ভাৰত বিশ্বৰ সকলোতকৈ সস্তা মোবাইল ডাটা ব্যৱহাৰৰ দেশসমূহৰ মাজত এখন৷ ভিডিঅ’ ষ্ট্ৰিমিং কৰাৰ পৰা আৰম্ভ কৰি ছচিয়েল মিডিয়াত ঘণ্টাৰ পাছত ঘণ্টা স্ক্ৰল কৰা ইণ্টাৰনেট ব্যৱহাৰ এতিয়া মানুহৰ দৈনন্দিন জীৱনৰ অংশ হৈ পৰিছে৷
ভৱিষ্যতে মোবাইল ডাটা ব্যৱহাৰ কৰিবলৈ অতিৰিক্ত খৰচ লাগিব পাৰে৷ কাৰণ ভাৰত চৰকাৰে বৰ্তমান মোবাইল ডাটা ব্যৱহাৰৰ ওপৰত কৰ আৰোপ কৰাৰ সম্ভাৱনা প্ৰকাশ কৰিছে৷ এই ধাৰণা এক টেলিকম পৰ্যালোচনা বৈঠকৰ পৰা চৰ্চালৈ আহিছে৷ এই বৈঠকত সভাপতিৰ আসনত আছিল প্ৰধানমন্ত্ৰী মোদী৷ সেই বৈঠকত দ্ৰুত সম্প্ৰসাৰিত হোৱা ডিজিটেল অৰ্থনীতিৰ পৰা নতুন উপায়েৰে ৰাজহ বঢ়োৱাৰ বিষয়ক লৈ আলোচনা হৈছিল৷
Department of Telecommunications-ক এক নিৰ্দেশ দিয়া হৈছে যে মোবাইল ডাটা ব্যৱহাৰৰ ওপৰত সৰু কৰ বা লেভি আৰোপ কৰাটো সম্ভৱ হ’ব নেকি? কেনেকৈ কাৰ্যকৰ হ’ব পাৰে সেই বিষয়ে আলোচনা কৰিবলৈকো পৰামৰ্শ দিয়া হৈছে৷ বৰ্তমান চৰকাৰে টেলিকম খাতৰ পৰা বেছিভাগ ৰাজহ পায় স্পেকট্ৰাম নিলাম আৰু টেলিকম অপাৰেটৰসকলৰ দিয়া লাইচেন্স ফিৰ পৰা৷ ভাৰতত ইণ্টাৰনেট ব্যৱহাৰৰ পৰিমাণ বিগত কেইবাবছৰত অসাদাৰণ গতিত বাঢ়িছে৷ চৰকাৰী কৰ্মকৰ্তাসকলৰ মতে মোবাইল ডাটা ব্যৱহাৰৰ ওপৰত খুবেই সৰু এটা কৰ আৰোপ কৰিলেও ডাঙৰ অংকৰ ৰাজহ পোৱা যাব পাৰে৷ টেলিকম বিভাগৰ হিচাপ অনুসৰি ২০২৫ অৰ্থবৰ্ষত ভাৰতে প্ৰায় ২২৯ বিলিয়ন গিগাবাইট মোবাইল ডাটা ব্যৱহাৰ হৈছে৷
যদি চৰকাৰে প্ৰতি গিগাবাইট ডাটাৰ বাবে ১ টকাকৈ কৰ আৰোপ কৰে তেতিয়া সাম্ভাব্য বাৰ্ষিক ৰাজহ প্ৰায় ২২,৯০০ কোটি টকা পৰ্যন্ত হ’ব৷ ইয়াৰপৰাই বুজা যায় ভাৰতত ডিজিটেল ব্যৱসায় কিমান বিশাল৷ তথ্যৰ হিচাপত কোৱা হৈছে যে ব্যৱহাৰকাৰীয়ে ইতিমধ্যেই মোবাইল ৰিচাৰ্জ প্লেনৰ ওপৰত ১৮শতাংশ জিএছটি দিয়ে৷ সেয়ে নতুনকৈ কোনো কৰ আৰম্ভ হলে সেয়া সম্ভৱত বৰ্তমান চাৰ্জৰ সৈতে অতিৰিক্ত হিচাপে যোগ হ’ব৷
যদি এই ধৰণৰ কৰ চালু কৰা হয় তেন্তে ভৱিষ্যতে টেলিকম ব্যৱহাৰকাৰীসকলৰ ডাটা প্লেনৰ খৰচ বাঢ়ি যাব পাৰে৷ উদাহৰণ হিচাপে ধৰা হ’ল কোনোৱে প্ৰতিদিনে ২ জিবি ডাটা প্লেন ব্যৱহাৰ কৰে৷ ইয়াৰ ফলত সাধাৰণতে মাহিলী প্ৰায় ৬০ জিবি ডাটা ব্যৱহাৰ হয়৷ যদি চৰকাৰে প্ৰতি জিবি ডাটাত ১ টকাকৈ কৰ আৰোপ কৰে তেতিয়া মাহিলী খৰচ প্ৰায় ৬০ টকা পৰ্যন্ত বাঢ়িব পাৰে৷
ব্যক্তিগতভাৱে এই অংক কম যেন লাগিলেও ভাৰতৰ কোটি কোটি ব্যৱহাৰকাৰীৰ ক্ষেত্ৰত ই চৰকাৰক বিপুল পৰিমাণে ৰাজহ দিব৷ এতিয়াও বিষয়টো আলোচনাৰ পৰ্যায়ত আছে আৰু ইয়াক লৈ কোনো চূড়ান্ত সিদ্ধান্ত লোৱা হোৱা নাই৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
