২৫ বছৰ পূৰ্বে দিল্লীৰ এই বিলাসী হোটেলতেই দাৰোৱানৰ কাম কৰিছিল পিতৃয়ে৷ তাতেই তেওঁক আকৌ উভতাই আনিলে পুত্ৰই৷ এইবাৰ অৱশ্যে দাৰোৱান হিচাপে নহয়৷ অভিজাত সেই হোটেলৰ অতিথি হিচাপে পুত্ৰৰ সৈতে বিশেষ হোটেলখনত প্ৰৱেশ কৰিলে বৃদ্ধ পিতৃয়ে৷ লগতে আছিল বৃদ্ধগৰাকীৰ পত্নীও৷
দিল্লীৰ বাসিন্দা আৰিয়ান মিশ্ৰ নামৰ এজন যুৱকে সম্প্ৰতি পিতৃ মাতৃৰ সৈতে নিজৰ ছবি দি সামাজিকমাধ্যমত এটা পষ্ট শ্বেয়াৰ কৰিছে৷ সেই প’ষ্টতেই তেওঁ জনাই যে, যি অভিজাত হোটেলত বহি তেওঁলোকে খাদ্যগ্ৰহণ কৰিছে সেই হোটেলতেই ১৯৯৫ৰ পৰা ২০০০ চন পৰ্যন্ত তাত দাৰোৱানৰ কাম কৰিছিল তেঁওৰ পিতৃয়ে৷
আৰিয়ানৰ ইচ্ছা আছিল, এদিন ইয়াতেই নিজ পিতৃক খোৱাবলৈ আনিব তেওঁ৷ আৰিয়ানে সেই সন্দৰ্ভত লিখিছে, ‘মোৰ দেউতাই নতুন দিল্লীৰ আই টি ছি হোটেলত ১৯৯৫ চনৰ পৰা ২০০০ চন পৰ্যন্ত দাৰোৱানৰ কাম কৰিছিল৷ আজি এই হোটেলতেই তেওঁক নৈশভোজ কৰোৱাবলৈ সুযোগ পাইছো৷’
সামাজিক মাধ্যমত আৰিয়ান মিশ্ৰই কৰা এই পোষ্ট দেখাৰ পাছত স্বাভাৱিকভাৱেই আপ্লুত বহু মানুহ৷ পিতৃ মাতৃক এই দিনটো উপহাৰ দিয়াৰ বাবে আৰিয়ানক বহুজনেই প্ৰশংসা কৰিছে৷ আৰিয়ানে জনাইছে যে তেওঁ এগৰাকী জ্যোতিৰ্বিজ্ঞানী৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
