চৌদিশে অসমীয়া ছবিৰ জয়গান। ১২ জুনত মুক্তি লাভ কৰিছিল নতুন অসমীয়া ছবি ‘চুপা চুপি’য়ে। মুক্তিৰ পিছতে অসমৰ প্ৰতিটো ছবিগৃহতে হাউছফুল দৰ্শক। ছবিখনৰ কাহিনীৰ পৰা আৰম্ভ কৰি অভিনয়লৈ সকলো বস্তুৱে দৰ্শকক আকৃষ্ট কৰিছে ।
এতিয়া ডেকাৰ পৰা বৃদ্ধলৈ সকলোৰে মুখত কেৱল ‘চুপা চুপি’ৰ প্ৰসংগ। ৱেব ছিৰিজখনৰ প্ৰতিটো চৰিত্ৰই যিদৰে দৰ্শকৰ হৃদয়ত এক সুকীয়া স্থান লাভ কৰিছে, ঠিক একেদৰে ছবিখনেও সকলোৰে হৃদয় জিনিবলৈ সক্ষম হৈছে।
প্ৰথম সপ্তাহত ‘চুপা চুপি’য়ে উপাৰ্জন কৰিছে ৩.২৫ কোটি টকা। সামাজিক মাধ্যমত এই তথ্য শ্বেয়াৰ কৰিছে নিৰ্মাতাগোষ্ঠীয়ে।
উল্লেখ্য যে, এই ছবিখনত ব্যতিক্ৰমী চৰিত্ৰত অভিনয় কৰিছে বিশিষ্ট অভিনেতা অৰুণ নাথে। ছবিখনৰ আন আন চৰিত্ৰত অভিনয় কৰিছে পল্লৱ লোচন, স্নিগ্ধা গগৈ, হিমাংশু প্ৰসাদ দাস, ৰাগিনী কৌশিক, কৌশিক ভাৰদ্বাজ, কিশোৰ তহবিলদাৰ, বৈভৱী, জিত কলিতা, সপ্তৰ্ষী গগৈ, বেদব্ৰত বৰা, জিণ্টু কুমাৰ কাশ্যপ আদিয়ে। পলাশ সূৰ্য গগৈৰ সংগীত পৰিচালনাত ছবিখনৰ গানকেইটাত কণ্ঠদান কৰিছে দীক্ষু, ৰূপম ভূঞা, নীল আকাশ, দীপান্বিতা ডেকা, আচুৰ্য বৰপাত্ৰগোহাঁই, বিশ্ৰুত শইকীয়া, সুদীপ ৰঞ্জন আদিয়ে। ‘চুপা চুপি’ৰ দৃ্শ্যগ্ৰহণ কৰিছে চন্দ্ৰ কুমাৰ দাসে আৰু সম্পাদনা কৰিছে উদীপ্ত কুমাৰ ভট্টাচাৰ্যই। এতিয়া ‘চুপা চুপি’য়ে বহুতো ডাঙৰ ডাঙৰ ছবিৰ ৰেকৰ্ড ভাঙিবলৈ সক্ষম হৈছে।
এই লেখাটো যুগুতাইছে বৰষা মিশ্ৰই
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
