মহাশিৱৰাত্ৰি মহাদেৱৰ আৰাধনাৰ বাবে নিৰ্দিষ্ট অন্যান্য দিনৰ পৰা বহুপৰিমাণে পৃথক৷ সমগ্ৰ বছৰৰ ভিতৰত শিৱপূজাৰ বাবে এই দিনটো সকলোতকৈ মাহাত্ম্যপূৰ্ণ৷ ধাৰণা কৰা হয় এই দিনটোতেই শিৱ পাৰ্বতীৰ বিবাহ হৈছিল৷ এই দিনটোতেই সেই মহাজাগতিক পৰিণয়ৰ উদযাপন কৰে ভক্তসকলে৷ ফাগুন মাহৰ কৃষ্ণপক্ষৰ ত্ৰয়োদশী তিথিত পালিত হয় মহাশিৱৰাত্ৰি৷ এই বছৰ মহাশিৱৰাত্ৰি পালিত হ’ব আগন্তুক ১৫ ফেব্ৰুৱাৰীত৷
এই বছৰ মহাশিৱৰাত্ৰিত কেইবাটাও শুভ যোগ আছে৷ শিৱলিংগৰ জলাভিষেক আৰু ৰুদ্ৰাভিষেক কৰা এই দিনটো বিশেষ মাহাত্ম্যপূৰ্ণ৷ জানি থওক মহাশিৱৰাত্ৰিত শিৱলিংগৰ আৰাধনা কৰাৰ সঠিক উপায়৷
শঙ্খ নবজাব
শিৱ পূজাত ভুলতো শঙ্খ নবজাব৷ শঙ্খৰ পানীও শিৱলিংগত নিবেদন কৰা নিষেধ৷ শঙ্খচূড় নামপ এক অসুৰক বধ কৰিছিল মহাদেৱে৷ ধাৰণা কৰা হয়, শঙ্খচূড়ৰ হাড়ৰ পৰাই শঙ্খৰ উৎপত্তি৷
শিৱলিঙ্গৰ প্ৰদক্ষিণ
অন্য দেৱদেৱীৰ আৰাধনাৰ সময়ত পূৰ্ণ প্ৰদক্ষিণৰ নিয়ম থাকিলেও শিৱলিঙ্গক অৰ্ধ প্ৰদক্ষিণ কৰিব লাগে৷ শিৱলিঙ্গৰ যোনি পট কেতিয়াও পাৰ কৰা উচিত নহয়৷
হালধি, সেন্দুৰ নিবেদন নকৰিব
শিৱলিঙ্গত হালধি আৰু সেন্দুৰ ভুলতো নিবেদন নকৰিব৷ শিৱলিংগ পৌৰুষৰ প্ৰতীক৷ সেয়ে নাৰীৰ শৃঙ্গাৰৰ উপকৰণ হালধি আৰু সেন্দুৰ শিৱলিঙ্গত নিবেদন নকৰিব৷ মহাদেৱৰ সৈতে পাৰ্বতীৰ পূজা কৰিলে অৱশ্যে সেন্দুৰ দিব পাৰে৷
বেলপাত নিবেদন
বেলপাত অবিহনে মহাদেৱৰ পূজা অসম্পূৰ্ণ৷ ত্ৰিপত্ৰ বেলপাত শিৱলিঙ্গত নিবেদন কৰিব লাগে৷ বেলপাতৰ মসৃণ দিশটো শিৱলিংগৰ দিশে ঘূৰাই ৰাখিব৷
কি ফুল দিব?
মহাশিৱৰাত্ৰিৰ পূজাত বহু ফুলেই নিবেদন কৰিব নোৱাৰি৷ শিৱ পুৰাণ অনুসৰি কেতেকী, পদ্মফুল আৰু তুলসীপাত শিৱলিঙ্গত নিবেদন নকৰিব৷ ইয়াৰ সলনি বেলপাত, ধতুৰা, ভাং আদি শিৱলিংগত অৰ্পন কৰক৷
খণ্ডিত অক্ষত
শিৱলিঙ্গত ভুলতো খণ্ডিত অক্ষত বা ভঙা চাউল নিবেদন নকৰিব৷ পৰিষ্কাৰ আৰু গোটা চাউল নিবেদন নকৰিলে পূজা অসম্পূৰ্ণ৷
এই ৫ ভুল নকৰিব
১.ব্ৰঞ্জৰ পাত্ৰৰে ভুলতো শিৱলিঙ্গত পানী নিদিব৷ শিৱলিঙ্গত পানী ঢলাৰ বাবে তাম, ৰূপ বা সোণৰ পাত্ৰৰে পানী ঢালক৷
২.মহাশিৱৰাত্ৰিত কলা ৰঙৰ পোছাক পৰিধান নকৰিব৷ বগা, আকাশী নীলা, পাতল হালধীয়া বা কমলা ৰঙৰ পোছাক পৰিধান কৰিব পাৰে৷
৩.মহাশিৱৰাত্ৰিত উপবাসে থকাটো ভাল৷ উপবাসে থকা সম্ভৱ নহ’লে সাত্ত্বিক আহাৰ গ্ৰহণ কৰক৷ পিঁয়াজ, নহৰু, মদ, মাংস মহাশিৱৰাত্ৰিত ভুলতো খোৱা উচিত নহয়৷
৪.মহাশিৱৰাত্ৰিত নিৰ্জলা উপবাস ৰাখিব পাৰে বা ফল খাই উপবাস কৰিব পাৰে৷ এইদিনটোত শস্য জাতীয় খাদ্য নাখাব৷
৫.মহাশিৱৰাত্ৰিত উপবাসে থাকিলে খং নকৰিব বা কাকো বেয়াকৈ নক’ব৷ সমগ্ৰ দিনজুৰি ওম নমহঃ শিৱায়ঃ মন্ত্ৰ জপ কৰক৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
