মাত্ৰ ৪৮ বছৰ বয়সতে প্ৰাণ হেৰুৱালে টিভি জগতৰ এইগৰাকী জনপ্ৰিয় অভিনেতাই
টিভি উদ্যোগৰ পৰা আহিছে এক দুখজনক খবৰ। অকালতে মৃত্যু অভিনেতা বিকাশ ছেঠীৰ। ৪৮ বছৰ বয়সত এই পৃথিৱীৰ পৰা চিৰবিদায় মাগে অভিনেতাগৰাকীয়ে। অভিনেতাগৰাকীৰ পত্নী জাহ্নৱী ছেঠীয়ে সদৰি কৰে এই খবৰ।
হৃদযন্ত্ৰ বন্ধ হোৱাৰ বাবে মৃত্যু হয় বিকাশ ছেঠীৰ। ছচিয়েল মিডিয়া যোগে অনুৰাগীয়ে বিকাশক শ্ৰদ্ধাঞ্জলি জনায়। কালি ৭ ছেপ্টেম্বৰৰ নিশা মৃত্যু হয় অভিনেতাগৰাকীৰ।
বিকাশে বহু ধাৰাবাহিকত কাম কৰিছিল। ‘কিউকি শাশ ভি কভি বহু থি’, ‘কাহী তো হোগা’ আৰু ‘কসৌতি জিন্দাগী কি’ আদি শ্ব’ত কাম কৰিছিল। তেওঁ ‘কসৌতি জিন্দগী কি’ ছবিখনত প্ৰেম বসুৰ চৰিত্ৰত অভিনয় কৰিছিল। ইয়াৰ উপৰিও অভিনেতাগৰাকীয়ে নৃত্য অনুষ্ঠান নাচ বালিয়েৰ তৃতীয় ছিজনতো অংশগ্ৰহণ কৰিছিল।
ধাৰাবাহিকৰ উপৰিও ‘কভি খুশী কভি গম’ চিনেমাতো কাম কৰিছিল বিকাশ ছেঠীয়ে। সেই চিনেমাখনত কাম কৰিছিল হৃতিক ৰোশন, অমিতাভ বচ্চন, শ্বাহৰুখ খান, কাজল, কৰীনা কাপুৰে।
মৃত্যুৰ সময়ত বিকাশ ছেঠীয়ে পত্নী জাহ্নৱী ছেঠী আৰু দুটা যমজ সন্তানক এৰি যায়। জাহ্নৱী আৰু বিকাশৰ বিয়া হৈছিল ২০১৮ চনত। সামাজিক মাধ্যমত বৰ বেছি সক্ৰিয় নাছিল অভিনেতাগৰাকী। বিকাশে চলিত বৰ্ষৰ মে’ মাহত ইনষ্টাত শেষ পোষ্টটো দিছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
