দিল্লী দলে একেলগে উদযাপন কৰিলে বিজয় আৰু ৰাহুলৰ পিতৃত্ব, ভাইৰেল ভিডিঅ’
ভাৰতীয় ক্ৰিকেটাৰ কে এল ৰাহুলৰ বাবে সোমবাৰটো আছিল অতি বিশেষ দিন, ৰাহুল আৰু পত্নী তথা বলীউডৰ অভিনেত্ৰী আথিয়া শ্বেট্টী এটি কন্যা সন্তানৰ পিতৃ-মাতৃ হোৱাৰ গৌৰৱ লাভ কৰে। দম্পতীহালে এই খবৰ ছ’চিয়েল মিডিয়াৰ জৰিয়তে অৱগত কৰে।
ইয়াৰে মাজত ৰাহুলে কেৱল পিতৃ হোৱাৰ আনন্দ পোৱাই নহয়, এতিয়া তেওঁ আই পি এল দল দিল্লী কেপিটেলছৰ বাবেও সুখী, কাৰণ দিল্লী দলে আই পি এল ২০২৫ চিজনৰ প্ৰথমখন খেলত ৰোমাঞ্চিত ভাৱে জয় লাভ কৰে।
দিল্লী দলকো এই বিজনে বহুত সুখি কৰি তোলে। লগতে দলৰ সদস্য ৰাহুলৰ পিতৃ হোৱাৰ আনন্দও উদযাপনৰ বাবে দিল্লীৰ দলটোৱে এটা ভিডিঅ’ মুকলি কৰিছে যিটো বৰ্তমানে ভাইৰেল হৈ পৰিছে।
দৰাচলতে সোমবাৰে লক্ষ্ণৌ ছুপাৰ জায়েন্টছৰ বিৰুদ্ধে এখন ৰোমাঞ্চকৰ খেলত এটা উইকেটত জয়লাভ কৰি দিল্লীৰ দলটোৱে যেতিয়া নিজৰ ড্ৰেছিং ৰুমত উপস্থিত হয়, তেতিয়া ৰাহুলক অভিনন্দন জনোৱাৰ এক সুন্দৰ পৰিৱেশৰ সৃষ্টি হয়।
কোলাত কেঁচুৱা লৈ থকাৰ ভংগিমাৰে নাচি নাচি দিল্লী দলৰ প্ৰতিগৰাকী সদস্য, খেলুৱৈৰ পৰা আৰম্ভ কৰি প্ৰশিক্ষক, আদি সকলোৱে ৰাহুলক অভিবাদন জনায়।
উল্লেখ্য যে, কে এল ৰাহুলক দিল্লী দলে ১৪ কোটি টকাত ক্ৰয় কৰিছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
