আঞ্চলিক ৰাজনীতিত এম কে ষ্টেলিনৰ দল ডিএমকেৰ সৈতে সম্পৰ্ক ছিন্ন কৰিলে কংগ্ৰেছে৷ দক্ষিণী তাৰকা থালাপতি বিজয়ৰ তামিলাগা ভেট্টি কাজগমক সমৰ্থনৰ সিদ্ধান্ত লৈছে তেওঁলোকে৷ এইবাৰৰ নিৰ্বাচনত তামিলনাডুৰ পাঁচখন আসন জয় কৰিছে কংগ্ৰেছে৷ বুধবাৰে তামিলনাডুৰ কংগ্ৰেছ নেতাসকলে চেন্নাইত টিভিকেৰ সদৰ দফতৰলৈ গৈ বিজয়ৰ সৈতে দেখা কৰে৷ চৰকাৰ গঠনৰ বাবেও টিভিকেক পূৰ্ণ সমৰ্থনৰ বাৰ্তা দিছে তেওঁলোকে৷
কংগ্ৰেছে জনাইছে যে টিভিকেৰ সৈতে তেওঁলোকৰ এই জোঁট কেৱল এইবাৰ চৰকাৰ গঠনৰ বাবেই নহয়৷ ভৱিষ্যতে পৌৰসভা, পঞ্চায়ত নিৰ্বাচন, লোকসভা আৰু ৰাজ্যসভা নিৰ্বাচনৰ ক্ষেত্ৰতো তেওঁলোকৰ এই জোঁট থাকিব৷ তামিলনাডুৰ প্ৰদেশ কংগ্ৰেছৰ ভাৰপ্ৰাপ্ত নেতা গিৰীশ চোডণকৰে বুধবাৰে এক বিবৃত্তিযোগে জনাইছে যে তেওঁলোকে টিভিকেক চৰ্তসাপেক্ষে সমৰ্থন কৰিব৷ এই চৰ্ত হৈছে কোনো সাম্প্ৰদায়িক শক্তি, যিয়ে দেশৰ সংবিধানত বিশ্বাসী নহয় তেনে কোনো দলক জোটত ল’ব নোৱাৰিব টিভিকে৷ তেওঁ আৰু জনাইছে যে টিভিকে প্ৰধান বিজয়েই তেওঁলোকৰ ওচৰত সমৰ্থন বিচাৰি যোগাযোগ কৰিছিলষ সেই অনুৰোধতেই তামিলনাডুৰ প্ৰদেশ কংগ্ৰেছ কমিটি আৰু কংগ্ৰেছ পৰিষদীয় দলে একেলগে এই সিদ্ধান্ত গ্ৰহণ কৰিছে৷
উল্লেখ কৰা প্ৰয়োজন যে তামিলনাডুত একক দল হিচাপে সকলোতকৈ বেছি ভোট লাভ কৰিছে বিজয়ৰ টিভিকে৷ জয় কৰিছে ১০৭ খন আসন৷ চৰকাৰ গঠনৰ বাবে সেয়া পৰ্যাপ্ত নহয়৷ চৰকাৰ গঢ়িবলৈ হ’লে ১১৮ খন আসন লাগে৷ এই অৱস্থাত কংগ্ৰেছ বিধায়কৰ সমৰ্থনো বিজয়ৰ বাবে যথেষ্ট নহয়৷ কংগ্ৰেছৰ সমৰ্থন পালে বিজয়ৰ পক্ষত থাকিব ১১২ বিধায়ক৷ কিন্তু চৰকাৰ গঠনৰ বাবে আৰু ৬ বিধায়কৰ সমৰ্থন লাগিব৷ এই অৱস্থাত জোটসংগী বিচাৰি চিপিআই, চিপিআইএম আৰু ভিচিকেৰ দৰে দলসমূহৰ সৈতে যোগাযোগ ৰাখিছে বিজয়ে৷ এই দলসমূহৰ সমৰ্থন পালেই টিভিকে চৰকাৰ গঠনৰ বাবে মুঠ ১১৯ বিধায়ক যোগাৰ হ’ব৷
বিজয়ৰ সৈতে কংগ্ৰেছৰ হাত মিলোৱা বিষয়টোক লৈ অসন্তুষ প্ৰকাশ কৰিছে ডিএমকে শিবিৰে৷ কংগ্ৰেছক বিশ্বাসঘাতক বুলি আক্ৰমণ কৰিছে ডিএমকেৰ মুখপাত্ৰ ছাৰাভানন আন্নাদুৰাই৷ তেওঁ কয়, ‘কংগ্ৰেছৰ কোনো এক অতিচালাক ব্যক্তিয়ে সমগ্ৰ পৰিস্থিতি ধ্বংস কৰিছে৷ কংগ্ৰেছৰ সমৰ্থনেও টিভিকেক চৰকাৰ গঠন কৰাব নোৱাৰে৷ কংগ্ৰেছে এনেকৈ ডিএমকে ত্যাগ কৰি নিজকে হাঁহিয়াতৰ পাত্ৰহে কৰিছে৷’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
