১৩ নে ১৫ বছৰীয়া বৈভৱ সূৰ্যবংশী ? নিজৰেই এক সাক্ষাৎকাৰত বেয়াকৈ আৱদ্ধ
ইণ্ডিয়ান প্ৰিমিয়াৰ লীগ ২০২৫ৰ মেগা নিলামৰ অন্তত বৰ্তমানে সকলোফালে চৰ্চিত এগৰাকী কম বয়সীয়া খেলুৱৈ। ৰাজস্থান ৰয়েলছ দলৰ অন্তৰ্ভুক্ত হোৱা খেলুৱৈগৰাকীৰ বয়সৰ বাবে সকলোফালে চৰ্চিত।
সেই খেলুৱৈগৰাকী হৈছে ১৩ বছৰীয়া বৈভৱ সূৰ্য্যবংশী। যাক ১ কোটি ১০ লাখ টকাত ক্ৰয় কৰে ৰাজস্থান ৰয়েলছে। পাছে ১৩ বছৰীয়া বুলি কোৱা এইগৰাকী খেলুৱৈক লৈ যেন এক বিতৰ্কৰ সৃষ্টি হৈছে। আনকি বয়সৰ জালিয়াতিৰ অভিযোগো উত্থাপন হৈছে।
বিষয়টো যথেষ্ট গুৰুতৰ, কাৰণ বৈভৱে নিজেই এটা সাক্ষাৎকাৰত নিজৰ বয়সৰ কথা কৈছিল, সেই অনুসৰি বৰ্তমান সময়ত বৈভৱৰ বয়স ১৫ বছৰ হ’ব।
বিহাৰৰ সমস্তীপুৰৰ ১৩ বছৰীয়া বৈভৱ সূৰ্যবংশী আই পি এলৰ নিলামত আটাইতকৈ কম বয়সীয়া খেলুৱৈ হোৱাৰ পিছৰে পৰা বাতৰিৰ শিৰোনাম দখল কৰিছিল। ৰাজস্থান ৰয়েলছে মেগা নিলামত ক্ৰয় কৰাৰ পিছত তেওঁক ধাৰাবাহিকভাৱে চৰ্চা চলি আছে।
৩০ লাখ টকাৰ বেচ প্ৰাইজেৰে নিলামত নমা এই যুৱ বেটছমেনক ৰাজস্থানে ১ কোটি দহ লাখ টকাৰ নিবিদা দি নিজৰ দলত অন্তৰ্ভুক্ত কৰিছে। দিল্লী কেপিটেলছেও এই খেলুৱৈগৰাকীক নিজৰ দলত ল’বলৈ নিবিদা দিছিল।
পাছে এতিয়া বিতৰ্ক অনুসৰি, বৈভৱ সূৰ্য্যবংশীয়ে চলিত বৰ্ষৰ জানুৱাৰী মাহত ৰঞ্জী ট্ৰফীত খেলিছিল আৰু তাৰ পিছত তেওঁৰ বয়সক লৈ বিতৰ্কৰ সৃষ্টি হৈছিল। যোৱা বছৰৰ তেওঁৰ পুৰণি ভিডিঅ’টো ওলাইছিল য’ত বৈভৱে ২০২৩ চনৰ ছেপ্টেম্বৰ মাহত ১৪ বছৰ সম্পূৰ্ণ হ’ব বুলি কোৱা শুনা গৈছিল। তেতিয়াৰ পৰাই তেওঁৰ বয়সক লৈ বিতৰ্কৰ সৃষ্টি হৈছে। বয়সৰ জালিয়াতি সন্দৰ্ভত বৈভৱৰ পিতৃ সঞ্জীৱ সূৰ্য্যবংশীয়ে স্পষ্টীকৰণ দিছিল।
তথ্য অনুসৰি সঞ্জীৱে কয়, ‘ ৮ বছৰ বয়সৰ পৰাই বৈভৱৰ হাড়ৰ পৰীক্ষা চলি আহিছে। ভাৰতৰ ১৯ বছৰ অনুৰ্ধ দলতো বৈভৱৰ অভিষেক ঘটিছে। বয়সৰ কথা চলি থকা কথাবোৰলৈ আমাৰ ভয় নাই। প্ৰয়োজন হ’লে পুনৰ বয়স পৰীক্ষা কৰিবলৈ বৈভৱ সাজু।” উল্লেখ্য যে যিকোনো খেলুৱৈৰ প্ৰকৃত বয়স হাড় পৰীক্ষাৰ জৰিয়তে নিৰ্ণয় কৰা হয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
