মানুহ কৌতুহলী জীৱ৷ এই পৃথিৱীত মানুহৰ কৌতূহলৰ শেষ নাই৷ মানুহৰ কৌতূহল এটা বিষয়ক লৈ সকলোতকৈ বেছি, সেয়া হৈছে, কেতিয়া ধ্বংস হ’ব পৃথিৱী? আকৌ আহিছে পৃথিৱী ধ্বংসৰ খবৰ! নাছাই এটা গ্ৰহাণু চিনাক্ত কৰিছে যিয়ে ২২ ডিচেম্বৰ ২০৩২ত পৃথিৱীত আঘাত কৰাৰ সম্ভাৱনা ৩.১ শতাংশ৷ বিশেষজ্ঞই আশ্বস্ত কৰিছে যে আতংকৰ কোনো কাৰণ নাই, কাৰণ বিশ্বব্যাপী মহাকাশ সংস্থাসমূহে এই বিশেষ গ্ৰহাণুটোৰ গতিবিধি পৰ্যবেক্ষণ কৰি আছে৷
২০২৪ YR4 নামৰ গ্ৰহাণুটো প্ৰথমে ২৭ ডিচেম্বৰ, ২০২৩ তাৰিখে চিলিৰ এল চছ অৱজাৰভেটৰিৰ দ্বাৰা চিনাক্ত কৰা হৈছিল৷ নাছাৰ অনুমান যে ইয়াৰ আকাৰ ১৩০ৰ পৰা ৩০০ ফুট প্ৰস্থৰ মাজত৷ যদিও ইয়াৰ গঠন স্বাভাৱিক বুলি ধাৰণা কৰা হৈছে তথাপিও বেগ প্ৰতি ঘণ্টাত প্ৰায় ৪০,০০০ মাইল৷ পৃথিৱীৰ বায়ুমণ্ডলত প্ৰৱেশ কৰিলে এই গ্ৰহাণুটো ধ্বংসৰ কাৰণ হৈ উঠিব পাৰে৷
গৱেষণা অনুসৰি ৱাই আৰ ৪ৰ ৰিস্ক, দক্ষিণ আমেৰিকাৰ পৰা আৰম্ভ কৰি প্ৰশান্ত মহাসাগৰ, দক্ষিণ এছিয়া, আৰৱ সাগৰ আৰু আফ্ৰিকা জুৰি প্ৰসাৰিত৷ ভাৰত, পাকিস্তান, বাংলাদেশ, ভেনিজুৱেলা, কলম্বিয়া, ইকুয়েডৰ, ইথিওপিয়া, ছুডান আৰু নাইজেৰিয়াত ইয়াৰ প্ৰভাৱ পৰিব পাৰে৷
বিজ্ঞানীয়ে জনাইছে যে ৯৭ শতাংশ সম্ভাৱনা আছে যে এই গ্ৰহাণুৱে পৃথিৱীৰ কাষেৰে নিৰাপদে পাৰ হৈ যাব৷ তেতিয়া ৩শতাংশহে পৃথিৱীৰ লোকচান হ’ব৷ বিজ্ঞানী ব্ৰুছ বেটছে উল্লেখ কৰিছে যে এয়া প্ৰায় ৮ মেগাটন TNT শক্তি লৈ মাজ আকাশত বিস্ফোৰিত হ’ব পাৰে৷ ইয়াৰ শক্তি হিৰোছিমা বোমাতকৈ ৫০০গুণ বেছি৷ নাছাৰ জেমছ ৱেব স্পেছ টেলিস্কোপে ২০২৪ৰ মাৰ্চ মাহৰ পৰাই ইয়াৰ ওপৰত পৰ্যবেক্ষণ কৰি আছে৷ কাৰণ গ্ৰহাণুটো বৰ্তমান বৃহস্পতিৰ দিশে গতি কৰিছে৷ যি ২০২৮লৈকে কোনো কাৰণতে পৃথিৱীৰ কাষলৈ নাহে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
