সংসদৰ জনতাৰ ইছ্যু তুলি ধৰি সম্প্ৰতি খুবেই ভাইৰেল হৈ আছে আম আদমি পাৰ্টীৰ ৰাজ্যসভা সাংসদ ৰাঘৱ চাড্ডা৷ ইতিমধ্যেই গিগ কৰ্মীসকলৰ অধিকাৰক লৈয়ো সৰৱ হৈ আছে তেওঁ৷ জনপ্ৰতিনিধিসকলৰ দায়বদ্ধতাক লৈ তেওঁ প্ৰশ্ন তুলিছে৷ এইবাৰ টেলিকম সংস্থাসমূহৰ ৰিচাৰ্জ কেলেঙ্কাৰিক লৈয়ো সৰৱ হৈছে আপ সাংসদ৷
সাংসদ ৰাঘৱ চাড্ডাৰ বক্তব্য, ৰিচাৰ্জ শেষ হৈ গ’লে যেনেকৈ প্ৰিপেইড গ্ৰাহকসকলৰ ইনকামিং পৰিসেৱা বন্ধ কৰি দিয়া হয়৷ তেনেকৈয়ে ২৮ দিনৰ প্লেন বনাই ১২ মাহত ১৩ বাৰ ৰিচাৰ্জ কৰিবলৈ বাধ্য কৰোৱা হয়৷ সেইসমূহে প্ৰকৃততে ডাঙৰ আৰ্থিক প্ৰতাৰণা৷ ৰাঘৱ চাড্ডাৰ বক্তব্য, ‘ৰিচাৰ্জৰ ম্যাদ শেষ হলেই কাকোৱেই ফোন কৰিব নোৱাৰি৷ আনকি গুৰুত্বপূৰ্ণ অটিপি বা জৰুৰী বাৰ্তাও দিব পৰা নাযায়৷ কোনভাৱেই যোগাযোগ কৰিব পৰা নাযায়৷ জৰুৰী পৰিস্থিতিত মানুহে কাৰ্যত অসহায় হৈ পৰে৷’ ৰাঘৱৰ বক্তব্য, ‘ৰিচাৰ্জ শেষ হ’লে আউটগয়িং কল বন্ধ হোৱাটো যুক্তিযুক্ত৷ কিন্তু ইনকামিং কল বন্ধ হ’ব কিয়?’
টেলিকম সংস্থাসমূহৰ বহু সমালোচিত ২৮ দিনৰ ৰিচাৰ্জ প্লেনক লৈয়ো সৰৱ সাংসদ ৰাঘৱ৷ তেওঁ কয়, ‘২৮ দিনৰ ৰিচাৰ্জ প্লেন প্ৰকৃততে এটা ফান্দ৷ ২৮ দিনকৈ ১৩ বাৰ ৰিচাৰ্জ কৰিলে মুঠ ৩৬৮ দিন হয়৷ অৰ্থাৎ ১২ মাহত ১৩ বাৰ আপুনি ৰিচাৰ্জ কৰিব লাগে৷ ফলত বছৰত এবাৰ অতিৰিক্ত ৰিচাৰ্জ কৰিবলৈ বাধ্য হৈছে গ্ৰাহক৷ ৰাঘৱে কৈছে, মোবাইল ৰিচাৰ্জ ৩০ বা ৩১ দিনৰ হোৱা উচিত৷
উল্লেখ কৰা প্ৰয়োজন যে দেশৰ সকলো টেলিকম সংস্থাই মাহিলী প্লেনৰ সলনি ২৮ দিন বা ৫৪ দিন বা ৮৪ দিনৰ ৰিচাৰ্জ প্লেন গ্ৰাহকসকলে কিনিবলৈ বাধ্য৷ এইবিষয়ক লৈ পূৰ্বেও বহুবাৰ বিতৰ্ক হৈছে৷ এইবাৰ সংসদতো এই গুৰুত্বপূৰ্ণ বিষয়টো তুলি ধৰিছে ৰাঘৱে৷ চৰকাৰে ইয়াক লৈ কি পদক্ষেপ ল’ব সেয়াহে লক্ষ্যণীয়৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
