ইছলাম ধৰ্মাৱলম্বীসকলৰ বছৰৰ নানান উৎসৱৰ মাজত এক গুৰুত্বপূৰ্ণ উৎসৱ হৈছে ঈদ-অল-আদাহ৷ প্ৰতি বছৰে সমগ্ৰ দেশজুৰি পালিত হয় এই ঈদ, যাক কোৰবানি ঈদ বা বকৰি ঈদ নামেৰেও জনা যায়৷ এই উৎসৱ মূলত ত্যাগৰ প্ৰতীক৷ ইছলাম ধৰ্মৰ সমস্ত উৎসৱ পালিত হয় সাধাৰণৰ চন্দ্ৰ কেলেণ্ডাৰৰ ওপৰত নিৰ্ভৰ কৰি৷ সৌৰ কেলেণ্ডাৰৰ পৰা চন্দ্ৰ কেলেণ্ডাৰ ১১ দিন সৰু৷ ইয়াৰবাবে প্ৰতিবছৰে ঈদ একেদিনাই নপৰে৷ হিজৰি কেলেণ্ডাৰ অনুসৰি ১২ তম বা শেষ মাহ অৰ্থাৎ ধু অল হিজ্জা মাহৰ দশম দিনত পালিত হয় ঈদ অল আদাহ৷
২০২৬ চনৰ ঈদ অল আদাহ কেতিয়া পৰিছে?
ঈদ অল আদাহৰ তাৰিখ স্থানীয়ভাৱে জ্বিলহজ্জ মাহৰ চন্দ্ৰ দেখাৰ ওপৰত নিৰ্ভৰ কৰে৷ এইবছৰ ভাৰতত ঈদ অল আদাহ পালিত হ’ব ১৭ মে বুধবাৰে৷ আৰবিক শব্দ আদাহৰ অৰ্থ উৎসৰ্গা বা ত্যাগ কৰা৷ এই বিশেষ দিনটো আল্লাহৰ নামেৰে ত্যাগ কৰাৰ ৰীতি আছে৷ ইছলাম ধৰ্মাৱলম্বীসকলে ঈদ অল আদাহৰ দিনা আল্লাহৰ উদ্দেশ্যে ছাগলী, গৰু, উট কিংবা কোনো পশু কোৰবানি দিয়ে৷ ইয়াৰপাছতেই সেই মাংস ৰান্ধি কেইবাদিনো ধৰি খোৱাবোৱা কৰাৰ ৰীতি প্ৰচলিত আছে৷
কোৰবানি দিয়াৰ ওপৰিও এইদিনটোত পুৱাৰে পৰা মছজিদ কিংবা ঘৰত নামাজ পঢ়ি দোৱা কৰে বেছিভাগ মানুহে৷ অন্যান্য ঈদৰ দৰে ঈদ অল আদাহতো এজনে আনজনৰ ঘৰলৈ মাংস বা অন্যান্য সামগ্ৰী পঠিৱাৰ ৰীতি আছে৷ এই ঈদত ঘৰলৈ অতিথিও আমন্ত্ৰণ কৰা হয়৷
ইছলামী বিশ্বাস অনুসৰি কোৰবানিৰ প্ৰথা আৰম্ভ হৈছে হজৰত ইব্ৰাহিমৰ সময়ত৷ কথিত আছে যে পৰীক্ষা কৰাৰ বাবে হজৰত ইব্ৰাহিমক তেওঁৰ সকলোতকৈ মূল্যবান সামগ্ৰী কুৰবানি কৰিবলৈ আল্লাহে কৈছিল৷ ইয়াৰপাছতেই তেওঁ নিজৰ একমাত্ৰ পুত্ৰক কোৰবানি দিয়াৰ সিদ্ধান্ত লয়৷ পুত্ৰক কোৰবানি দিয়াৰ সময়ত তেওঁৰ মোহ জাগি নুঠে তাৰবাবে তেওঁৰ চকু বান্ধিও ৰাখে৷ ইয়াৰপাছতেই নিজৰ সন্তানক কোৰবানি দিয়ে হজৰত ইব্ৰাহিমে৷ কিন্তু চকুত বান্ধি থোৱা কাপোৰ খোলাৰ পাছত তেওঁ দেখা পায় যে সন্তানৰ পৰিবৰ্তে এটা প্ৰাণীহে মৃত অৱস্থাত পৰি আছে আৰু তেওঁৰ সন্তান একেবাৰেই সুস্থ হৈ আছে৷ কথিত আছে যে আল্লাহে হজৰত ইব্ৰাহিমৰ ওপৰত সন্তুষ্ট হৈ তেওঁৰ পুত্ৰক জীৱন দিয়ে৷ তেতিয়াৰে পৰাই বিশ্বৰ মুছলমান সমাজে বকৰি ঈদ পালন কৰি আহিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
