ নিয়োগ কৰা হ’ব৷ মহিলা পুৰুষৰ সমান অনুপাতত নিৰাপত্তাৰক্ষী থাকিব সমস্ত হাস্পতালত৷ মহিলাসকলে কৰ্মক্ষেত্ৰত যাতে ১২ ঘণ্টাতকৈ বেছি সময় নিযুক্ত নাথাকে তাৰ ব্যৱস্থা কৰা হ’ব৷ আনকি সুযোগ থাকিলে মহিলাক নাইট ডিউটিত নাৰাখিব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
