আজিকালি ঋণ সহজে লাভ কৰিব পাৰি, কিন্তু তাৰ EMI পৰিশোধ কৰাটো কিছুমান লোকৰ বাবে এক ডাঙৰ চিন্তাৰ কাৰণ হৈ পৰে। বহুতে কম EMIৰ লোভত দীঘলীয়া সময়ৰ বাবে বাছি লয় বা সম্পূৰ্ণ তথ্য নজনাকৈ ঋণ গ্ৰহণ কৰে। ইয়াৰ ফলত বহু বছৰলৈ তেনে গ্ৰাহকে আৰ্থিক অনাটনত ভুগি থাকে। সঠিক পৰিকল্পনা নাথাকিলে সুদৰ বোজা ক্ৰমাৎ বৃদ্ধি পায় গৈ থাকে আৰু ঋণ পৰিশোধ কৰাটো কঠিন হৈ পৰে। কিন্তু বুদ্ধিৰে কিছুমান বুদ্ধিমান সিদ্ধান্ত ল’লে ঋণ সোনকালে শেষ কৰিব পাৰি।
ঋণ লোৱাৰ সময়ত সততে কৰা কেইটামান ভুল সিদ্ধান্ত
অধিকাংশ মানুহে ঋণ লোৱাৰ সময়ত কেইটামান ভুল কৰে। এনেধৰণৰ কেইটামান ভুল হৈছে-নিজৰ সামৰ্থ্যতকৈ অধিক পৰিমাণৰ ধন ঋণ হিচাপে লোৱা, মুঠ সুদৰ খৰচ ভালকৈ নুবুজাকৈ ঋণ লোৱা, কম EMIৰ বাবে দীঘলীয়া সময়লৈ পৰিশোধৰ সময় বাছনি কৰা, সময়মতে EMI পৰিশোধ নকৰা, একেলগে কেইবাটাও ঋণ লোৱা, সুদৰ হাৰ ভালকৈ নিৰীক্ষণ নকৰা আৰু আন আন বেংকৰ সৈতে তুলনা নকৰাকৈ ঋণ লোৱা, অপ্রয়োজনীয় বস্তু EMI-ত ক্ৰয় কৰা, ঋণৰ চৰ্ত আৰু নিয়ম ভালদৰে নপঢ়া, আয় বৃদ্ধি হোৱাৰ পিছতো EMIৰ পৰিমাণ বৃদ্ধি নকৰা ইত্যাদি। ঋণ লোৱাৰ সময়ত উপৰিউক্ত বিষয়কেইটা ভালকৈ গুৰুত্ব নিদিয়াৰ ফলত একো একোটা ঋণৰ EMI এটা সময়ত হিমালয়সদৃশ বোজালৈ পৰিণত হ’বলৈ ধৰে।
ঋণৰ বোজা কমাবলৈ কি কৰিব পাৰে?
এটা কিস্তিত পৰিশোধ কৰিবলগীয়া ধনৰ পৰিমান সামৰ্থ অনুযায়ী যিমান পাৰে বেছিকৈ নিৰ্ধাৰণ কৰক। এটা কিস্তিত পৰিশোধ কৰিবলগীয়া ধনৰ পৰিমাণ বেছি হ’লে ঋণ সোনকালে শেষ হ’ব। সুদৰ পৰিমাণো এই ক্ষেত্ৰত কম হ’ব অৰ্থাৎ অতিৰিক্তভাৱে ভৰিবলগীয়া ধনৰ পৰিমাণো কমি যাব। ভৱিষ্যতে ঋণ লাভৰ বাবে প্ৰয়োজনীয় ক্ৰেডিট স্ক’ৰো উন্নত হ’ব। লগতে EMI চলি থকা সময়ত দৈনন্দিন খৰছত নিয়ন্ত্ৰণ ৰাখক। অযথা আৰু অপ্ৰয়োজনীয় খৰছ কৰাৰ পৰা বিৰত থাকক। EMI পৰিশোধ কৰাত বিলম্ব কৰাৰ ভুল কেতিয়াও নকৰিব। EMI পৰিশোধত পলম কৰাৰ ফলত আপোনাৰ ক্ৰেডিট স্কৰত ইয়াৰ প্ৰভাৱ পৰিব পাৰে। হাতলৈ কেতিয়াবা বেছিকৈ ধন আহিলে এবাৰতে অধিক ধন পৰিশোধৰ ব্যৱস্থা থকা ঋণহে ল’ব।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
