সময়ৰ লগে লগে বাঢ়িছে হৃদৰোগত আক্ৰান্তৰ সংখ্যা৷ বিশ্বজুৰি হাৰ্ট এটেকত আক্ৰান্ত হৈ মৃত্যু হোৱা লোকৰ সংখ্যা ক্ৰমশ উৰ্ধ্বমুখী৷ এটা সময় আছিল হাৰ্ট এটেকক মূলত পুৰুষসকলৰ আৰু বয়স্কসকলৰ অসুখ বুলি কোৱা হয়৷ কিন্তু বিগত কেইবাবছৰত এই ধাৰণা সলনি হৈছে৷ অনিয়ন্ত্ৰিত খাদ্যভাষ, অনিয়মিত জীৱনধাৰা, শৰীৰচৰ্চাৰ অভাৱসহ বিভিন্ন কাৰণত কম বয়সীয়াসকলৰ মাজতো বাঁহ বান্ধিছে বিভিন্ন ধৰণৰ হৃদৰোগে৷ বিশেষজ্ঞসকলৰ মতে হৃদৰোগত আক্ৰান্ত হোৱাৰ পূৰ্বে শৰীৰত কিছু উপসৰ্গই দেখা দিয়ে৷ যদিও হৃদৰোগৰ সাধাৰণ লক্ষণ হিচাপে বুকুৰ বিষ, শ্বাসকষ্ট বা অতিৰিক্ত ক্লান্তিৰ কথা সকলোৱে জানে৷ চিকিৎসকৰ মতে হৃদৰোগৰ কিছু গুৰুত্বপূৰ্ণ সংকেত ছালত প্ৰকাশ পাব পাৰে যি আমি বেছিভাগ সময়তেই উপেক্ষা কৰো৷
ভৰি ফোলা
হৃদযন্ত্ৰই যেতিয়া সঠিকভাৱে তেজ পাম্প কৰিব নোৱাৰে তেতিয়া শৰীৰৰ তলৰ অংশত তৰল জমা হবলৈ আৰম্ভ কৰে৷ ইয়াৰ ফলত ভৰি ফোলা লক্ষণে দেখা দিব পাৰে৷
শৰীৰৰ বিভিন্ন অংশত ছাল ৰঙা হোৱা
সাধাৰণতে শৰীৰত অক্সিজেনৰ ঘাটিৰ চিহ্ন হিচাপে ছালৰ ৰং নীলা হৈ পৰে৷ হাত আৰু ভৰিৰ আঙুলি বা ওঁঠ নীলা হোৱা দেখা যায়৷ ই শৰীৰত পৰ্যাপ্ত অক্সিজেন সৰবৰাহ নোহোৱাৰ ইংগিত বহন কৰিব পাৰে৷ এই অৱস্থাক ছায়নোচিছ নামেৰে জনা যায়৷ ই হৃদযন্ত্ৰ বা ৰক্তনলীৰ গুৰুতৰ সমস্যাৰ সংকেত হব পাৰে৷
হালধীয়া মাহ
চকুৰ কোণ, কানৰ কাষত বা আঁঠু আৰু কাষলতিৰ আশেপাশে যদি ছালত কমলা ৰঙৰ বা হালধীয়া ৰঙৰ মাহ দেখা পায় তেন্তে এয়া উচ্চ কলষ্টেৰল বা ট্ৰাইগ্লিছাৰাইডৰ মাত্ৰা বৃদ্ধিৰ ইংগিত হব পাৰে৷ ছালত এই ধৰণৰ পৰিবৰ্তন হলে দ্ৰুত তেজ পৰীক্ষা আৰু চিকিৎসা কৰোৱা উচিত৷
নখৰ তলত সূক্ষ্ম ৰঙা বেঙুনীয়া ৰেখা
নখৰ তলত সূক্ষ্ম ৰঙা বা বেঙুনীয়া ৰেখাই দেখা দিলে সেয়া যদি আঘাতজনিত নহয় তেতিয়া হৃদযন্ত্ৰৰ আভ্যন্তৰীণ সংক্ৰমণ বা ইনফেকটিভ এণ্ডোকাৰ্ডাইটিছৰ এক প্ৰাথমিক সংকেত হব পাৰে৷
আঙুলিত ৰঙা ৰঙা ফোঁহা ওলোৱা
হাতৰ আঙুলিত বা ভৰিৰ আঙুলিত হঠাৎ সৰু সৰু ৰঙা ফোঁহা ওলালে সতৰ্ক হওক৷ চিকিৎসকৰ মতে এইসমূহ প্ৰকৃততে এছলাৰ নোড নামেৰে পৰিচিত আৰু হৃদযন্ত্ৰৰ গুৰুতৰ সংক্ৰমণৰ নিৰ্দেশ বহন কৰে এইসমূহ লক্ষণে৷
কিয় এই লক্ষণসমূহক অৱহেলা কৰা উচিত নহয়?
প্ৰকৃততে ছালত এই ধৰণৰ লক্ষণ চৰ্মৰোগ বুলি ধাৰণা কৰা হয় যদিও ই হৃদযন্ত্ৰৰ সমস্যাৰ সংকেত দিয়ে৷ বিশেষকৈ যিসকলৰ উচ্চ ৰক্তচাপ, ডায়বেটিছ বা কোলোষ্টেৰলৰ সমস্যা আছে তেওঁলোকে এই লক্ষণক গুৰুত্ব দিয়া উচিত৷ ওপৰত উল্লেখিত লক্ষণে দেখা দিলে অবিলম্বে চিকিৎসকৰ পৰামৰ্শ লওক৷ তেজৰ পৰীক্ষা, ইছিজি বা অন্যান্য প্ৰয়োজনীয় পৰীক্ষা কৰক৷ নিয়মিত স্বাস্থ্য পৰীক্ষা, সঠিক খাদ্যভাস আৰু নিয়মিত ব্য়ায়ামৰ মাধ্যমেৰে হৃদযন্ত্ৰ সুস্থ ৰখা সম্ভৱ৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
