এগৰাকী ছ’চিয়েল মিডিয়া মহিলা ইনফ্লুৱেন্সাৰে সশস্ত্ৰ সীমা বল (SSB)ৰ এজন সহকাৰী উপ-পৰিদৰ্শক (ASI) আৰু তেওঁৰ এজন সহযোগীৰ বিৰুদ্ধে গুৰুতৰ অভিযোগ উত্থাপন কৰিছে। মহিলাগৰাকীৰ অভিযোগ অনুসৰি, ছ’চিয়েল মিডিয়াত তেওঁৰ জনপ্ৰিয়তা বৃদ্ধি আৰু ফ’ল’ৱাৰ বঢ়াই দিয়াৰ প্ৰতিশ্ৰুতি দি তেওঁক মাতি অনা হৈছিল। মহিলাগৰাকীয়ে অভিযোগ কৰিছে যে ২০২৫ চনৰ ৭ ডিচেম্বৰত তেওঁক মাতি অনাৰ পিছত এখন হোটেলত তেওঁক ধ*ৰ্ষণ কৰে। এই ঘটনাৰ ভিডিঅ’ ৰেকৰ্ডিং কৰি পিছত সেই ভিডিঅ’ ভাইৰেল কৰাৰ ভাবুকি দি তেওঁক ব্লেকমেইল কৰা হয় বুলিও অভিযোগ কৰিছে মহিলাগৰাকীয়ে। এই ঘটনা সংঘটিত হৈছে বিহাৰৰ মুজাফ্ফৰপুৰত।
দিল্লী নিবাসী মহিলা ইনফ্লুৱেন্সাৰগৰাকীৰ অভিযোগ অনুসৰি, SSBৰ যোগাযোগ শাখাত কৰ্মৰত এজন ASI-এ ছ’চিয়েল মিডিয়াৰ জৰিয়তে তেওঁৰ সৈতে যোগাযোগ কৰিছিল। ASIজনে তেওঁক ছ’চিয়েল মিডিয়াত জনপ্ৰিয় কৰি তোলা আৰু ফ’ল’ৱাৰ বৃদ্ধি কৰাৰ প্ৰতিশ্ৰুতি দিছিল বুলি মহিলাগৰাকীয়ে অভিযোগ কৰিছে। এই প্ৰতিশ্ৰুতিৰ পিছতে ২০২৫ চনৰ ৭ ডিচেম্বৰত তেওঁক মুজাফ্ফৰপুৰলৈ আহিবলৈ কোৱা হয়। মহিলাগৰাকী তেওঁৰ দুবছৰীয়া সন্তানৰ সৈতে দিল্লীৰ পৰা মুজাফ্ফৰপুৰলৈ আহিছিল।
মহিলাগৰাকীৰ অভিযোগ অনুসৰি, মুজাফ্ফৰপুৰৰ ষ্টেচন ৰোডৰ এখন হোটেলত তেওঁৰ বাবে এটা কোঠা বুকিং কৰা হৈছিল। তাত ASIজনৰ এজন সহকৰ্মীয়ে তেওঁক ধৰ্ষণ কৰে বুলি অভিযোগ উত্থাপন কৰিছে। কেৱল সেয়াই নহয়, ঘটনাটোৰ ভিডিঅ’ও ৰেকৰ্ড কৰা হৈছিল বুলি মহিলাগৰাকীয়ে অভিযোগ কৰিছে। তেওঁ প্ৰতিবাদ কৰাৰ সময়ত অভিযুক্তই তেওঁৰ দুবছৰীয়া সন্তানক ক্ষতি কৰাৰ ভাবুকি দিছিল বুলিও অভিযোগ কৰিছে। সন্তানৰ সুৰক্ষাক লৈ আশংকা হোৱাৰ বাবে তেওঁ সেই সময়ত অধিক প্ৰতিবাদ কৰিব পৰা নাছিল বুলি মহিলাগৰাকীয়ে জানিবলৈ দিছে। ঘটনাৰ পিছদিনাই তেওঁ সন্তানক লৈ দিল্লীলৈ উভতি যায়।
মহিলাগৰাকীৰ অভিযোগ অনুসৰি, দিল্লীলৈ উভতি যোৱাৰ পিছতো সমস্যাৰ অন্ত পৰা নাছিল। অভিযুক্তই হোটেলৰ ঘটনাৰ ভিডিঅ’ ছ’চিয়েল মিডিয়াত ভাইৰেল কৰি দিয়াৰ ভাবুকি দি তেওঁক ব্লেকমেইল কৰিবলৈ আৰম্ভ কৰে বুলি অভিযোগ কৰা হৈছে। ভিডিঅ’ ৰাজহুৱা নকৰাৰ বিনিময়ত তেওঁৰ পৰা ২০ হাজাৰ টকা আদায় কৰা হৈছিল বুলিও মহিলাগৰাকীয়ে অভিযোগ কৰিছে। পৰৱৰ্তী সময়ত অভিযুক্তৰ দাবী আৰু হেঁচা বৃদ্ধি পোৱাত তেওঁ স্বামীক সমগ্ৰ ঘটনা অৱগত কৰে। ইয়াৰ পিছতে তেওঁ আইনী ব্যৱস্থা গ্ৰহণ কৰাৰ সিদ্ধান্ত লয়।
মহিলাগৰাকীয়ে প্ৰথমে SSBৰ মুখ্য কাৰ্যালয়ত অনলাইন অভিযোগ দাখিল কৰা বুলি জানিবলৈ দিছে। ইয়াৰ পিছত ৭ ছেপ্টেম্বৰত মুজাফ্ফৰপুৰ খণ্ডৰ মুখ্য কাৰ্যালয়লৈ তেওঁক বক্তব্য লিপিবদ্ধ কৰাৰ বাবে মাতি অনা হয়। কিন্তু মহিলাগৰাকীৰ অভিযোগ, অভিযোগ প্ৰত্যাহাৰ কৰিবলৈ আৰু পূৰ্বৰ বক্তব্য সলনি কৰিবলৈ তেওঁক হেঁচা দিয়া হৈছিল। অনলাইন অভিযোগতো তেওঁ এই দাবী উত্থাপন কৰিছে।
ইফালে, মুজাফ্ফৰপুৰৰ নগৰ আৰক্ষী থানাই মহিলাগৰাকীৰ অনলাইন অভিযোগ লাভ কৰাৰ কথা নিশ্চিত কৰিছে। আৰক্ষীয়ে জনোৱা অনুসৰি, অভিযোগত উত্থাপিত প্ৰতিটো বিষয় তদন্ত কৰা হ’ব। আৰক্ষীৰ মতে, তদন্তৰ সময়ত অভিযোগসমূহ সত্য বুলি প্ৰমাণিত হ’লে FIR পঞ্জীয়ন কৰাৰ লগতে অভিযুক্তসকলৰ বিৰুদ্ধে আইন অনুসৰি পৰৱৰ্তী ব্যৱস্থা গ্ৰহণ কৰা হ’ব। উল্লেখ্য যে, বৰ্তমান এই ঘটনাৰ অভিযোগসমূহৰ তদন্ত চলি আছে। অভিযোগ প্ৰমাণিত নোহোৱালৈকে অভিযুক্তসকলক দোষী বুলি গণ্য কৰিব নোৱাৰি।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
