প্ৰাক্তন কেন্দ্ৰীয় মন্ত্ৰী তথা ভাৰতীয় টেলিভিছনৰ আটাইতকৈ জনপ্ৰিয় বোৱাৰী চৰিত্ৰসমূহৰ ভিতৰত অন্যতম হিচাপে পৰিচিত স্মৃতি ইৰাণী আজি এক সুপ্ৰতিষ্ঠিত নাম। কিন্তু প্ৰায় অধিকাংশ সফল ব্যক্তিত্বৰ দৰে স্মৃতি ইৰাণীৰো সফলতাৰ শিখৰত উপনীত হোৱাটো একেবাৰে সহজ নাছিল। বহু সংগ্ৰাম, কঠোৰ পৰিশ্ৰম আৰু আত্মবিশ্বাসৰ বলতেই তেওঁ আজিৰ এই স্থান লাভ কৰিছে।
কেৰিয়াৰৰ আৰম্ভণিতে কি চৰ্ত দিছিল পিতৃয়ে
এটা সাধাৰণ পৰিয়ালত জন্মগ্ৰহণ কৰা স্মৃতি ইৰাণীয়ে ডাঙৰ সপোন লৈ জীৱনৰ যাত্ৰা আৰম্ভ কৰিছিল। অভিনয় জগতত প্ৰৱেশ কৰাৰ আগতে তেওঁ এটা বিউটি পেজেণ্টত অংশগ্ৰহণ কৰিছিল। সেই প্ৰতিযোগিতাত নামভৰ্তি কৰিবলৈ প্ৰায় ১ লাখ টকাৰ প্ৰয়োজন হৈছিল। এই ধন তেওঁৰ দেউতাকে ধাৰে দিছিল, কিন্তু এটা চৰ্তও ৰাখিছিল—যদি তেওঁ এই ধন ঘূৰাই দিব নোৱাৰে, তেন্তে তেওঁ দেউতাকৰ চৰ্ত অনুসৰি বিয়াত বহিব লাগিব। স্মৃতিয়ে আত্মবিশ্বাসেৰে এই প্ৰত্যাহ্বান গ্ৰহণ কৰে আৰু শেষত প্ৰতিযোগিতাখনত বিজয়ী হয়। পুৰস্কাৰ হিচাপে পোৱা ধনৰ পৰা তেওঁ ৬০ হাজাৰ টকা দেউতাকক ঘূৰাই দিয়ে। কিন্তু বাকী ধন পৰিশোধ কৰিবলৈ তেওঁ চাকৰি কৰিবলগীয়া হয়।
মেকডোনাল্ডছত বাচন ধোৱাৰ কাম কৰিছিল স্মৃতি ইৰাণীয়ে
সেই সময়ত তেওঁ মেকডোনাল্ডছত চাকৰি কৰিছিল। তাত তেওঁ ঝাড়ু দিয়া, ফ্লৰ মচা আৰু বাচন-বৰ্তন ধোৱাৰ দৰে কাম কৰিছিল। এই কাম কৰিবলৈ তেওঁ কোনো সংকোচ অনুভৱ কৰা নাছিল। এই চাকৰিৰ বাবে তেওঁ তেতিয়াৰ দিনত মাহে প্ৰায় ১,৫০০ টকা দৰমহা পাইছিল। স্মৃতিয়ে সপ্তাহত ছয় দিন চাকৰি কৰিছিল আৰু এদিনৰ বন্ধৰ দিনটোত বিভিন্ন টেলিভিছন অনুষ্ঠানৰ বাবে অডিশ্যন দিছিল। একেৰাহে কৰা প্ৰচেষ্টাৰ ফলত অৱশেষত তেওঁ প্ৰথমটো টেলিভিছন অনুষ্ঠানত অভিনয়ৰ সুযোগ লাভ কৰে। ইয়াৰ পিছতেই তেওঁৰ জীৱনৰ দিশ সলনি হৈ যায়।
অভিনয় জগতৰ আৰম্ভণি
পিছত তেওঁ জনপ্ৰিয় ধাৰাবাহিক ‘কিউ কি ছাছ ভি কভি বহু থি’ত তুলসী বিৰাণীৰ চৰিত্ৰত অভিনয় কৰে। এই চৰিত্ৰই তেওঁক দেশজুৰি অসাধাৰণ জনপ্ৰিয়তা আনি দিয়ে, আৰু তেওঁ ঘৰে ঘৰে ‘তুলসী’ নামেৰে পৰিচিত হৈ পৰে। ২০২৫ চনত তেওঁ ১৭ বছৰৰ দীঘল বিৰতিৰ পিছত ‘কিউ কি সাস ভি কভি বহু থি ২’-ৰ জৰিয়তে পুনৰ টেলিভিছন জগতলৈ উভতি আহে। অভিনয় জীৱনৰ পিছত স্মৃতি ইৰাণীয়ে ৰাজনীতিতো পদাৰ্পণ কৰে আৰু গুৰুত্বপূৰ্ণ দায়িত্ব পালন কৰে। তেওঁ প্ৰধানমন্ত্ৰী নৰেন্দ্ৰ মোদীৰ মন্ত্ৰীসভাৰ অন্যতম কনিষ্ঠ মন্ত্ৰী হিচাপে দায়িত্ব পালন কৰিছিল। ইয়াৰ উপৰিও তেওঁ মানৱ সম্পদ উন্নয়ন মন্ত্ৰালয় আৰু বস্ত্ৰ মন্ত্ৰালয়ৰ দৰে গুৰুত্বপূৰ্ণ বিভাগসমূহৰ দায়িত্বও সফলতাৰে পালন কৰিছে। স্মৃতি ইৰাণীৰ জীৱন কাহিনীয়ে এই কথাই প্ৰমাণ কৰে যে দৃঢ় ইচ্ছাশক্তি, অধ্যৱসায় আৰু কঠোৰ পৰিশ্ৰম থাকিলে যিকোনো মানুহে নিজৰ সপোন পূৰণ কৰিব পাৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
