পুনৰ উত্তপ্ত মণিপুৰ, সান্ধ্য আইনৰ লগতে বন্ধ ইণ্টাৰনেট
মণিপুৰৰ পৰিস্থিতি পুনৰ ভয়াৱহ হৈ পৰিছে। বহু উপত্যকা জিলাত সতেজ হিংসাত্মক পৰিস্থিতিৰ পিছত উত্তেজনা বৃদ্ধি পাইছে, যাৰ বাবে বহু অঞ্চলত সান্ধ্য আইন জাৰি কৰা হৈছে আৰু ইণ্টাৰনেট সেৱাও স্থগিত ৰখা হৈছে। শনিবাৰে নিশা মেইটেই সংগঠন আৰম্বাই টেংগোলৰ এজন নেতা আৰু আন কিছু সদস্যক গ্ৰেপ্তাৰ কৰাৰ খবৰ পোৱাৰ পিছতে অঞ্চলটোত অশান্তি বিয়পি পৰে।
প্ৰতিবাদকাৰীয়ে হুলস্থুলৰ সৃষ্টি কৰিবলৈ আৰম্ভ কৰে। পথৰ মাজত টায়াৰ আৰু পুৰণি আচবাব জ্বলাই বিমানবন্দৰৰ প্ৰৱেশদ্বাৰ ঘেৰাও কৰি নেতাজনক মুক্তিৰ দাবীত নিৰাপত্তাৰক্ষীৰ সৈতে সংঘৰ্ষত লিপ্ত হয় প্ৰতিবাদকাৰী। ৰাজধানী ইম্ফলতো উত্তপ্ত পৰিস্থিতি। আজি দেওবাৰেও পৰিস্থিতি উত্তেজিত হৈ থাকে।
মেইটেই সংগঠন আৰম্বাই টেংগোলেৰ এজন নেতাক গ্ৰেপ্তাৰ কৰা বুলি বাতৰি প্ৰকাশ পোৱাৰ পিছতে মণিপুৰত নতুনকৈ হিংসাত্মক পৰিস্থিতিৰ সৃষ্টি হয়। যদিও আৰক্ষীয়ে গ্ৰেপ্তাৰ হোৱা ব্যক্তিজনৰ পৰিচয় বা তেওঁৰ বিৰুদ্ধে উত্থাপিত অভিযোগ প্ৰকাশ কৰা নাই। কিন্তু বাতৰি অনুসৰি গ্ৰেপ্তাৰ হোৱা নেতাজনৰ নাম কানন সিং বুলি জানিব পৰা গৈছে। যাৰ বাবেই এইদৰে প্ৰতিবাদকাৰী নামি পৰে ৰাজপথত।
আজি দেওবাৰে নিৰাপত্তা বাহিনীয়ে হিংসাত্মক প্ৰতিবাদকাৰীক ছত্ৰভংগ দিবৰ বাবে কন্দুৱা গেছ নিক্ষেপ কৰিব লগা হয়। লগতে লাঠিচাৰ্জো কৰে, কিন্তু নিৰাপত্তাৰক্ষীৰ লাঠিচাৰ্জৰ ফলত এজন লোকৰ মৃত্যু হোৱা বুলি জানিব পৰা গৈছে। পৰিস্থিতি নিয়ন্ত্ৰণ কৰিবলৈ অশান্ত অঞ্চলত অতিৰিক্ত নিৰাপত্তাৰক্ষী মোতায়েন কৰাৰ লগতে ৰাজভৱনলৈ যোৱা পথসমূহত নিৰাপত্তা কটকটীয়া কৰা হৈছে।
পৰিস্থিতিৰ পৰিপ্ৰেক্ষিতত বিষ্ণুপুৰ জিলাত সান্ধ্য আইন জাৰি কৰাৰ বিপৰীতে ইম্ফল পূৱ, ইম্ফল পশ্চিম, থৌবাল আৰু কাকচিং উপত্যকা জিলাত যিকোনো ঠাইতে ৫ জন বা তাতকৈ অধিক লোকৰ সমাগম হোৱাত নিষেধাজ্ঞা আৰোপ কৰা হৈছে।
ছ’চিয়েল মিডিয়াৰ জৰিয়তে হিংসাত্মক পৰিস্থিতিৰ সৃষ্টি হ’ব পাৰে বুলি আৰক্ষীয়ে আশংকা কৰাৰ বাবে উপত্যকা জিলা ইম্ফল ইষ্ট, ইম্ফল পশ্চিম, থৌবাল, কাকচিং আৰু বিষ্ণুপুৰত ৫ দিনৰ বাবে ইণ্টাৰনেট সেৱা বন্ধ কৰি দিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
