বয়স কেৱল এটা সংখ্যা—এই কথাষাৰ সত্য প্ৰমাণিত কৰিছে মৰিগাঁও জিলাৰ জাগীৰোডৰ নতুন গাঁৱৰ ৮৫ বছৰীয়া ক্ৰীড়াবিদ অন্ধুৰাম দাসে। যি বয়সত অধিকাংশ লোকে বিশ্ৰামৰ পথ বাছি লয়, সেই সময়তো তেওঁ ক্ৰীড়াক্ষেত্ৰখনত সক্ৰিয় উপস্থিতিৰে নতুন প্ৰজন্মক অনুপ্ৰাণিত কৰি আহিছে। ২০২৫ চনৰ ১৮ৰ পৰা ২১ ডিচেম্বৰলৈ মৰিগাঁৱত অনুষ্ঠিত ৩১ সংখ্যক অসম আন্তঃজিলা মাষ্টাৰ্ছ এথলেটিকছ চেম্পিয়নশ্বিপত অংশগ্ৰহণ কৰি অন্ধুৰাম দাসে ৮৫ বছৰ বয়সতো ৫,০০০ মিটাৰ আৰু ১০,০০০ মিটাৰ দৌৰত পদক লাভ কৰিছিল। এই সাফল্যই পুনৰবাৰ ৰাজ্যবাসীক তেওঁৰ অদম্য মনোবল আৰু ক্ৰীড়াৰ প্ৰতি নিষ্ঠাৰ কথা সোঁৱৰাই দিয়ে।
তেওঁৰ জীৱনজোৰা ক্ৰীড়া আৰু সামাজিক অৱদানৰ স্বীকৃতি স্বৰূপে ২০২৬ৰ জানুৱাৰীত অসমৰ ৰাজ্যপাল লক্ষ্মণ প্ৰসাদ আচার্যই তেওঁৰ বাসগৃহত উপস্থিত হৈ ‘আমাৰ মাটি আমাৰ নায়ক’ বঁটা প্ৰদান কৰিছিল। সমাজ, সংস্কৃতি আৰু ক্ৰীড়াক্ষেত্ৰত উল্লেখযোগ্য অৱদান আগবঢ়োৱা ব্যক্তিসকলক প্ৰদান কৰা এই সন্মান অন্ধুৰাম দাসৰ জীৱনসংগ্ৰাম আৰু কৰ্মনিষ্ঠাৰ এক মূল্যৱান স্বীকৃতি। ১৯৬৫ চনত মিৰ্জাত অনুষ্ঠিত এক শাৰীৰিক শিক্ষা আৰু ক্ৰীড়া প্ৰশিক্ষণ শিবিৰত অংশগ্ৰহণ কৰাৰ সময়ত অন্ধুৰাম দাসে প্ৰথমবাৰৰ বাবে খো-খো খেলৰ সৈতে পৰিচিত হৈছিল। সেই সময়ত তেওঁ জাগীৰোড উচ্চতৰ মাধ্যমিক বিদ্যালয়ত ইতিহাস আৰু ভূগোল বিষয়ৰ শিক্ষক হিচাপে কৰ্মৰত আছিল। প্ৰশিক্ষণ সমাপ্ত কৰি বিদ্যালয়লৈ উভতি আহি তেওঁ ছাত্ৰ-ছাত্ৰীসকলৰ মাজত খো-খো খেলৰ প্ৰচাৰ আৰম্ভ কৰে। তেওঁৰ অধ্যৱসায় আৰু অক্লান্ত প্ৰচেষ্টাৰ ফলত ধীৰে ধীৰে শিক্ষাৰ্থীসকলৰ মাজত খেলখনৰ প্ৰতি আগ্ৰহ বৃদ্ধি পায়। বিশেষকৈ ১৯৯৫ৰ পিছৰ সময়ছোৱাত নতুন প্ৰজন্মৰ বহু শিক্ষাৰ্থীয়ে খো-খোৰ প্ৰতি আগ্ৰহ দেখুৱাবলৈ আৰম্ভ কৰে আৰু অন্ধুৰাম দাসে তেওঁলোকক নিয়মীয়াকৈ প্ৰশিক্ষণ দি খো-খোৰ এক শক্তিশালী ভিত্তি গঢ়ি তোলে।
৮৫ বছৰ বয়সতো দৈনিক ১০ কিলোমিটাৰ দৌৰে অম্বুৰাম দাসে
১৯৯৯ চনত শিক্ষকতাৰ পৰা অৱসৰ গ্ৰহণ কৰাৰ পিছতো অন্ধুৰাম দাসে ক্ৰীড়াক্ষেত্ৰৰ পৰা আঁতৰি যোৱা নাছিল। বৰঞ্চ তেওঁ নিজৰ ব্যক্তিগত উদ্যোগত স্থানীয় খেলপথাৰত শিশুসকলক খো-খো আৰু কাবাডীৰ প্ৰশিক্ষণ দিবলৈ আৰম্ভ কৰে। ৮৫ বছৰ অতিক্ৰম কৰাৰ পিছতো আজিও অন্ধুৰাম দাসে দৌৰে দৈনিক ১০ কিলোমিটাৰ পথ। প্ৰায় ছয় দশকৰ এই নিৰৱচ্ছিন্ন সময়ত তেওঁ ১,০০০ জনতকৈও অধিক ছাত্ৰ-ছাত্ৰীক প্ৰশিক্ষণ দিয়াৰ সৌভাগ্য লাভ কৰিছে। তেওঁৰ প্ৰশিক্ষণত বহু খেলুৱৈয়ে জিলা, ৰাজ্যিক আৰু ৰাষ্ট্ৰীয় পৰ্যায়ত সফলতা অৰ্জন কৰিছে। কেৱল খো-খোৱেই নহয়, অন্ধুৰাম দাসে বহু ছাত্ৰ-ছাত্ৰীক বিনামূলীয়াকৈ দি আহিছে এথলেটিকছৰো প্ৰশিক্ষণ। তেওঁৰ প্ৰশিক্ষণত মীনা বৰদলৈয়ে ২০০৮ চনত থাইলেণ্ডত অনুষ্ঠিত এক আন্তঃৰাষ্ট্ৰীয় প্ৰতিযোগিতাত ভাৰতক প্ৰতিনিধিত্ব কৰি ১০,০০০ মিটাৰ দৌৰত সোণৰ পদক লাভ কৰাৰ লগতে আন দুটা শাখাত ৰূপৰ পদক জয় কৰিছিল। এই সফলতা অন্ধুৰাম দাসৰ প্ৰশিক্ষণৰ এক উজ্জ্বল নিদৰ্শন।
৮৫টা বসন্ত গৰকা অন্ধুৰাম দাসে আজিও নিয়মিত ব্যায়াম কৰে, স্বাস্থ্যসচেতন জীৱনশৈলী অনুসৰণ কৰে আৰু সমাজৰ ক্ৰীড়া উন্নয়নৰ সৈতে জড়িত হৈ থাকে। তেওঁৰ দৈনিকপঞ্জীয়ে প্ৰমাণ কৰে যে নিষ্ঠা, অধ্যৱসায়, শৃংখলা আৰু সমাজৰ প্ৰতি দায়বদ্ধতা থাকিলে এজন সাধাৰণ শিক্ষকেও অসাধাৰণভাৱে ইতিহাস ৰচনা কৰিব পাৰে। অন্ধুৰাম দাসৰ কাহিনীয়ে এইটোকে প্ৰমাণ কৰে যে সফলতাৰ কোনো বয়স নাথাকে, থাকিব লাগে কেৱল ইচ্ছাশক্তি, নিষ্ঠা আৰু অধ্যৱসায়।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
