বিহাৰ চৰকাৰে চুন্নী আৰু ছিয়া ৱাকফ ব’ৰ্ডৰ অধীনত পঞ্জীয়নভুক্ত সম্পত্তিৰ উন্নয়নৰ বাবে বহুমুখী অট্টালিকা, বিবাহ ভৱন, বজাৰ কমপ্লেক্স আৰু অন্যান্য আন্তঃগাঁথনি নিৰ্মাণৰ প্ৰস্তুতি চলাইছে। এই কথা ঘোষণা কৰি সংখ্যালঘু কল্যাণ মন্ত্ৰী জামা খানে কয় যে চৰকাৰে ৰাজ্যৰ বিভিন্ন প্ৰান্তত ২১খন নতুন মাদ্ৰাছা স্থাপনৰ সিদ্ধান্ত লোৱা হৈছে। খানে কয়, ‘২০২৩-২৪ চনত পাটনা, পূৰ্ণিয়া, কাইমুৰ, কাটিহাৰ, কিছানগঞ্জ, নৱাদা আৰু ছিৱানত বহুমুখী অট্টালিকা, বজাৰ কমপ্লেক্স আৰু পুথিভঁৰাল নিৰ্মাণৰ বাবে দহটা প্ৰকল্প প্ৰস্তাৱ কৰা হৈছিল। এই প্ৰকল্পসমূহৰ বাবে ১০৫.১৩ কোটি টকাৰ ধনৰ প্ৰস্তাৱ দিয়া হৈছিল।’
তেওঁ লগতে কয় যে, ২০২৪-২৫ চনত ছিৱান আৰু ভাগলপুৰ জিলাত বহুমুখী ভৱন, অতিথিশালা, বিবাহ ভৱন, ৱাকফ কাৰ্যালয় ভৱন আৰু বজাৰ কমপ্লেক্স নিৰ্মাণ কৰা হ’ব। এই কাম বিহাৰ ৰাজ্যিক ৱাকফ উন্নয়ন আঁচনিৰ অধীনত কৰা হৈছে। ইয়াৰ উপৰিও বি আৰ এম এছ ৱাইৰ অধীনত ৰাজ্য চৰকাৰে ৰাজ্যৰ বিভিন্ন প্ৰান্তত ২১খন নতুন মাদ্ৰাছা নিৰ্মাণৰ সিদ্ধান্ত গ্ৰহণ কৰিছে। শেহতীয়াকৈ ৰাজ্যত দহখন মাদ্ৰাছা নিৰ্মাণৰ কাম সম্পূৰ্ণ হৈছে। বি আৰ এম এছ ৱাইৰ অধীনত মাদ্ৰাছাৰ আন্তঃগাঁথনি আৰু শিক্ষা ব্যৱস্থা শক্তিশালী কৰাৰ সমান্তৰালকৈ খোৱাপানী, পুথিভঁৰাল, শৌচাগাৰ, কম্পিউটাৰ বিজ্ঞান লেব আদিৰ দৰে সা-সুবিধা প্ৰদান কৰা হয়। এই আঁচনি ২০১৮-১৯ বৰ্ষৰ পৰা আৰম্ভ কৰা হৈছিল। যোৱা বছৰ পূৰ্ণিয়াত দুখন আৰু নালন্দা আৰু পূৱ চম্পাৰণত এখনকৈ মাদ্ৰাছাৰ বাবে ৩২.৩৯ কোটি টকাৰ প্ৰশাসনিক অনুমোদন দিয়া হৈছিল।
কেন্দ্ৰীয় চৰকাৰে লোকসভাত উত্থাপন কৰি জেপিচিলৈ প্ৰেৰণ কৰা ৱাকফ সংশোধনী বিধেয়ক-২০২৪ সন্দৰ্ভত সোধাত মন্ত্ৰীগৰাকীয়ে কয় যে বিহাৰৰ মুখ্যমন্ত্ৰী নীতিশ কুমাৰে ৰাজ্যখনৰ সংখ্যালঘু জনগোষ্ঠীৰ আৱেগ আৰু কল্যাণৰ প্ৰতি গুৰুত্বপূৰ্ণ, যি সিদ্ধান্ত লোৱা হ’ব সেয়া নিশ্চিতভাৱে সমাজৰ স্বাৰ্থত হ’ব। ৰাজ্যখনৰ ৱাকফৰ সম্পত্তিৰ নিৰাপত্তাৰ প্ৰতি ৰাজ্য চৰকাৰ চিন্তিত বুলি তেওঁ আশ্বাস দিয়ে। এনে সম্পত্তিত যাতে কোনো ধৰণৰ বেদখল নহয় তাৰ প্ৰতি লক্ষ্য ৰাখিব চৰকাৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
