বিলাসবহুল বাহনৰ চখ৷ প্ৰতিসময়তে বিলাসী বাহনেৰেই যাতায়াত কৰে৷ সেই বাহনৰ আগে পিছে যাত্ৰা কৰে তেওঁৰ সশস্ত্ৰ বাহিনীয়ে৷ পাকিস্তান সেনাৰ বহু বিষয়াৰ সৈতে তেওঁৰ আছিল নিয়মিত যোগাযোগ৷ নাম ছৈফুল্লা খালিদ ওৰফে ছইফুল্লা কাছুৰি৷ তদন্তকাৰী সংস্থাৰ পৰা পোৱা খবৰ অনুসৰি মঙ্গলবাৰে পহেলগামৰ সন্ত্ৰাসবাদী আক্ৰমণৰ মুল নায়কেই হৈছে ছৈফুল্লা৷ তেওঁৰ নিৰ্দেশতেই পাঁচ ছয়জন সন্ত্ৰাসবাদীয়ে দুপৰীয়া পহেলগামৰ বৈছৰণ উপত্যকাত নিৰ্বিচাৰে গুলি চলায়৷ সেই ঘটনাত এতিয়া পৰ্যন্ত ২৬ জনৰ মৃত্যুৰ খবৰ স্পষ্ট কৰিছে প্ৰশাসনে৷ আহত হৈছে কেইবাজনো৷
মঙলবাৰৰ এই আক্ৰমণৰ ঘটনাৰ দায়িত্ব স্বীকাৰ কৰিছে দ্যা ৰেজিষ্টেন্স ফ্ৰণ্ট৷ ২০১৯ চনত জম্মু আৰু কাশ্মীৰৰ ৰাজনৈতিক অস্থিৰ পৰিস্থিতিতেই জন্ম হৈছিল এই সন্ত্ৰাসী গোটৰ৷ পাক সন্ত্ৰাসবাদী গোষ্ঠী লস্কৰ ই তৈবাৰ ভগ্নী সংগঠন হিচাপে জনা যায় দ্যা ৰেজিষ্টেন্স ফ্ৰণ্টক৷ সেই গোষ্ঠীৰ সদস্যসকলে আক্ৰমণ চলালেও পৰিকল্পনা আছিল ছইফুল্লাৰ৷ ছইফুল্লা লস্কৰৰ অন্যতম সদস্য তথা মাষ্টাৰমাইণ্ড৷ ইয়াৰোপৰি এই সন্ত্ৰাসবাদী গোষ্ঠীৰ অন্যতম সদস্য তথা ভাৰতত ৱাণ্টেড ঘোষণা কৰা হাফিজ ছইফৰ অতি ঘনিষ্ঠ ছইফুল্লা৷
সূত্ৰৰ খবৰ অনুসৰি পাক সেনাত যথেষ্ট প্ৰভাৱ আছে ছইফুল্লাৰ৷ পহেলগামৰ আক্ৰমণৰ বাবে দুইমাহ পূৰ্বৰে পৰা পাকিস্তানৰ পঞ্জাৱৰ কাঙ্গলপুৰত তেওঁক দেখা গৈছিল৷ তাতেই পাক সেনাৰ এটা ডাঙৰ বেটেলিয়ান আছিল৷ জনা গৈছে সেই বেটেলিয়ানক মনোবল বৃদ্ধি কৰিবলৈকে তালৈ আহ যাহ আছিল ছইফুল্লাৰ৷ ছইফুল্লাৰ বাহন সেনাছাউনীত প্ৰৱেশ কৰোতেও ফুলবৰ্ষণেৰে সম্ভাষণ জনোৱা হৈছিল৷
ৰাষ্ট্ৰীয় সংবাদমাধ্যমৰ সূত্ৰৰ খবৰ অনুসৰি ছইফুল্লাৰ বক্তৃতাত বেছিভাগ বক্তৃতাতেই আছিল ভাৰতবিৰোধী বাৰ্তা৷ ভাৰতীয় সেনাবাহিনীৰ ওপৰত আক্ৰমণ চলোৱাৰ পৰামৰ্শও দিয়া হয়৷ কেৱল সেয়াই নহয়, পাকিস্তানৰ খাইবাৰ পাখতুনখোৱাতো এনে সভাৰ আয়োজন কৰিছিল পাক সেনাই৷ সেই সভাতেই ছইফুল্লাই ভাৰতবিৰোধী বক্তৃতা দিছিল৷ ইয়াৰোপৰি কাশ্মীৰ দখলৰ হুংকাৰো তেওঁ দি অহা শুনা গৈছিল৷ ধাৰণা কৰা হৈছে যে সেই সন্ত্ৰাসী গোষ্ঠীৰ কেইবাগৰাকীক তেওঁৱেই বাছি উলিয়াইছিল পহেলগামৰ আক্ৰমণৰ বাবে৷ তাতেই তেওঁলোকক প্ৰশিক্ষণ দিয়া হয়৷ তাৰ পাছতেই পাক সেনাৰ সহায়তাত সীমান্ত পাৰ হৈ ভাৰতত প্ৰৱেশ কৰিছিল তেওঁলোক৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
