পত্নীক এজন যুৱকে ফুছুলাই লৈ গৈ আৱদ্ধ কৰি ৰাখিছে বুলি এক অভিযোগ তুলি স্বামীয়ে মধ্যপ্ৰদেশ হাইকৰ্টত হেবিয়াছ কৰ্পাছ গোচৰ কৰিছিল৷ গোচৰৰ আবেদনত কোৱা হৈছিল, পত্নীক বিচাৰি আদালতত হাজিৰ কৰোৱা হওক৷ ১৯ বছৰীয়া পত্নীগৰাকীয়ে হাইকৰ্টত হাজিৰ হৈ জনালে যে তেওঁৰ স্বামী তেওঁতকৈ ২১ বছৰ ডাঙৰ৷ ইয়াৰোপৰি স্বামীৰ তেওঁৰ প্ৰতি ব্যৱহাৰো অতিপাত বেয়া৷ লগতে মহিলাগৰাকীৰ অভিযোগ যে তেওঁৰ পিতৃ মাতৃয়েও এই বিষয়ে একো নামাতে বা তেওঁৰ ভাল বিচৰা নাই৷
তেতিয়াই মধ্যপ্ৰদেশৰ গোৱালিয়ৰ বেঞ্চৰ ন্যায়াধীশ আনন্দ পাঠক আৰু ন্যায়াধীশ পুষ্পেন্দ্ৰ যাদৱে প্ৰশ্ন কৰে যে তেওঁ কাৰ সৈতে থাকিব খোজে? তেতিয়াই মহিলাগৰাকীয়ে কয় যে, যাৰ বিৰুদ্ধে তেওঁক আৱদ্ধ কৰি ৰখাৰ অভিযোগ উঠিছে সেই ব্যক্তিৰ সৈতেই তেওঁ থাকিব খোজে৷
স্বামী, পিতৃ-মাতৃ আৰু অভিযুক্ত যুৱকৰ উপস্থিতিতে মহিলাগৰাকীয়ে দাবী কৰে যে যুৱকে তেওঁক অবাধ স্বাধীনতা দিছে৷ সেই কাৰণেই তেওঁৰ পুৰণি স্বামীৰ কাষলৈ ওভতি যোৱাৰ মন নাই৷ চৰকাৰী অধিবক্তা আৰু সেই মহিলাৰ কাউন্সেল অঞ্জলি জ্ঞানানিয়ে হাইকৰ্টৰ ডিভিজন বেঞ্চত জনাই যে মহিলাগৰাকীয়ে স্বামীৰ সৈতে কোনো ধৰণৰ আপোচ কৰিব খোজা নাই৷ তেওঁ বিবাহ বিচ্ছেদ বিচাৰিছে৷ অভিযুক্ত যুৱকৰ সৈতেই তেওঁ থাকিব খোজে৷ মহিলাগৰাকীয়ে এই কথাই কোৱা বুলিও জনাইছে অধিবক্তাই৷
ন্যায়াধীশে অভিযুক্ত যুৱকৰ সৈতেও একান্তই পৃথককৈ কথা পাতে৷ সূত্ৰৰ খবৰ যে সেই যুৱকে ন্যায়াধীশক জনাইছে যে মহিলাগৰাকীৰ প্ৰতি তেওঁৰ সমবেদনা আছে৷ তেওঁক সেয়ে কোনো কামতে যুৱকে বাধা দিব নোখোজে৷ মহিলাৰ স্বাধীনতাত তেঁও হস্তক্ষেপ কৰিব নোখোজে৷ মহিলাগৰাকীৰ বিবাহবিচ্ছেদ হৈ গ’লে যুৱকে সেই মহিলাক বিয়া কৰাবলৈকো ৰাজী বুলিও জনায়৷
সকলো পক্ষৰ বক্তব্য শুনি ডিভিজন বেঞ্চে জনাই দিয়ে যে হেবিয়াছ কৰ্পাছ গোচৰৰ কোনো যৌক্তিকতা নাই৷ কাৰণ মহিলা এডাল্ট বা প্ৰাপ্তবয়স্ক৷ তেওঁ নিজৰ সিদ্ধান্ত লৈছে৷ স্বামী অবিহনে যাৰ সৈতে তেওঁ থাকিব খোজে তেওঁৰ সৈতে থাকিব পাৰে৷ কিন্তু তাৰ পূৰ্বে মহিলাগৰাকী ছমাহ মধ্যপ্ৰদেশ চৰকাৰৰ শৌৰ্য দিদি প্ৰকল্পৰ আওঁতাত থাকিব৷
শৌৰ্য দিদি প্ৰকল্প হৈছে ২০২৪ চনত মধ্যপ্ৰদেশ চৰকাৰে আৰম্ভ কৰা এটা প্ৰকল্প৷ মূলত যৌন নিৰ্যাতনৰ চিকাৰ কোনো মহিলা বা নাবালিকাৰ চোৱাচিতা, কাউন্সেলিং আৰু যত্ন লোৱা হয়৷ ইয়াৰ ম্যাদ প্ৰায় ছমাহ৷ ছমাহৰ বাবে আইনজীৱী অঞ্জলী আৰু ভাৱনা নামৰ আৰক্ষীয়ে শৌৰ্য দিদি প্ৰকল্পৰ আওঁতাত থাকোতে মহিলাগৰাকীক চোৱাচিতাৰ দায়িত্বত থাকিব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
