বৈৱাহিক ধ*ৰ্ষণক অপৰাধ হিচাপে গণ্য কৰা হ’ব নে নহয়, এই গুৰুত্বপূৰ্ণ বিষয়ত উচ্চতম ন্যায়ালয়ে শুনানি গ্ৰহণ কৰিছে। শুনানিৰ সময়ত আদালতে এক গুৰুত্বপূৰ্ণ প্ৰশ্ন উত্থাপন কৰে—বিৱাহৰ পাছত এগৰাকী মহিলাৰ ব্যক্তিগত স্বাধীনতা শেষ হৈ যায় নেকি? বৈৱাহিক ধ*ৰ্ষণক অপৰাধৰ আওতালৈ অনাৰ দাবীত দাখিল হোৱা কেইবাটাও আবেদনৰ শুনানি উচ্চতম ন্যায়ালয়ত চলি আছে। এই গোচৰসমূহৰ ভিতৰত তিনিটা গোচৰত জ্যেষ্ঠ অধিবক্তা কৰুণা নুণ্ডীয়ে আদালতৰ সন্মুখত যুক্তি আগবঢ়ায়।
কৰুণা নুণ্ডীয়ে আদালতক জনায় যে বৈৱাহিক ধ*ৰ্ষণ সম্পৰ্কীয় গোচৰসমূহৰ এখন তালিকা প্ৰস্তুত কৰা হৈছে আৰু তেওঁ তিনিটা গোচৰত পক্ষৰ হৈ হাজিৰ হৈছে। ইয়াৰে এটা গোচৰক মূল বিষয় হিচাপে গণ্য কৰা হৈছিল। ইয়াৰ পাছতে জ্যেষ্ঠ অধিবক্তা গোপাল শংকৰানাৰায়ণনে এটা বিশেষ গোচৰৰ কথা উল্লেখ কৰে। তেওঁৰ মতে, এই গোচৰটো আন গোচৰসমূহৰ পৰা কিছু পৃথক। কাৰণ, ইয়াত ইতিমধ্যে এখন FIR দাখিল কৰা হৈছে আৰু সেই FIR বাতিল কৰাৰ বাবে আবেদন কৰা হৈছে। আনহাতে, আন গোচৰসমূহ মূলতঃ বৈৱাহিক ধ*ৰ্ষণ সম্পৰ্কীয় আইনৰ বৈধতা আৰু সাংবিধানিক প্ৰশ্নৰ সৈতে জড়িত। সেয়েহে বিশেষ গোচৰটো প্ৰথমে পৃথকভাৱে বিবেচনা কৰাটো উচিত বুলি তেওঁ আদালতৰ সন্মুখত মত প্ৰকাশ কৰে।
শুনানিৰ সময়ত উচ্চতম ন্যায়ালয়ে স্পষ্ট কৰে যে বিৱাহে এগৰাকী মহিলাৰ ব্যক্তিগত স্বাধীনতা শেষ কৰি নিদিয়ে। কিন্তু বৈৱাহিক ধৰ্ষণক অপৰাধ হিচাপে গণ্য কৰি গোচৰ চলাব পাৰিব নে নাই, সেই বিষয়ত আদালতে বৰ্তমানৰ আইনী ব্যৱস্থাসমূহো পৰীক্ষা কৰিব লাগিব। ন্যায়াধীশ সূৰ্যকান্তৰ নেতৃত্বত গঠিত বিচাৰপীঠে বিষয়টোৰ চূড়ান্ত শুনানি আগন্তুক সময়ত বুধবাৰ আৰু বৃহস্পতিবাৰে গ্ৰহণ কৰাৰ বাবে তালিকাভুক্ত কৰাৰ নিৰ্দেশ দিছে।
উচ্চতম ন্যায়ালয়ে এই গোচৰত মূলতঃ দুটা গুৰুত্বপূৰ্ণ বিষয় পৰীক্ষা কৰিব। প্ৰথমতে, বৰ্তমানৰ আইনী ব্যতিক্ৰমসমূহ বাহাল থকাৰ সময়ত বৈৱাহিক ধ*ৰ্ষণৰ অভিযোগত কোনো ব্যক্তিৰ বিৰুদ্ধে গোচৰ চলাব পাৰি নে নাই। দ্বিতীয়তে, বৈৱাহিক ধৰ্ষণৰ ক্ষেত্ৰত থকা সেই আইনী ব্যতিক্ৰমসমূহ নিজেই সংবিধানসন্মত নে নহয়। আদালতে লগতে এই কথাও পৰীক্ষা কৰিব যে কোনো কামক আইনে অপৰাধৰ সংজ্ঞাৰ পৰা স্পষ্টভাৱে বাদ দিলে, ন্যায়িক ব্যাখ্যাৰ জৰিয়তে সেই কামক পুনৰ অপৰাধৰ আওতালৈ আনিব পাৰি নে নাই। ন্যায়াধীশ জয়মল্য বাগচিয়েও শুনানিৰ সময়ত গুৰুত্বপূৰ্ণ প্ৰশ্ন উত্থাপন কৰে। তেওঁৰ মতে, যেতিয়া কোনো অপৰাধক আইনে নিৰ্দিষ্টভাৱে সংজ্ঞায়িত কৰিছে, তেনে ক্ষেত্ৰত এজন ব্যক্তিৰ কোনো আচৰণৰ বাবে তেওঁক কেনেদৰে শাস্তি দিয়া হ’ব, সেই বিষয়টোও বিবেচনা কৰিব লাগিব।
ইপিনে, বৈৱাহিক ধ*ৰ্ষণক অপৰাধ হিচাপে গণ্য কৰাৰ দাবীৰ কেন্দ্ৰীয় চৰকাৰে তীব্ৰ বিৰোধিতা কৰিছে। উচ্চতম ন্যায়ালয়ত দাখিল কৰা ৪৯ পৃষ্ঠাৰ শপতনামাত কেন্দ্ৰই নিজৰ স্থিতি স্পষ্ট কৰিছে। চৰকাৰৰ মতে, ভাৰতত বৈৱাহিক ধ*ৰ্ষণক পৃথক অপৰাধ হিচাপে গণ্য কৰাৰ প্ৰয়োজন নাই। অৱশ্যে চৰকাৰে এই কথাও স্বীকাৰ কৰিছে যে কোনো স্বামীৰে পত্নীৰ সন্মতি উলংঘা কৰাৰ অধিকাৰ নাই। কিন্তু কেন্দ্ৰীয় চৰকাৰৰ যুক্তি হৈছে, এনে আচৰণক আইনগতভাৱে ‘ধৰ্ষণ’ হিচাপে সংজ্ঞায়িত কৰি অপৰাধ হিচাপে গণ্য কৰাটো বিৱাহ নামৰ সামাজিক প্ৰতিষ্ঠানৰ প্ৰতি অত্যধিক কঠোৰ আৰু অসামঞ্জস্যপূৰ্ণ ব্যৱস্থা হ’ব পাৰে।
এতিয়া মূল প্ৰশ্ন হৈছে—বিবাহৰ সম্পৰ্কৰ ভিতৰতো এগৰাকী মহিলাৰ সন্মতি আৰু ব্যক্তিগত স্বাধীনতাৰ সম্পূৰ্ণ আইনী সুৰক্ষা থাকিব লাগে নে নাই? এই গুৰুত্বপূৰ্ণ সাংবিধানিক আৰু আইনী প্ৰশ্নৰ ওপৰত উচ্চতম ন্যায়ালয়ৰ আগন্তুক শুনানিৰ ফলাফলৰ ওপৰত এতিয়া সকলোৰে দৃষ্টি নিবদ্ধ হৈ আছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
