আপুনি এইবাৰ হজলৈ যাম ভাৱিছে যদি এই খবৰ আপোনাৰ বাবেই৷ হজযাত্ৰাৰ সকলো বাধা নিষেধ আঁতৰাই দিলে ছৌদী আৰৱে৷ অৰ্থাৎ বাধাহীনভাৱে আপুনি যাব পাৰিব হজলৈ৷ এইবাৰ ১৫০খন দেশৰ ১.৬ মিলিয়ন ধৰ্মপ্ৰাণ মুছলমানে হজলৈ যাত্ৰা কৰিব৷ এই সকলৰ মাজত আছে ভাৰতীয় হজযাত্ৰীও৷ ছৌদী চৰকাৰে হজযাত্ৰাৰ বাবে যি নিষেধাজ্ঞা জাৰি কৰিছিল সকলোবোৰ নিৰ্দেশনা আঁতৰাই দিয়া হৈছে৷
চলিত বছৰত ভাৰতৰ পৰা ১.৭৫ লাখ মুছলমানে হজযাত্ৰাৰ বাবে নিজৰ নাম নথিভুক্ত কৰিছে৷ নাম অন্তৰ্ভূক্ত কৰা সকলে হজযাত্ৰীয়েই এইবাৰ যাব পাৰিব৷ কেন্দ্ৰৰ তৰফৰ পৰা কোৱা হৈছে যে ছৌদী চৰকাৰে নিষেধাজ্ঞা উঠাই লোৱাৰ পাছত তেওঁলোকেও সমস্ত ধৰণৰ ব্যৱস্থা কৰিছে৷ এইবাৰৰ হজ যাত্ৰা ঐতিহাসিক হব৷ ভাৰতসহ ১৪ খন দেশৰ নাগৰিকৰ বাবে নিৰ্দিষ্ট কিছু ভিছা প্ৰদান সাময়িকভাৱে স্থগিত কৰিছে ছৌদী আৰৱে৷ জুনৰ মাজ পৰ্যন্ত উমৰাহ, ব্যৱসায়িক আৰু পাৰিবাৰিক ভিছা নিদিয়ে বুলিও জনাই দিছে ছৌদীয়ে৷ অৰ্থাৎ হজ শেষ হোৱা পৰ্যন্ত ভিছা প্ৰদান বন্ধ থাকিব৷ ভাৰতক বাদ দি ভিছা নোপোৱাৰ তালিকাত আছে পাকিস্তান, বাংলাদেশ, মিছৰ, ইন্দোনেছিয়া, ইৰাক, নাইজেৰিয়া, জৰ্ডান, আলজেৰিয়া, চুডান, ইথিওপিয়া, টিউনিছিয়া, য়েমেন আৰু মৰক্কো৷
প্ৰতি বছৰে প্ৰতিখন দেশৰ বাবে এক নিৰ্দিষ্ট সংখ্যক হজযাত্ৰীৰ সংখ্যা বান্ধি দিয়ে ছৌদী আৰৱে৷ ভিৰ নিয়ন্ত্ৰণৰ বাবেই এই ব্যৱস্থা৷ কিন্তু একাংশ মানুহে এই ব্যৱস্থাক আওকান কৰি হজলৈ যায়৷ পূৰ্বেও এইক্ষেত্ৰত বহু সমস্যাই দেখা দিছে৷ বহুতেই উমৰাহ পাৰিবাৰিক ভিছা লৈ ছৌদীত প্ৰৱেশ কৰে৷ চৰকাৰী অনুমোদন অবিহনেই হজ কৰে বিদেশী বহু লোকে৷ যাৰ ফলত অতিৰিক্ত ভিৰ হয়৷ ছৌদীৰ তীব্ৰ গৰমত অতিৰিক্ত ভিৰৰ কাৰণে হজযাত্ৰীসকলৰ প্ৰাণৰ আশংকাও তৈয়াৰ হয়৷ ২০২৪ চনৰ হজৰ সময়ত এনে ঘটনাত কমেও ১২০০ গৰাকী হজযাত্ৰী পদপিষ্ট হৈ মৃত্যুৰ মুখত পৰিছিল৷ এই ধৰণৰ ঘটনা যাতে দুনাই নহয় তাৰবাবে কঠোৰ পদক্ষেপ গ্ৰহণ কৰিছে ছৌদী কৰ্তৃপক্ষই৷ কিন্তু উমৰাহ ভিছা যাৰ আছে তেওঁলোকে ১৩ এপ্ৰিল পৰ্যন্ত ছৌদীত প্ৰৱেশ কৰিব পাৰিব৷
ইয়াৰোপৰি ছৌদীৰ এই পদক্ষেপৰ আঁৰত আছে আন এক ডাঙৰ কাৰণ৷ অবৈধ কৰ্মসংস্থাপন ৰখোৱা৷ ছৌদী কৰ্তৃপক্ষৰ সূত্ৰৰ পৰা জনা গৈছে যে ব্যৱসায়িক বা পাৰিবাৰিক ভিছা লৈ ছৌদী আৰৱত প্ৰৱেশ কৰি বহু বিদেশী নাগৰিকে বিভিন্ন কামত ধৰে৷ যাৰবাবে ছৌদীৰ লোকৰ কিছু আপত্তি আছে৷ যাৰবাবেও এইবাৰ কঠোৰ হৈছে ছৌদী প্ৰশাসন৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
