নিৰাপদ বিনিয়োগ আৰু নিশ্চিত লাভৰ বাবে ডাকঘৰৰ ক্ষুদ্ৰ সঞ্চয় আঁচনি এতিয়াও কোটি কোটি বিনিয়োগকাৰীৰ প্ৰথম পছন্দ। বৰ্তমান ডাকঘৰৰ বিভিন্ন আঁচনিৰ ভিতৰত সুকন্যা সমৃদ্ধি যোজনা আৰু জ্যেষ্ঠ নাগৰিক সঞ্চয় আঁচনিয়ে বছৰি সৰ্বাধিক ৮.২ শতাংশ সুতৰ হাৰ আগবঢ়াইছে।
ইয়াৰ উপৰিও আন আন আঁচনি যেনে এন এছ চি, কে ভি পি, টাইম ডিপ’জিট, এম আই এছ আৰু পি পি এফেও বিনিয়োগৰ কাৰ্যকাল অনুসৰি আকৰ্ষণীয় ৰিটাৰ্ণ আগবঢ়াইছে।
৮.২ শতাংশ সুতৰে আগবাঢ়ি আছে দুখন আঁচনি
ডাকঘৰৰ ক্ষুদ্ৰ সঞ্চয় আঁচনিৰ ভিতৰত বৰ্তমান দুখন আঁচনিয়ে সৰ্বাধিক সুতৰ হাৰ আগবঢ়াইছে। সুকন্যা সমৃদ্ধি যোজনা আৰু জ্যেষ্ঠ নাগৰিক সঞ্চয় আঁচনি, দুয়োখনেই বাৰ্ষিক ৮.২ শতাংশ হাৰত সুত আগবঢ়াইছে। বাকী আঁচনিসমূহৰ সুতৰ হাৰ তুলনামূলকভাৱে কম। নৱেম্বৰ মাহত যদি আপুনি বিনিয়োগ কৰাৰ পৰিকল্পনা কৰিছে তেন্তে প্ৰথমে বিভিন্ন আঁচনিৰ সুতৰ হাৰ সম্পৰ্কে সবিশেষ জানিব লাগিব।
ছোৱালীৰ ভৱিষ্যত আৰু উচ্চ শিক্ষাৰ কথা মনত ৰাখি সুকন্যা সমৃদ্ধি যোজনা আৰম্ভ কৰা হৈছে কন্যাৰ ভৱিষ্যতৰ বাবে সুকন্যা সমৃদ্ধি যোজনা। এই আঁচনিখনত কন্যা সন্তান জন্মৰ পৰা ১০ বছৰ বয়সলৈকে একাউণ্ট খুলিব পাৰিব।এই আঁচনিৰ কাৰ্যকাল ২১ বছৰ। অৰ্থাৎ ই এক দীৰ্ঘম্যাদী সঞ্চয় আঁচনি।
জ্যেষ্ঠ নাগৰিকৰ বাবে জ্যেষ্ঠ নাগৰিক সঞ্চয় আঁচনি (SCSS)
৬০ বছৰ আৰু তাতকৈ অধিক বয়সৰ লোকে জ্যেষ্ঠ নাগৰিক সঞ্চয় আঁচনিত বিনিয়োগ কৰিব পাৰে। এই আঁচনিৰ পৰা তিনিমাহৰ মূৰে মূৰে সুত দিয়া হয়। গতিকে নিয়মীয়াকৈ উপাৰ্জনৰ সুযোগ বিচৰাসকলৰ বাবে ই এক উত্তম বিকল্প হ’ব পাৰে। এই আঁচনিখনত সৰ্বাধিক ৩০ লাখ টকা বিনিয়োগ কৰিব পাৰিব।
আন আঁচনিবোৰৰ ভিতৰত কোনখন আঁচনি আপুনি বাছি ল’ব?
ৰাষ্ট্ৰীয় সঞ্চয় প্ৰমাণপত্ৰ (NSC): এইখন ৫ বছৰৰ কাৰ্যকালৰ সঞ্চয় আঁচনি। এই আঁচনিখনত বিনিয়োগ কৰিলে আয়কৰ আইনৰ ধাৰা ৮০চিৰ অধীনত কৰ কৰ্তনৰ ব্যৱস্থা কৰা হয়।
কিষাণ বিকাশ পাত্ৰ (কেভিপি): এই আঁচনিখনে নিৰ্দিষ্ট সময়ৰ ভিতৰত বিনিয়োগ কৰা ধন দুগুণ কৰাৰ সুযোগ প্ৰদান কৰে।
টাইম ডিপ’জিট (TD): বেংকৰ ফিক্সড ডিপ’জিটৰ দৰেই এই আঁচনিখনতো এককালীন ডিপ’জিটৰ প্ৰয়োজন হয়। ৫ বছৰৰ টাইম ডিপজিট এটা জনপ্ৰিয় বিকল্প।
মাহেকীয়া আয় আঁচনি (MIS): যিসকলে প্ৰতিমাহে নিৰ্দিষ্ট পৰিমাণৰ সুত বা আয় লাভ কৰিব বিচাৰে তেওঁলোকৰ বাবে এই আঁচনি উপযোগী হ’ব পাৰে।
পাব্লিক প্ৰভিডেণ্ট ফাণ্ড (পিপিএফ): এই আঁচনিৰ সুতৰ হাৰ তুলনামূলকভাৱে কম, বৰ্তমান ৭.১ শতাংশ। কিন্তু ১৫ বছৰৰ দীৰ্ঘম্যাদী সঞ্চয় আৰু কৰ ৰেহাইৰ সুবিধাৰ বাবে ই এক জনপ্ৰিয় বিকল্প।
বিনিয়োগৰ সিদ্ধান্ত লোৱাৰ আগতে কি মনত ৰাখিব লাগে?
কেৱল উচ্চ সুতৰ হাৰ চাই আঁচনি এখনত বিনিয়োগ কৰা উচিত নহয়। আপুনি কিমান দিনলৈ ধন বিনিয়োগ কৰিব বিচাৰে, কাৰ বাবে বিনিয়োগ কৰিছে আৰু এককালীন ধন বিচাৰে নে নিয়মীয়া আয় বিচাৰে সেই বিষয়েও বিবেচনা কৰাটো গুৰুত্বপূৰ্ণ।
মনত ৰাখিব, সুকন্যা সমৃদ্ধি যোজনা কেৱল ছোৱালীৰ ভৱিষ্যতৰ বাবে। আনহাতে, সাধাৰণ নিয়ম অনুসৰি জ্যেষ্ঠ নাগৰিক সঞ্চয় আঁচনিত কেৱল ৬০ বছৰ আৰু তাতকৈ অধিক বয়সৰ লোকেহে বিনিয়োগ কৰিব পাৰিব। গতিকে এই আঁচনি দুখনত বিনিয়োগ কৰাটো সকলোৱে সম্ভৱ নহয়। কেৱল সৰ্বোচ্চ সুতৰ হাৰ চাই চৰকাৰী আঁচনি এখনত বিনিয়োগ কৰাৰ সিদ্ধান্ত লোৱাটো সঠিক নহয়। কিমান দিনলৈ টকা জমা কৰিব পাৰিব আৰু আপোনাৰ আৰ্থিক প্ৰয়োজনীয়তা কি সেয়াও বুজিব লাগিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
