সম্পত্তিৰ বাবেই জন্মদাত্ৰীৰ ওপৰত অমানবিকতা কন্যাৰ, ভিডিঅ’ দেখি শিয়ৰি উঠিব আপুনি
হাৰিয়ানাৰ হিছাৰৰ পৰা পোহৰলৈ আহিছে এক হৃদয় বিদাৰক ভিডিঅ’, য’ত এগৰাকী বৃদ্ধ মাতৃৰ ওপৰত অকথ্য নিৰ্যাতন চলাইছে কন্যাই। মাতৃৰ ওপৰত কৰা অত্যাচাৰৰ ভিডিঅ’ এতিয়া ছ’চিয়েল মিডিয়াত ভাইৰেল হৈ পৰিছে।
য’ত এগৰাকী কন্যাই জন্মদাত্ৰী মাতৃক চৰ মাৰিছে, দাঁতেৰে কামুৰিছে আৰু বৃদ্ধাগৰাকীৰ চুলি টানিছে। মাৰপিট কৰাৰ উপৰিও কন্যাই কৈছে, মই তোৰ তেজ খাই পেলাম।
ভিডিঅ’ ভাইৰেল হোৱাৰ পিছতে মাতৃৰ ওপৰত অত্যাচাৰ চলোৱা মহিলাগৰাকীৰ ভাতৃয়ে আৰক্ষীৰ কাষ চাপি এজাহাৰ দাখিল কৰিছে, য’ত লিখিছে যে তেওঁৰ মাতৃক পণবন্দী কৰি ৰাখিছে বিবাহিত ভগ্নীয়ে। ইয়াৰ মূলতে কেৱল সম্পত্তি। সম্পত্তি হস্তান্তৰ কৰিবলৈ মানসিক আৰু শাৰীৰিকভাৱে হাৰাশাস্তি কৰিছে মাতৃৰ ওপৰত।
দাখিল কৰা এজাহাৰৰ ভিত্তিত আৰক্ষীয়ে অভিযুক্ত মহিলাগৰাকীৰ বিৰুদ্ধে গোচৰ ৰুজু কৰিছে। তিনি মিনিটৰ এই ভিডিঅ’টো হিছাৰৰ আজাদ নগৰৰ বুলি জানিব পৰা গৈছে। অভিযুক্ত মহিলাগৰাকীৰ নাম ৰীতা। কান্দি থকা, বিষত ছটফটই থকা মাতৃৰ নাম নিৰ্মলা দেৱী।
ভাইৰেল ভিডিঅ’ত দেখা অনুসৰি অভিযুক্ত ৰীতাই মাতৃক প্ৰথমে মাৰিছে, চৰিয়াইছে। কামুৰিও দিছে। তাৰ পাছত চুলিত ধৰি বিচনাৰ পৰা তললৈ পেলাই দিয়ে। মাতৃয়ে কান্দি কাটি কন্যাৰ ওচৰত ৰেহাই দিয়াৰ বাবে দয়া ভিক্ষা কৰি থাকে, কিন্তু কন্যা ৰীতাই মাতৃক ৰেহাই দিয়াৰ সলনি অধিক অত্যাচাৰ কৰি থকা দেখা যায়।
ৰীতাৰ ভাতৃ অমৰদ্বীপ সিঙে তেওঁৰ এজাহাৰত উল্লেখ কৰিছে যে দুবছৰ পূৰ্বে তেওঁৰ ভগ্নীয়ে সমীপৰ এখন গাঁৱত বাস কৰা যুৱকক বিয়া কৰাইছিল যদিও কিছু সময়ৰ পিছত মাতৃগৃহলৈ উভতি আহে। লগতে কয় যে ইয়াৰ পিছৰে পৰা ভগ্নীয়ে স্বামীৰ সৈতে মিলি সম্পত্তিৰ বাবে মাকক হাৰাশাস্তি কৰিবলৈ আৰম্ভ কৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
